Урысыем и Кубок шъхьафит бэнакIэмкIэ къыдэхыгъэным фэгъэхьыгъэ зэнэкъокъур тыгъэгъазэм и 10 — 11-м Адыгэ къэралыгъо университетым испорт Унэшхоу Кобл Якъубэ ыцIэ зыхьырэм щыкIощт.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм епхыгъэу зэхащэрэ зэнэкъокъум хъулъфыгъэхэр хэлэ­жьэщтых. Адыгэ Республикэм и ЛIышъхьэ ишIухьафтынхэм якъыдэхын спортсменхэр фэбэнэщтых.

Зэнэкъокъур тыгъэгъазэм и 10-м рагъэжьэщт. Апэрэ мафэм пэшIорыгъэшъ зэIукIэгъухэр яIэщтых. Тыгъэгъазэм и 11-м, сыхьатыр 10:30-м финалым хэхьагъэ­-хэм зэнэкъокъур лъагъэкIотэщт.

— Урысыем ишъолъыри 10-мэ ябэнакIохэм яIэ­пэIэсэны­гъэ алырэгъум къыщагъэлъэгъощт, — къытиIуагъ Адыгэ Рес­публикэм физкультурэмкIэ ыкIи спортымкIэ и Комитет итхьаматэу Дэгужъые Мурат.

Москва, Санкт-Петербург, Темыр Осетием — Аланием, Дагъы­стан, Бурятием, Къырым, Къэ­бэртэе-Бэлъкъарым, Красноярскэ краим, Чэчэным, Адыгэ Рес­публикэм ябэнакIохэр Урысыем и Кубок икъыдэхын фэгъэхьыгъэ зэIукIэгъухэм ахэлэжьэщтых.

Тыгъэгъазэм и 11-м, пчыхьэм сыхьатыр 5-м зэнэкъокъур игъэ­кIотыгъэу къызэIуахыщт. Адыгэ Республикэм и Правительствэ икъулыкъушIэхэр, культурэм иIофышIэхэр спортсменхэм къафэгушIощтых.

ХагъэунэфыкIырэ чIыпIэхэм якъыдэхынкIэ зэIукIэгъухэр пчы­хьэм сыхьатыр 15:30-м рагъэ­жьэщтых. Дышъэм икъыдэхынкIэ зэнэкъокъухэр пчыхьэм сыхьатыр 6:40-м аублэщтых. Нэужым, сыхьатыр 8-м хагъэу­нэфыкIырэ чIыпIэхэр къыдэзыхыгъэхэм ацIэхэр зэхахьэм къыщыраIощтых, шIухьафтынхэр аратыжьыщтых.

Урысыем, Европэм яспорт шапхъэхэм адиштэрэ спорт псэуалъэхэр Адыгэ Республикэм щагъэпсыгъэх. Хэгъэгу ыкIи Дунэе зэIукIэгъухэр республикэм щызэхащэнхэмкIэ амалышIухэр яIэх. Адыгэ Республикэм и ЛIышъхьэу КъумпIыл Мурат, Правительствэм, Парламентым яшIушIагъэ щыIэныгъэм къыщэлъагъо. Опытэу яIэр агъэфедэзэ зэнэкъокъу зэ­фэшъхьафхэр дзюдомкIэ, самбэмкIэ Мыекъуапэ зэрэщыкIуагъэхэм тигъэгушIуагъ. Рагъэжьэгъэ Iофыр зэрэлъыкIуатэрэм гушхоныгъэ къытхелъхьэ.

Спортыр зыгу рихьыхэрэр шъхьафит бэнакIэмкIэ зэнэкъо­къум еплъынхэу зэхэщакIохэм рагъэблагъэх.