Илъэс къэс зэхащэщт
РСФСР-м изаслуженнэ тренерэу Хъуажъ Мэджыдэ фэгъэхьыгъэу шIэжь зэнэкъокъу атлетикэ онтэгъумкIэ Хьакурынэхьаблэ щыкIуагъ.
Адыгэ Республикэм атлетикэ онтэгъумкIэ и Федерацие ипащэу Былымыхьэ Рэщыд, Хъуажъ Мэджыдэ ыгъэсагъэхэм ацIэкIэ Хьакурынэ Руслъан зэнэкъокъум икъызэIухын ехьылIэгъэ зэхахьэм къыщыгущыIагъэх.
М. Хъуажъыр 1937-рэ илъэсым шэкIогъум и 5-м Хьакурынэхьаблэ къыщыхъугъ. ИцIыкIугъом къыщыублагъэу физкультурэм, спортым апылъэу псэугъэ. СпортымкIэ дунэе класс зиIэ мастерхэр, СССР-м ыкIи Урысыем спортымкIэ ямастерхэр ыгъэсагъэх, общественнэ пшъэрылъхэм ягъэцэкIэн, лъэпкъ Iофыгъохэм язэшIохын чанэу ахэлажьэщтыгъ.
— Хьакурынэхьаблэ атлетикэ онтэгъумкIэ щыкIогъэ зэнэкъокъум 2008 — 2012-рэ илъэсхэм къэхъугъэ кIалэхэм яIэпэIэсэныгъэ къыщагъэлъэгъуагъ, — къытиIуагъ АР-м атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу, Хъуажъ Мэджыдэ ыгъэсагъэхэм ащыщэу Сихъу Рэмэзан.
Апэрэ чIыпIэхэр къыдэзыхыгъэхэм шъуащытэгъэгъуазэ.
Даниил Малов, кг 33-рэ, тренерыр Шъаукъо Индар, Лямэ Амир, кг 35-рэ, Ордэкъо Астемир, кг 49-рэ, тренерыр Хьагъур Рэджэб.
Инэм щыщхэу тренерэу Роман Казаковым ыгъасэхэрэ Михаил Бесовым, кг 37-рэ, Андрей Кармановым, кг 41-рэ, ЛъэпцIэрышэ Рэмэзан, кг 61-рэ, Иван Токарчук, кг 55-рэ, Александр Зайцук, кг 61-рэ, апэрэ чIыпIэхэр къыдахыгъэх.
Роман Оглы, кг 45-рэ, Мыекъуапэ щыщ, тренерыр Сихъу Аслъан, апэрэ чIыпIэр къыфагъэшъошагъ.
Мыекъуапэ зыщызыгъэсэрэ Богдан Рожковым, кг 67-м къехъу, зэнэкъокъум апэрэ чIыпIэр къыщихьыгъ, тренерыр Алексей Краснов.
ХагъэунэфыкIырэ чIыпIэхэр къыдэзыхыгъэхэм афэгушIуагъэх, медальхэр, хэушъхьафыкIыгъэ кубокхэр, ахъщэ шIухьафтынхэр, щытхъу тхылъхэр аратыжьыгъэх.
— Хъуажъ Мэджыдэ фэгъэхьыгъэ шIэжь зэнэкъокъум тиспорт еджапIэ кIэщакIо фэхъуи, апэрэу зэхэтщагъ. Ащ ишIушIагъэ тщыгъупшэрэп. Ыгу къытемыожьырэми, непи къытхэтэу тэлъытэ, илъэс къэс зэнэкъокъухэр Хьакурынэхьаблэ щыредгъэкIокIынхэ тимурад, — къытиIуагъ Сихъу Рэмэзан.