Ныдэлъфыбзэм фэгъэхьыгъагъ
Ныдэлъфыбзэм ыкIи культурэм якъызэтегъэнэн, язэгъэшIэн фэгъэхьыгъэ Iофыгъохэм атегущыIагъэх. Iофтхьабзэм нэбгырэ шъитIу фэдиз хэлэжьагъ.
АР-м гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, Адыгэ филологиемрэ культурэмрэкIэ ифакультет Iофтхьабзэм кIэщакIо фэхъугъэх.
Дунэе шIэныгъэ-практическэ конференциеу «Лъэпкъыбзэмрэ культурэмрэ къэухъумэгъэныр» зыфиIорэмкIэ форумыр рагъэжьагъ. Адыгеим ишIэныгъэлэжьхэм адакIоу Краснодар краим, Къэбэртэе-Бэлъкъарым, Къэрэщэе-Щэрджэсым, Башкортостан, Къалмыкъым, Москва, Абхъазым ыкIи Тыркуем къарыкIыгъэ лIыкIохэр хэлэжьагъэх.
Тхылъэу «Адыгэмэ якультурэ ыкIи яунэгъо зехьакI: Адыгэ хабзэр» зыфиIорэм икъэгъэлъэгъонкIэ Iофтхьабзэр аублагъ. Адыгеим къэралыгъо гъэпсыкIэ зиIэр илъэси 100 зэрэхъугъэм фэгъэхьыгъэу ар къыдагъэкIыгъ. Адыгэхэм яшэн-хабзэхэр, якультурэ, ятарихъ мы тхылъым игъэкIотыгъэу къыщыхаутыгъ.
Къэзэрэугъоигъэхэм шIуфэс къарихыгъ АР-м гъэсэныгъэмрэ шIэныгъэмрэкIэ иминистрэ игуадзэу Артем Журавель.
— Непэрэ форумым мэхьанэ ин иI. Ныдэлъфыбзэм икъызэтегъэнэн зэкIэми зэдытиIоф. Гъэсэныгъэм исистемэ къыдыхэлъытэгъэ егъэджэгъу сыхьатхэм анэмыкIэу, адыгагъэм, адыгэ культурэм язэгъэшIэн уахътэ тырагъэкIодэн фаеу сэлъытэ. Ащ тикIэлэегъаджэхэр фэхьазырых, сыда пIомэ ныдэлъфыбзэр, культурэр зэрашIэрэм дакIоу кIэлэеджакIохэр зэреджэщт тхылъхэм якъыдэгъэкIын яIахьышIу халъхьэ. Мы лъэныкъомкIэ Адыгэ къэралыгъо университетым Iоф зэрэдатшIэрэм хэдгъэхъощт, — къыIуагъ ащ.
Джащ фэдэу АР-м культурэмкIэ иминистрэ игуадзэу Кушъу Светланэ, Адыгэ къэралыгъо университетым ипроректорэу Михаил Силантьевыр, гуманитар ушэтынхэмкIэ Адыгэ республикэ институтым ипащэу ЛIыIужъу Адам гущыIэ аратыгъ.
— Лъэпкъ цIыкIухэм абзэ кIодыжьыным ищынагъо щыI. Адыгабзэ закъор арэп, тэ тыбзэкIи ащ фэдэ щынагъо щыI, тигумэкIыгъохэр зэфэдэх. Мыщ фэдэ форумхэм яшIуагъэ къэкIонэу сэлъытэ, — къыIуагъ Абхъазым къикIыгъэ Батал Хагуш.
Нэужым АКъУ-м адыгэ филологиемрэ культурэмрэкIэ ифакультет идеканэу Хьамырзэкъо Нуриет адыгабзэм имэхьанэ зыкъегъэIэтыгъэным, хэхъоныгъэхэр ышIынхэм афэшI шIэгъэн фаехэм, Iофыгъоу зэшIуахыхэрэм къатегущыIагъ. Адыгабзэм имэхьанэ цIыфхэм къагурыIоным, шIу алъэгъуным пае апшъэрэ еджапIэм Iофтхьабзэхэр бэу щызэхащэх. Ахэм зэу ащыщ илъэс пчъагъэ хъугъэу щырагъэкIокIырэ адыгэ диктантыр. Джащ фэдэу мыгъэ ятIонэрэу адыгэ лагерь зэхащагъ. Жэнэ Къырымызэ ыцIэкIэ щыт дунэе литературнэ зэнэкъокъум деканыр къытегущыIагъ.
