Адыгэ къашъомкIэ ансамблэу «Абрекхэм» япчыхьэзэхахьэ «Налмэсым» иконцерт къэтыпIэ тыгъэгъазэм и 14-м щыкIощт.

Лъэпкъым итарихъ, шэн-хабзэхэр къашъохэмкIэ къэзыIотэрэ ансамблэу «Абрекхэр» Санкт-Петербург, IэкIыб къэралхэм ащы­Iагъ. Мыекъуапэ къыщитырэ концертхэм тяплъызэ, къэшъуа­кIохэм яIэпэIэсэныгъэ зэрэхагъа­хъорэм дакIоу, шэн-хабзэхэр дэгъоу зэрахьанхэм зэрэпылъхэр къыхэтэгъэщы.

Ижъырэ лъэхъаным адыгэ абрекхэр цIыфхэм IэпыIэгъу афэ­хъущтыгъэх, гукIэгъоу ахэлъыр щыIэныгъэм щыпхыращыщтыгъ. Ансамблэу «Абрекхэр» шIушIэ зэхахьэхэм ахэлажьэх, якъашъо­хэмкIэ цIыфхэм алъэIэсы. Адыгэ Хасэм иIофыгъохэм чанэу ахэлажьэ.

Илъэси 8 хъугъэ ансамблэм къэшъокIуи 100 фэдиз хэт. Аныбжьхэм ялъытыгъэу купищэу гощы­гъэх. Адыгэ шъуашэкIэ фэпагъэ­хэу пчэгум къызихьэхэкIэ дахэу мэуджых. Ны-тыхэм якIалэхэр къамышIэжьэу, «зэкIэри зэфэдэх, дахэх» аIоу тырехьылIэ.

— Израиль, Тыркуем тащыIэу тилъэпкъэгъухэм адытиIэгъэ зэIукIэгъухэр гум шIукIэ къинэжьыгъэх, — къытфеIуатэ ансамблэм ихудожественнэ пащэу ТхьакIумэщэ Налбек. — Адыгэ Республикэм имэфэкIхэм тахэлажьэ, лъэпкъ­хэм язэпхыныгъэ гъэпытэгъэным тыпылъ.

Къашъохэу «ЗэфакIу», «Лъэпэрышъу», «Ислъамый», «ХьакIулащ» зыфиIохэрэр ансамблэм къышIыщтых. Адыгеим иорэдыIо цIэрыIоу Дзыбэ Мыхьамэт, Къэ­бэртэе-Бэлъкъарым иартистхэу ДышъэкI Артур, Маршен Муает, Дарэкъо Рали, Адыгэ Респуб­ликэм изаслуженнэ артисткэу Даутэ Сусанэ концертым хэлэ­жьэщтых.

Пчыхьэзэхахьэр гъэшIэгъонэу кIощт, зэхэщакIохэм искусствэр зыгу рихьыхэрэр рагъэблагъэх.