Дунаим самбэмкIэ гъогогъу 11 ичемпионэу Хьасанэкъо Мурат ыцIэкIэ агъэнэфэгъэ шIухьафтынхэм якъыдэхын фэгъэхьыгъэ зэнэкъокъур тыгъэгъазэм и 8-м Мыекъуапэ щыкIуагъ.

Илъэс зэфэшъхьафхэм дунаим, Европэм язэнэкъокъухэм дышъэ медальхэр къащызыхьыгъэхэр, спортым иветеранхэр, тренерхэр, Хьасанэкъо Мурат иныбджэгъу­хэр, самбэм, дзюдом, нэмыкI спорт лъэпкъхэм апылъхэр зэхэщакIохэм къырагъэблэгъагъэх.

Зэнэкъокъум икъызэIухын ехьы­лIэгъэ зэIукIэгъум Адыгэ Республикэм физкультурэмкIэ ыкIи спортымкIэ и Комитет итхьаматэу Дэгужъые Мурат, Урысыем самбэмкIэ и Федерацие ипащэ игуадзэу Рудольф Бабоян къыщыгущыIагъэх. Спортсменхэм гъэхъагъэ ашIынэу афаIуагъ.

Мыекъуапэ икIэлэцIыкIу къэшъокIо ансамблэу «Мыекъуапэ инэфылъэхэм» адыгэ лъэпкъ къашъор дахэу къыщагъэлъэ­гъуагъ.

Дунаим щыцIэрыIу

— СамбэмкIэ дунаим гъогогъу 11 ичемпион, дунаим и Кубок гъогогъуи 8 къыдихыгъ, Европэм апэрэ чIыпIэр гъогогъуи 7 къыщихьыгъ. Урысыем изэIукIэгъухэм дышъэ медал 19 къащихьыгъ. Ащ фэдиз гъэ­хъагъэ зиIэ спортсменыр Еджэркъуае щапIугъ. Адыгэ кIэлэегъэджэ институтыр къыухыгъ. Республикэм имедалэу «Адыгеим и Щытхъузехьэр» къыфагъэшъошагъ. Джырэ уахътэ Хьасанэкъо Мурат Урысыем и Къэралыгъо Думэ идепутат, — къыIуагъ зэхахьэр зезыщагъэу, Урысыем, Адыгеим язаслуженнэ тренерэу, Дунэе Адыгэ Хасэм физкультурэмкIэ ыкIи спортымкIэ, ныбжьыкIэ IофхэмкIэ, зекIонымкIэ икомитет ипащэу Хъот Юныс.

Спортым щыцIэрыIохэ Мэрэтыкъо Сахьид, Абрам Агамирян, Алхъо Сыхьатбый, Армен Биджосян, Ашот Маркарян, Тулпэрэ Мыхьамэт, фэшъхьафхэри зэнэ­къо­къум икъызэIухын хэлэжьа­гъэх, самбэмкIэ бэнакIохэм, тренерхэм гущыIэгъу афэхъугъэх.

Адыгеим физкультурэмкIэ ыкIи спортымкIэ республикэм и Комитет ипащэу Джарымэкъо Юсыф щытыгъ, Хьасанэкъо Мурат Комитетым итхьаматэу загъэнафэм зэгъусэхэу Iоф зэдашIагъ. — Адыгэ Республикэм ищытхъу дунаим щызыIэтыгъэхэм Хьасанэкъо Мурат ащыщ. Ащ зэнэкъокъухэм къащыдихыгъэ медальхэм афэдиз къэзымы­хьыгъэ хэгъэгу пчъагъэ дунаим тет, — къытиIуагъ Джарымэкъо Юсыф.

Хэлэжьагъэхэр

СамбэмкIэ бэнэкIуи 150-рэ фэдиз зэнэкъокъум хэлэжьагъ. Урысыем ишъолъыр 12-мэ къарыкIыгъэх. Краснодар краим, Ростов хэкум, Къалмыкъым, Республикэу Къырым, Къэбэр­тэе-Бэлъкъарым, Къэрэщэе- Щэрджэсым, Ингушетием, Чувашием, Ставрополь краим, Волгоград хэкум, Адыгеим, Астрахань хэкум яспортсменхэр медальхэм афэбэнагъэх.

Адыгеим щыщхэу хагъэунэфыкIырэ чIыпIэхэр къыдэзыхыгъэхэм шъуащытэгъэгъуазэ.

Мэлгощ Адам, кг 58-рэ, Хьадыпэшъо Дамир, кг 53-рэ, СтIашъу Эльдар, кг 64-рэ, апэрэ чIыпIэхэр якупхэм къащахьыгъэх. Тренерхэу Нэгъой Ибрахьим, Делэкъо Адам, Джарымэкъо Рустам япащэх.

ЯтIонэрэ чIыпIэхэр къэзыхьыгъэхэр: Цэй Алый, кг 49-рэ, Кобл Рэмэзан, кг 58-рэ, КIушпIэ Къэплъан, кг 64-рэ, СтIашъу ТIахьир, кг 71-рэ, ГуIэтыжь Пщымаф, кг 88-рэ. Тренерхэу Джарымэкъо Рустам, ГуIэтыжь Хъалидэ ятIо­нэрэ чIыпIэхэр къэзыхьыгъэхэр агъасэх.

Хьатит Амир, кг 49-рэ, Хъот Тамирлан, кг 49-рэ, Хьакъуй Эльдар, кг 79-рэ, Николай Ковальчук, кг 88-рэ, Мамыхъу Астемир, кг 88-м къехъу, Бэгъ Астемир, кг 88-м къехъу, Нащэ Расул, кг 71-рэ, Хьакъуй Ислъам, кг 79-рэ ящэнэрэ чIыпIэхэр къа­хьыгъэх.

ЕплъыкIэхэр

Дунаим самбэмкIэ ичемпионэу, Адыгеим изаслуженнэ тренерэу Мэрэтыкъо Сахьид, Къэрэщэе- Щэрджэсым ибэнакIохэм ятренерэу БрантIэ Къэплъан Европэм ишапхъэхэм адиштэу зэнэкъо­къур зэхащагъэу алъытагъ.

АР-м изаслуженнэ тренерэу Джарымэкъо Рустам ныбжьыкIэхэм зэнэкъокъур еджапIэ афэ­хъугъэу къытиIуагъ.

Къалмыкъым къикIыгъэ тренерэу Самал Лиджиевым, Хьасанэкъо Мурат спортым щыцIэрыIоу «легенда» зыфаIорэм фагъадэу гущыIэ фабэхэр къыIуа­гъэх.

— Ти ЛIышъхьэу КъумпIыл Мурат, Правительствэм, зэхэщакIохэм, зэнэкъокъум хэлэ­жьагъэхэм лъэшэу сафэраз, — къытиIуагъ Хьасанэкъо Мурат.

Самбэм гъэхъагъэ щызышIыгъэхэм, хагъэунэфыкIырэ чIыпIэхэр къыдэзыхыгъэхэм шIухьафтынхэр аратыжьыгъэх.

— Тхьаегъэпсэух IэпыIэгъу къытфэхъугъэхэр, — къытиIуагъ АР-м самбэмкIэ испортеджапIэ ипащэу Делэкъо Адам.