Лъэпкъыбзэмэ якъызэтегъэнэжьын фэгъэхьыгъэ нэмыкI Iофыгъохэм къэзэрэугъоигъэхэр атегущыIагъэх, докладхэр къашIыгъэх, куп-купэу гощыгъэхэу Iоф ашIагъ.
Тыгъэгъазэм и 2-м IофшIэныр падзэжьыгъ. Мы мафэм нэмыкI шъолъырхэм ащыщ хьакIэхэм анэмыкIэу, республикэм ирайонхэм ыкIи икъалэхэм къарыкIыгъэ кIэлэегъаджэхэр ыкIи кIэлэеджакIохэр форумым хэлэжьагъэх.
Программэм къыдыхэлъытагъэу адыгабзэр ыкIи литературэр языгъэхьырэ кIэлэегъаджэхэм яIофшIэн зэрэзэхащэрэр къагъэлъэгъуагъ. Адыгеим ит гурыт еджапIэхэм ыкIи адыгабзэр зыщызэрагъашIэрэ тырку университетхэу Дюздже ыкIи Эрджиес адэтхэм ащагъэфедэрэ методикэхэм къатегущыIагъэх.
Федеральнэ къэралыгъо шапхъэм адиштэу агъэпсыгъэ гъэсэныгъэ программэхэу «Адыгэ литературэр», «Адыгабзэр» зыфиIохэрэм лъэтегъэуцо афашIыгъ. Тхылъхэм ащыщхэр шIэныгъэ-методическэ советым ыштагъэх ыкIи агъэфедэнхэу рагъэжьэщт.
Анахь мэхьанэ зиIэ Iофтхьабзэхэм ащыщыгъ этнокультурнэ гъэсэныгъэ гупчэу «АдыгLand» зыфиIорэм икъызэIухын. Джащ фэдэу дунэе онлайн-проектэу «Черкес шъыхьэ цIыкIу» зыфиIорэр апэрэу зэхащагъ.
«АдыгLand» зыфиIорэ гупчэр я 8 — 10-рэ классхэм ащеджэхэрэм атегъэпсыхьагъ. Ащ къыдыхэлъытагъэу адыгэ шэн-хабзэхэм язэгъэшIэн фэIорышIэрэ Iофтхьэбзэ гъэшIэгъонхэр афызэхащэщтых.
«Черкес шъыхьэ цIыкIу» зыфиIорэм республикэм ирайон зэфэшъхьафхэм къарыкIыгъэ кIэлэеджэкIо 43-рэ хэлэжьагъ. Сыхьатым къыкIоцI ахэм упчIэ 50-м яджэуапхэр къаратыжьыгъэх. Адыгэ культурэм, тарихъым афэгъэхьыгъэхэр ахэм ахэтыгъэх. ТекIоныгъэ къыдэзыхыгъэр Улэпэ гурыт еджапIэу N 9-м щеджэрэ Гъубжьэкъо Тамил. Балл 50-м щыщэу 49-рэ къырихыгъ. Ащ шIухьафтынэу планшет ратыгъ.
Ныдэлъфыбзэм имэхьанэ зыкъегъэIэтыгъэнымкIэ мыщ фэдэ Iофтхьабзэхэм шIогъэ гъэнэфагъэ зэрахэлъыр гущыIэгъу тызыфэхъугъэ кIэлэегъаджэхэм къаIуагъ. Программэм къыдыхэлъытагъэу ансамблэу «Ащэмэзым» ижъырэ адыгэ орэдыжъхэр къаIуагъэх. Адыгеим ичIыпIэ дахэхэр къакIухьагъэх. Джащ фэдэу хэдыкIынымкIэ, пшэхъо сурэт шIынымкIэ, пхъэшIэнымкIэ сэнаущыгъэ ин зыхэлъэу тиреспубликэ щыпсэухэрэм мастер-класс къагъэлъэгъуагъ.
ДЕЛЭКЪО Анет.