Гъэсэныгъэ нэфыпсыр илъэпкъ хигощагъ
БзэшIэныгъэлэжьэу, филологие шIэныгъэхэмкIэ докторэу, профессорэу, УФ-м шIэныгъэмкIэ изаслуженнэ IофышIэшхоу Блэгъожъ Зулкъаринэ къызыхъугъэр илъэс 90-рэ мэхъу
Блэгъожъ Зулкъаринэ Теуцожь районым ит къуаджэу Нэшъукъуае тыгъэгъазэм и 11-м, 1932-рэ илъэсым къыщыхъугъ, мэкъумэщышIэ унэгъо Iужъум щапIугъ.
Уахътэу къызхэхъухьагъэр къин хьазырыгъэми, гъэсэныгъэ-шIэныгъэ зэрэзэригъэгъотыщтым ыкIи а зэкIэ иадыгэ лъэпкъ зэрэхигощэщтым щэIэфэ пылъыгъ.
1948 — 1951-рэ илъэсхэм кIэлэегъэджэ илъэситIу институтэу Мыекъуапэ дэтыгъэм щеджагъ. КIэлэегъаджэу, завучэу, директорэу Теуцожь районым ит гурыт еджапIэхэм Iоф ащишIагъ. 1961-рэ илъэсым щегъэжьагъэу Адыгэ хэкум икъэлэ шъхьаIэ къэкIожьи, Iоф ышIэу ригъэжьагъ. 1960 — 1964-рэ илъэсхэм Горьковскэ къэралыгъо университетым иаспирантурэ щеджагъ, кандидат диссертациеу «Глаголы перемещения в современном русском языке» зыфиIорэр урысыбзэкIэ ытхыгъ зэлъашIэрэ профессорэу Б. Н. Головиныр ипащэу ыкIи къыушыхьатыгъ. Ащ ыужым адыгэ-урыс бзитIушIэныгъэмкIэ диссертациер ыгъэхьазырыгъ ыкIи 1980-рэ илъэсым Киев дэт къэралыгъо университетым къыщиухъумэжьыгъ.
Урысыбзэмрэ адыгабзэмрэкIэ научнэ IофшIэгъабэ иI, ахэм япчъагъэ 400 фэдиз мэхъу: гущыIалъэхэр, зэдэгущыIалъэхэр (разговорникхэр), адыгэ гущыIэжъхэр ыугъоижьхи къыдигъэкIыгъэх. Ахэм яхьылIэгъэ статьяхэр ыкIи тхылъхэр ытхыгъэх. Академие зытIущым яакадемикыгъ. Урысыем филологие шIэныгъэмкIэ иIофышIэшху, общественнэ IофшIэнхэм сыдигъуи ахэлажьэщтыгъ, лъэпкъ гъэзет закъоу «Адыгэ макъэм» иныбджэгъугъ, бэрэ къатхэщтыгъ ыкIи къычIахьэщтыгъ. Мыекъопэ къэралыгъо технологическэ университетым ипрофессор гъэшIуагъ.
Лъэпкъ гъэсэныгъэр ыухъумагъ ыкIи лъигъэкIотагъ
Зулкъаринэ ищыIэныгъэ зэрэщытэу иадыгэ лъэпкъ епхыгъэу къызэрэрыкIуагъэм ишыхьат Адыгэ къэралыгъо кIэлэегъэджэ институтым (нэужым университетым) педагогическэ факультетыр зэрэщызэхащагъэр. Мы Iофыгъо иныр зэрифэшъуашэу пхырыщыгъэнымкIэ З. У. Блэгъожъым Iофышхо ышIагъ, илъэс 21-м мы факультетым пэщэныгъэ дызэрихьагъ. Ащ ыпэкIи институтым урысыбзэмкIэ икафедрэ ипэщагъ. ФакультетыкIэм пшъэрылъ инэу адыгабзэмрэ урысыбзэмрэкIэ ублэпIэ еджапIэхэм ащезгъэджэщт кIэлэегъаджэхэм ягъэхьазырын тэрэзэу зэшIуихын фэягъ. Мы уахътэм Зулкъаринэ методикэ тхылъ IэпыIэгъухэм ягъэхьазырынкIэ Iофышхо ылэжьыгъ. Илъэс 21-рэ зипэщэгъэ факультетым къычIитIупщыгъэ кIэлэегъэджэ 3500-р ары нахьыбэу джы къызнэсыгъэми кIэлэцIыкIу IыгъыпIэхэм, еджапIэхэм Iоф ащызышIэхэрэр. З. Блэгъожъым нэдэплъыпIэ имыIэу иIофшIэгъу мафэхэр ушъэгъагъэх, ащ дакIоу шIэныгъэхэмкIэ кандидат ыкIи доктор 23-рэ къыгъэхьазырыгъ. ЛIы гъэсагъэм иакъыл, ишIэныгъэ ныбжьыкIэхэм ыкIи наукэм ахигощагъ.
Унагъор —тынчыпI
Зулкъаринэ имурад ещэжьагъэхэр сыдигъокIи дахэу зэшIуихыгъэх. Мыщ фэдэ гъэсэныгъэ-шIэныгъэ гъогушхор къыкIунымкIэ анахьэу зишIуагъэ къэкIуагъэр иунэгъо тынч ары.
Зэшъхьэгъусэхэ Блэгъожъ Зулкъаринэрэ Асыетрэ пшъэшъитIурэ зы кIалэрэ зэдапIугъ, зэдалэжьыгъ. Зуретрэ Зулимэрэ Адыгэ къэралыгъо университетым ифакультет зэфэшъхьафхэр къаухыгъэх, кIалэми юрист сэнэхьатыр зэригъэгъотыгъ, унэгъо дахэхэр ашIагъэх, пхъорэлъфхэр ыкIи къорэлъфхэр янэ-ятэхэм къаратыгъэх. Зулкъаринэ а сабыйхэм ягугъу къышIы зыхъукIэ, ынэгу гушIо-насыпышIуагъэм къызэлъигъэнэфыщтыгъ. Иунагъо тынчыгъэ-зэгурыIоныгъэу илъыгъэм ыгъэгупсэфыщтыгъ ыкIи ащ ихьатыркIэ иIофшIэн шъхьаIи ыгъэпсыгъ, ыпэкIэ лъигъэкIотагъ.
Зэшъхьэгъусэхэм ялъфыгъэхэм Iэдэб дахэ, гъэсэныгъэ, цIыфыгъэ ахалъхьаныр афызэшIокIыгъ, ар сыда зымыуасэр?! Тымрэ нымрэ ягъогу зафэ ахэр зэрэрыкIощтхэм уехъырэхъышэнэу щытэп.
КIэлэегъаджэу, зэлъашIэрэ шIэныгъэлэжьэу, академикэу Блэгъожъ Зулкъаринэ псаоу щыIагъэмэ, илъэс 90-рэ хъущтыгъ. ШIоу ылэжьыгъэм ар ащигъэгъупшэщтэп.
Мамырыкъо Нуриет.