Хьасанэкъо Мурат фэгъэхьыгъ
Дунаим самбэмкIэ изэнэкъокъухэм гъогогъу 11 апэрэ чIыпIэр къащыдэзыхыгъэ Хьасанэкъо Мурат фэгъэхьыгъэ зэIукIэгъухэр тыгъэгъазэм и 8-м Мыекъуапэ щызэхащэщтых.
Урысыем и Къэралыгъо Думэ идепутатэу, самбэмкIэ дунаим щызэлъашIэрэ Хьасанэкъо Мурат ыцIэкIэ агъэнэфэгъэ шIухьафтынхэм якъыдэхын илъэс 18-м нэс зыныбжь кIалэхэр фэбэнэщтых.
Хьасанэкъо Мурат Еджэркъуае къыщыхъугъ. ИцIыкIугъом къыщегъэжьагъэу спортымкIэ зэIукIэгъухэм ахэлэжьэныр шэнышIу фэхъугъ. Волейбол, футбол ешIэныр нахь ыгу рихьыщтыгъ. Арэу щытми, самбэр, дзюдор къыхихыгъэх.
Педагогикэ шIэныгъэхэмкIэ докторэу, профессорэу Хьакъунэ Нурбый икIэлэгъум футбол ешIэщтыгъ. Командэхэм ахэтэу хэгъэгум изэнэкъокъухэм ахэлажьэщтыгъ. Хьакъунэ Нурбыйрэ Хьасанэкъо Муратрэ спортым фэгъэхьыгъэу гущыIэгъу зэфэхъугъэх, унэшъо хэхыгъэ рахъухьагъ. СССР-м изаслуженнэ тренерэу, самбэмкIи, дзюдомкIи Мыекъопэ бэнэпIэ еджапIэм лъапсэ фэзышIыгъэ Кобл Якъубэ IукIэнхэу мурад зэдашIыгъ…
Еджэркъуае икIэлэцIыкIу-ныбжьыкIэ спорт еджапIэ итренерэу Бэрзэдж Шыхьам ыгъэсэрэ кIалэхэм ахэтэу М. Хьасанэкъом иIэпэIэсэныгъэ хигъэхъуагъ. Адыгэ къэралыгъо кIэлэегъэджэ инстиутыр къыухыгъ. Тренер зэфэшъхьафхэр ипащэхэу спортышхом нахь куоу хэщагъэ хъугъэ.
1991-рэ илъэсым дунаим самбэмкIэ гъогогъуищэ апэрэ чIыпIэр къыщыдэзыхыгъэ Хьэпэе Арамбыйрэ Хьасанэкъо Муратрэ, адыгэмэ зэраIоу, Тхьэм зэфихьыгъэх. СССР-м, Урысыем язаслуженнэ тренерэу Хьэпэе Арамбый спортым епхыгъэ зэхэщэн Iофыгъохэри дэгъоу ыгъэцакIэхэзэ, М. Хьасанэкъом хэпшIыкIэу кIуачIэри, къулаири ыпсыхьагъэх. Европэм, дунаим язэнэкъокъухэм апэрэ чIыпIэхэр къащыдихызэ спортым лъэгъо шъхьаф щыпхырищыгъ.
1997 — 2006-рэ илъэсхэм М. Хьасанэкъом бэнэпIэ алырэгъум зыкIи къыщытекIуагъэхэп. Урысыем гъогогъу 19 самбэмкIэ, дзюдомкIэ 1 дышъэ медальхэр къыщихьыгъэх.
Спортым гъэхъэгъэ инхэр М. Хьасанэкъом зэрэщишIыгъэхэм фэшI тиреспубликэ итын анахь лъапIэу медалэу «Адыгеим и Щытхъузехьэр», нэмыкIхэри къыфагъэшъошагъэх.
Къэралыгъо Думэм идепутатэу Хьасанэкъо Мурат хэбзэ къулыкъур дэгъоу зэрехьэ, общественнэ пшъэрылъхэр егъэцакIэх.
— Спортым цIыфышIумэ нэIуасэ сафишIыгъ, ныбджэгъубэ щысиI, — къытиIуагъ Хьасанэкъо Мурат.
— Къэбэртэе-Бэлъкъарым, Къэрэщэе-Щэрджэсым, Краснодар краим, Чебоксары, Адыгеим, Ростов хэкум, нэмыкIхэм ябэнакIохэр Хьасанэкъо Мурат фэгъэхьыгъэ зэнэкъокъум хэлэжьэщтых, — къытиIуагъ Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адам. — Спорт Унэшхоу «Ошъутенэм» самбэр зыгу рихьыхэрэр къетэгъэблагъэх.