КIэлэцIыкIухэм апае я V-рэ шъо­лъыр фестивалэу «Театральное зазеркалье» зыфиIорэр республикэм и Къэралыгъо филармоние къыщызэ­Iуахыгъ. Адыгеим иилъэси 100 ихэгъэунэфыкIын къыдыхэлъытагъэу ар зэхащагъ.

Фестивалым икIэщакIох АР-м культурэмкIэ и Министерствэрэ республикэм и Къэралыгъо филармониерэ.

Нысхъэпэ спектаклэу «Король Вруляля» зыфиIорэмкIэ Iофтхьабзэр ауб­лагъ, нысхъэпэ театрэу «Дышъэ къошыным» ар къышIыгъ, Андрей Кружноим ипьесэ техыгъ. Хьанэхъу Адам ыцIэ зыхьырэ камернэ музыкальнэ театрэм фестивалым къыдыхэлъытагъэу Андрей Семиным ипьесэ техыгъэ мюзиклэу «Сказка о времени» зыфиIорэр тыгъуасэ джащ фэдэу къыщагъэлъэгъуагъ.

АР-м культурэмкIэ и Министерствэ къызэритыгъэмкIэ, Къыблэ ыкIи Темыр-Кавказ федеральнэ шъолъырхэм ятеатральнэ коллективхэр фестивалым хэлажьэх, сабыйхэмрэ Iэтахъохэмрэ ателъытэгъэ къэгъэлъэгъонхэр арых къашIыщтхэр. ШэкIогъум и 30-м нэс фестивалыр кIощт.

Непэ пчэдыжьым сыхьатыр 10-м Лъэпкъ театрэу И. Цэим ыцIэ зыхьырэм къыгъэлъэгъощт пшысэу «На волне мечты» зыфиIорэр. Сергей Козловым ипьесэу «По зеленым холмам океана» зыфиIорэм ар те­хыгъ. Спектаклэу «Кто в сапогах?» зыфиIоу Шарль Перро ипшысэ техыгъэр Черкес драматическэ театрэу М. Акъэм ыцIэ зыхьырэм Адыгеим и Къэралыгъо филармоние изалышхо сыхьатыр 12-м непэ къыщигъэлъэ­гъощт.

ШэкIогъум и 30-м пчэдыжьым сыхьатыр 10-м Урыс драматическэ театрэу А. Пушкиным ыцIэ зыхьырэм пшысэу «Путешествие по русским народным сказкам (Бабка Ежка – за!)» зыфиIоу Константин Мездриным ипьесэ техыгъэр къыщагъэлъэгъощт, мы мэфэ дэдэм сыхьатыр 12-м «Заступник земли русской» зыфиIорэ спектаклэу Дмитрий Лемберскэм ипьесэ техыгъэр Краснодар краим инысхъэпэ театрэ къытыщт, фестивалыр Къэралыгъо филармонием щызэфашIыжьыщт.

Сурэтыр А. Гусевым тырихыгъ.