Къыблэм иныбжьыкIэхэм сам­бэмкIэ язэнэкъокъу шэкIогъум и 30-м къыщыублагъэу тыгъэгъазэм и 2-м нэс Ермэлхьаблэ щыкIуагъ.

Адыгэ Республикэм ихэшыпыкIыгъэ командэ самбэмкIэ ибэнакIохэм апэрэ чIыпIи 5 къыдахыгъ.

Кобл Рэмэзан, кг 58-рэ, тренерхэу Джарымэкъо Рустамрэ Джарымэкъо Азмэтрэ ипащэх. Хьакъуй Амир, кг 79-рэ, тренерхэу Делэкъо Адам, Гъомлэшк Алый агъасэ. Типшъашъэхэми тагъэгушIуагъ. Къыблэм апэрэ чIыпIэхэр къыщыдэзыхыгъэхэм ухьазырыныгъэ дэгъу къагъэлъэгъуагъ. ХьакIако Данэ, кг 50, Анастасия Коржовам, кг 80, дышъэ медальхэр къафагъэшъошагъэх. Тренерхэу Мерэм Саидэрэ Беданэкъо Байзэтрэ пшъашъэхэр самбэм фагъасэх.

Европэм, дунаим яныбжьыкIэхэм язэнэкъо­къухэм медальхэр къащызыхьыгъэ Ека­те­рина Соловьевар кг 80-м нахьыбэ къэзы­щэчыхэ­рэм якуп щыбани, апэрэ чIыпIэр Ер­мэлхьаблэ къыщихьыгъ, тренерыр Нэныжъ Байзэт.

ЯтIонэрэ чIыпIэр къэзыхьыгъэхэ Гъомлэшк Анзор, кг 64-рэ, Бэгъ Тимур, кг 71-рэ, тренерхэу Делэкъо Адамрэ Гъомлэшк Алыйрэ агъасэх. Едыдж Разыет, кг 80-м къехъу, тыжьыныр къыхьыгъ. Пшъашъэм ипащэр тренер IэпэIасэу Нэныжъ Байзэт.

Ящэнэрэ чIыпIи 5 тибэнакIохэм къа­хьыгъ. ЛIыхъурэе Мурат, кг 58-рэ, тренерхэр Де­лэкъо Адамрэ Гъомлэшк Алыйрэ. СтIашъу ТIахьир, кг 71-рэ, тренерыр Джарымэкъо Рустам. Мыгу Миланэ, кг 71-рэ, Виктория Пылева, кг 80, тренерхэу Мерэм Саидэрэ Беданэкъо Байзэтрэ япащэх. Къэлэкъутэкъо Азамат, кг 38-рэ, тренерхэр Нэгъой Ибрахьимрэ Джарымэкъо Рустамрэ.

— Медальхэр къыдэзыхыгъэ тиныбжьыкIэ­хэм яIэпэIэсэныгъэ хэпшIыкIэу хагъахъо. ЗэхэщакIохэм къызэрэхагъэщыгъэу, Адыгеим ибэнакIохэм, тренерхэм нэмыкI командэхэр къакIырэплъых. Урысыем икIэух зэнэкъокъу 2023-рэ илъэсым, мэзаем Екатеринбург щыкIощт. ХагъэунэфыкIырэ чIыпIэхэр къыдэ­зыхыгъэр хэгъэгум изэIукIэгъухэм ахэлэжьэщтых, — къытиIуагъ Адыгэ Рес­публикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адам. — Тиспортсменхэм, тренерхэм гъэхъагъэу зэнэкъокъум щашIыгъэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фагъэхьы.