СамбэмкIэ я VI-рэ Урысые зэнэкъокъоу Урысыем спортымкIэ изаслуженнэ масте­рэу, дунаим гъогогъу 11 ичемпионэу Хьа­санэкъо Мурат ыцIэ-кIэ щыт шIухьафтын­хэм якъыдэхын фэ­гъэ­хьыгъэр псау­ныгъэр зыщагъэпытэрэ физкультурэ комплексэу «Ошъутенэм» тыгъуасэ щыкIуагъ.

Килограмм 47-м къыщегъэ­жьагъэу 98-м нэс къэзыщэчырэ спортсмени 150-м ехъу зэнэ­къокъухэм ахэлэжьагъ. Ахэр Урысые Федерацием ишъолъыр 12-мэ къарыкIыгъэх, Адыгеим испортсмен 50-м ехъу ахэм ахэт.

АР-м и ЛIышъхьэу КъумпIыл Мурат ыцIэкIэ АР-м физическэ культурэмрэ спортымрэкIэ и Комитет итхьаматэу Дэгужъые Мурат зэнэкъокъум хэлажьэ­хэрэм шIуфэс къарихыгъ.

«Тиреспубликэ хэгъэгум ­испорт лъэпкъхэм ащыщэу самбэм изегъэушъомбгъун иIахь зэрэхишIыхьэрэм тэркIэ мэхьа­нэшхо иI. Спорт хэбзэ гъэнэфагъэхэр, тренер дэгъухэр тиIэ хъугъэх, тихэгъэгуи, дунаими ясамбистхэм непэ щысэ зытырахырэ чемпионхэр агъэсагъэх. Мы аужырэ илъэсхэм хэгъэ­гумрэ федеральнэ министерст­вэмрэ япащэхэм яIэпыIэгъукIэ джырэ шапхъэхэм адиштэрэ спорт инфраструктурэм псынкIэу хэхъоныгъэ республикэм щешIы. Анахь лъэгэпIэшхохэм адиштэрэ зэнэкъокъухэр зыщызэхащэрэ чIыпIэхэм Адыгеир ащыщ. ЦIыфхэр жъугъэу зыхэлэжьэрэ спортми, текIоныгъэшхохэр къы­зыщыдахырэ спортми тиреспуб­ликэ тапэкIи зыщядгъэушъомбгъущт», — къыщеIо Адыгеим и ЛIышъхьэ ишIуфэс.

Самбэм тиреспубликэ хэ­хъоныгъэ щегъэшIыгъэнымкIэ ренэу IэпыIэгъу къызэрэтатырэм фэшI самбэмкIэ Урысыем и Федерацие зэрэфэразэхэр къа­Iуагъ. Урысыем самбэмкIэ ифе­дерацие ивице-президентэу Рудольф Бабоян зэнэкъокъум хэлажьэхэрэм закъыфигъэзагъ. Самбэм Адыгеим нахь зызэрэщиушъомбгъугъэр, дунаим гъогогъу 11 ичемпионэу, дунаим икубок гъогогъуи 8-рэ къыдэзыхыгъэу, Европэм гъогогъуи 7 ичемпионэу, самбэмкIэ Урысыем гъогогъу 19-рэ ичем­пионэу, Урысыем спортымкIэ изаслуженнэ мастерэу, медалэу «Адыгеим и Щытхъузехь» зыфиIорэр къызыфагъэшъошагъэу, Адыгеим ыцIэкIэ Урысые Федерацием и Къэралыгъо Думэ идепутатэу Хьасанэкъо Мурат ащ изегъэушъомбгъун иIахь зэрэхишIыхьагъэр вице-президентым хигъэунэфыкIыгъ. Рудольф Бабоян спортсменхэм афэлъэ­Iуагъ зэнэкъокъухэм текIоныгъэшхохэр щашIынхэу, яцыхьэ нахь зытелъыжьынэу.

Джащ фэдэу Адыгеим исамбистхэу мыгъэ текIоныгъэшхохэр къыдэзыхы­гъэхэм ыкIи ахэм ятренерхэм Адыгеим и ЛIышъхьэу КъумпIыл Мурат ыцIэкIэ ахъщэ сертификатхэр Хьасанэкъо Мурат аритыжьыгъэх. Дунаим ичемпионат щатекIогъэ, Европэм ичемпионат тыжьын медалыр къыщызыхьыгъэ Екатерина Соловьевам сомэ миллионрэ мини 150-рэ, ащ итренерэу Нэныжъ Байзэт сомэ мин 280-рэ къаратыгъ. Джащ фэдэу Европэм ичемпионат щатекIуагъэхэу Кобл Рэмэзанрэ Нащэ Расулрэ сомэ мин 500 зырыз, ахэм ятренерхэу Джарымэкъо Азмэтрэ Джарымэкъо Рустамрэ сомэ мини 125-рэ зырыз къаратыгъ. Спортсмен заулэмэ Урысыем спортымкIэ имастер иудостоверение къаратыжьыгъ. Нэужым зэнэкъокъухэр лъагъэ­кIотагъэх.

АР-м и ЛIышъхьэ ипресс-къулыкъу

КIэух зэнэкъокъухэмкIэ а 1-рэ чIыпIэр къыдэзыхыгъэхэр: Мэлгощ Адам (кг 58-рэ), СтIашъу Эльдар (кг 64-рэ), Хьадыпэшъо Дамир (кг 53-рэ). Нэбгыритфымэ я 2-рэ чIыпIэр къахьыгъ, я 3-рэ чIыпIэр бэнэ­кIуиимэ къыдахыгъ.

Зэнэкъокъум фэгъэхьыгъэ къэбарыр нахь игъэкIотыгъэу тикъыдэкIыгъохэм ащыщ итыщт.