ЗэлъашIэрэ пщынаоу, композиторэу ЛIыбзыу Аслъан ипчыхьэзэ­ха­хьэхэр гъэшIэгъонэу Адыгеим щэкIох.

Адыгэ Республикэм культурэмкIэ и Министерствэ исурэт къэгъэлъэгъуапIэ щызэхащэгъэ зэIукIэгъур искусствэр зыгу ри­хьыхэрэм ащыгъупшэжьыщтэп. АР-м изаслуженнэ артисткэу АфэшIэгъо Фаинэ пчыхьэзэхахьэр зэрищагъ.

Темыр Кавказым, Къыблэм, США-м, Тыр­ку­ем, Израиль, Иорданием, нэмыкIхэм А. ЛIы­бзыум концертхэр къазэрэщитыгъэхэр, зэIукIэгъоу иIагъэхэр АфэшIэгъо Фаинэ къыIотагъэх. Зэхахьэм анахьэу къыщыхэдгъэщырэр залым чIэсхэр композиторым еупчIыхэзэ, зэдэгущыIэгъур узыIэпищэу зэ­рэкIуагъэр ары.

— Тыркуем, США-м, фэшъхьафхэм нэIуа­сэу ащысиIэхэм япчъагъэ хэхъуагъ, теле­фон­­кIэ тызэфытео. Псэ зыпыт зэIукIэгъухэм ситворчествэ хэпшIыкIэу къагъэбаигъ. Сурэт къэгъэлъэгъуапIэм непэ тызэрэщызэIукIагъэм мэхьэнэ ин иIэу сэлъытэ. ТапэкIи мыщ фэдэ зэхахьэхэр Мыекъуапэ щызэхащэхэ сшIоигъу, — къыIуагъ Адыгэ Республикэм, Къэрэщэе-Щэрджэсым язаслуженнэ артистэу ЛIыбзыу Аслъан.

Пчыхьэзэхахьэм музыкантхэр, IэкIыб хэ­гъэгухэм къарыкIыжьыгъэхэр, сурэтышIхэр, спортсменхэр, культурэм иIофышIэхэр, кIэлэ­еджакIохэр щызэIукIагъэх. Оркестрэм хэтхэу Александр Кисьян, Сергей Орвачевым, Владимир Никоновым, Хачир Сарьян, Максим Кусенкэм музыкальнэ Iэмэ-псымэ зэ­фэшъхьафхэмкIэ орэдышъохэр агъэжъынчыгъэх. Лъэпкъ искусствэм щыцIэрыIо СтIашъу Мэдини исэнаущыгъэ къыгъэлъэгъуагъ. КларнетымкIэ, нэмыкIхэмкIи произведениехэр къыригъэIуагъэх. АР-м искусствэхэмкIэ иколледж иеджакIохэм орэдхэр къаIуагъэх.

ЛIыбзыу Аслъан ыусыгъэхэм ямызакъоу, Натхъо Джанхъот, КIубэ Щэбан, фэшъхьафхэм япроизведениехэр пщынэмкIэ къыригъэIуагъэх.

Спорт унагъом щапIугъэ Хьэпэе Къэплъан иIахьылхэр игъусэхэу зэхахьэм хэлэ­жьагъ. СурэтышIэу Дугъ Айтэч зэхэщакIохэм къащыт­хъугъ. Пшъашъэхэм зэдырагъа­штэзэ къыта­Iуагъ, лъэхъаным диштэрэ пчы­хьэзэхахьэхэм нахьыбэрэ ащызэIукIэхэ зэ­рашIоигъор.

— Филармонием тыгъэгъазэм и 6 —7-м щыкIощт пчыхьэзэхахьэхэм шъуяплъынэу шъу­къесэгъэблагъэ, — зэхахьэм икIэух къыщиIуагъ ЛIыбзыу Аслъан.