ЩыIэныгъэм къырыкIуагъэр зэфехьысыжьы
Къэбэртэе-Бэлъкъарым инароднэ сурэтышIэу Шъэукъуй Хьамидэ иIофшIагъэхэм якъэгъэлъэгъон Мыекъуапэ къыщызэIуахыгъ.
КъокIыпIэм щыпсэурэ лъэпкъхэм яискусствэкIэ Къэралыгъо музеим и Темыр-Кавказ къутамэ «Заом тыфаеп» зыфиIорэ къэгъэлъэгъонэу щызэхащагъэр лъэпкъ шIэжьым, мамыр щыIакIэм игъэпытэн, искусствэр цIыфым ипIун зэрэхэлажьэрэм, тызхэт лъэхъаным гупшысэу фытиIэхэм афэгъэхьыгъ.
Музеим ипащэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт зэIукIэгъур пэублэ гущыIэкIэ къызэIуихыгъ, Шъэукъуй Хьамидэ ищыIэныгъэ искусствэм зэрепхыгъэр къыIотагъ.
Адыгэ Республикэм культурэмкIэ иминистрэу Аулъэ Юрэ, АР-м исурэтышIхэм я Союз итхьаматэу Елена Абакумовар, Урысыем инароднэ сурэтышIэу Къат Теуцожь, Адыгэ Республикэм инароднэ сурэтышIэу Еутых Асе, Къэбэртэе- Бэлъкъарым исурэтышIхэм я Союз итхьаматэу Къаныкъо Жаннэ, Къэбэртэе-Бэлъкъарым инароднэ сурэтышIэу Цырымэ Руслъан зэхахьэм къыщыгущыIагъэх.
ЩыIэныгъэр куоу зышIэрэ сурэтышIэу Шъэукъуй Хьамидэ зэгъэпшэнхэр ышIыхэзэ философие екIолIакIэ иIофшIэн зэрэфишIырэр Къат Теуцожь, Еутых Асе, нэмыкIхэм къаIуагъ.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ехъулIэу Адыгэ хэку комитетым иапэрэ секретарыгъэу, Адыгэ автоном хэкум лъапсэ ышIыным зиIахьышхо хэзышIыхьагъэу Хьахъурэтэ Шыхьанчэрые исаугъэтэу Мыекъуапэ щагъэуцугъэр Шъэукъуй Хьамидэ ышIыгъ.
СурэтышI цIэрыIор музеим щыкIогъэ зэхахьэм къызыщэгущыIэм къызыщытхъужьыгъэп. Адыгеир, Къэбэртэе-Бэлъкъарыр искусствэм зэрэзэфищэхэрэм, иIофшIэн гушхоныгъэ зэрэхигъуатэрэм иеплъыкIэхэр къариIолIагъ.
ЗэлъашIэрэ сурэтышIыр хэушъхьафыкIыгъэу Адыгэ Республикэм культурэмкIэ икъулыкъушIэхэм, музеим иIофышIэхэм гущыIэгъу афэхъугъ.
Адыгэ лъэпкъым тарихъ гъогу къинэу къыкIугъэр Хь. Шъэукъуим сурэтэу ышIыгъэхэмкIэ, джэрзым хишIыкIыгъэхэмкIэ къегъэлъагъо. ЗэолIым, ным, бзылъфыгъэм ищыIакIэ, нэмыкIхэм яхьылIагъэхэр гупшысэу ахэлъымкIэ уагъэгъуазэ.
Шыум ехьылIагъэм, ным ыкъо зэрэфэхыгъэм фэшI нэпсэу къехырэм уагъэрэхьатырэп. НыбжьыкIэхэу сурэтхэм яплъыхэрэм заом итхьамыкIагъо къагурэIо. ШIумрэ емрэ сурэтышIым зэрегъапшэх. Заом цIыфхэр зэрэхэкIуадэхэрэр, гукIэгъу зыхэлъхэр IэпыIэгъу зэрэзэфэхъужьыхэрэр, дин зэфэшъхьафхэр зылэжьыхэрэр къиным зэрэпэуцужьыхэрэр, фэшъхьафхэри гум къегущыIыкIых.
Шъэукъуй Хьамидэ 1964-рэ илъэсым Казахстан икъалэу Джамбул къыщыхъугъ. 1979-рэ илъэсым яунагъо Къэбэртэе- Бэлъкъарым къыгъэзэжьыгъ. Монументальнэ живописым зыфигъэсагъ. И. Репиным ыцIэ зыхьырэ Академиер Санкт-Петербург къыщиухыгъ.
Урысыем, Дунаим язэнэкъокъухэм, къэгъэлъэгъонхэм ахэлэжьагъ, щытхъуцIэхэр къащыдихыгъэх. ИIофшIагъэхэр Урысыем ишъолъырхэм, Францием, Голландием, фэшъхьафхэм алъыIэсыгъэх. Урысыем художествэхэмкIэ иакадемие иакадемик.
Къэгъэлъэгъоныр 2023-рэ илъэсым щылэ мазэм и 31-м нэс музеим щыкIощт.
ЕмтIылъ Нурбый.