ШIэныгъэлэжь, кIэлэегъэджэ цIэрыIоу Блэгъожъ Зулкъаринэ игъэхъагъэхэр къыткIэхъухьэрэ лIэужхэм ашIэнхэм пае гурыт ыкIи апшъэрэ еджа­пIэхэм, тхылъеджапIэхэм Iофтхьэбзэ зэфэшъхьафхэр ащызэ­хащэх.

Профессорэу Блэгъожъ Зулкъаринэ лингвистикэм хэхъо­ныгъэ ышIыным иIахьышхо хилъхьагъ. Адыгэ къэралыгъо университетым икIэлэегъэджэ факультет илъэс пчъагъэрэ иде­канэу Iоф ышIагъ.

Зулкъаринэ Iоф дэзышIагъэ­хэми, ригъэджагъэхэми ащы­гъупшэрэп, щысэтехыпIэ зы­фэ­хъугъэри макIэп. Адыгэ къэ­ра­лыгъо университетым инаучнэ тхылъеджапIэ къэгъэлъэгъонэу щызэхащагъэр зыгъэхьазы­рыгъэр ащ ригъэджагъэхэм ащыщэу УпчIэжьэгъу ГощлъапI. ИщыIэныгъэ гъогу, илъэс пчъа­гъэхэм Iоф зыдишIэгъэ, итхыгъэхэр къызэрыхьэгъэ тхылъхэр, журналхэр, гъэзетхэр ащ къыщагъэлъэгъуагъэх. Зулкъаринэ IэнатIэу ыгъэцакIэрэм охътабэ Iихыщтыгъэми, наукэм ыкIи методикэм афэгъэхьыгъэу Iоф­шIэгъэ 260-рэ фэдиз къыхиу­тыгъ.

ШIэныгъэм ыкIи щыIэныгъэм илъэныкъо зэфэшъхьафхэм хэ­шIыкI афыриIэу, афэщагъэу щытыгъ, сыдрэ Iоф фагъэза­гъэми апэ итыгъ. Ар кIэлэ­егъаджэу, шIэныгъэлэжьэу, зэ­рэщытыгъэм дакIоу общест­веннэ IофшIэнэу ыгъэцэкIагъэм фэгъэхьыгъэ тхыгъэ макIэп къы­хиутыгъэр.

— ТикIэлэегъаджэ гъэхъагъэу иIэр пщыгъупшэ хъущтэп. КъыткIэхъухьэрэ лIэужхэм ар ядгъэшIэныр ары тызыпылъыр. Адыгэ лъэпкъ факультетым зэ­пхыныгъэ дытиIэу Iоф дэтэшIэ, ащ щеджэрэ студентхэр бэу къытэуалIэх. Ежьыр псауфэ тхылъеджапIэм къакIощтыгъ, студентхэм апай ыIозэ ытхы­гъэхэр зэтелъэу къытфихьы­щтыгъэх. Тхылъхэм анэмыкIэу гъэ­­зетхэм, журналхэм къадэхьагъэхэри дгъэхьазырыгъэх, Зул­къарин ищыIэныгъэ гъогу ахэм къыраIотыкIы, — еIо Гощ­лъапIэ.

Зулкъаринэ иныбжьыкIэгъум къыщегъэжьагъэу илэ­гъухэм къахэщэу чаныгъ, Iушыгъ, щы­Iэныгъэр дэгъоу ышIэщтыгъ.

ЦIыфхэр ыгъэдэIонхэ ылъэ­кIыщтыгъ, апэ итыгъ. Ригъэджа­гъэхэм игугъу дахэкIэ ашIыжь. Илъэс 40-кIэ узэкIэIэбэжьымэ ащ къариIощтыгъэхэр ащыгъу­пшэрэп. Сыд фэдэ Iоф уфэгъэ­загъэми, ащ угу етыгъэн зэ­рэфаер ригъэджагъэхэм къа­хилъхьагъ. ЗэкIэри шIэныгъэлэжь хъурэп, ау ныбжьыкIэм сэнаущыгъэу хэлъыр къылъэгъу­щтыгъ, ащ зыригъэушъомбгъуным пылъыгъ.

Зулкъаринэ шIэныгъэлэжь зэкъуагъэп, шIэныгъэу иIэр истудентхэм ахилъхьаныр анахь шъхьаIэу ылъытэщтыгъ. Мыщ фэдэ цIыфхэм ягугъу ренэу пшIыми уезэщыщтэп, гъэхъа­гъэу яIэри пфэухыщтэп. Тилъэпкъ зыгъэбэгъуагъэ, ыцIэ дахэкIэ рязыгъэIуагъэхэм ар ащыщ. Сыд фэдиз уахътэ тешIагъэми, Блэгъожъ Зулкъаринэ ишIэжь цIыф­хэм агъэлъэпIэщт, игъэхъагъэ­хэр ащыгъупшэщтхэп.

ДЕЛЭКЪО Анет.