Мы тхыгъэр нахь пасэу къышъуIэкIэзгъахьэ сшIоигъуагъ, ау зыгорэкIэ мыр зыфэгъэхьыгъэм щытхъу лые фасIоу къашIошIын сIоу сегупшысэзэ «Адыгэ макъэм» къэбар гомыIу къисхыгъ: зэлъашIэрэ артистэу КIыкI Юрэ идунай ыхъожьыгъ.

Зэрэартист IэпэIэсагъэр бэмэ ашIэ, ау адыгэ­гъэшхо зэрэхэлъыгъэр зыушэтын амал зиIагъэр мыбэнкIи хъун.

Мыр зыхъугъэр 2018-рэ илъэсым ыкIэхэм адэжь. Къин IофкIэ Мыекъуапэ сикIынышъ, Адыгэкъалэ сыкIон фаеу хъугъэ. ГъогупкIэр автобусыр зыфырэм естынэу сыIухьагъэу, КIыкI Юрэ сауж зэритыр слъэгъугъэ ыкIи титIуми апае гъогупкIэр стыгъэ. Мыщ дэжьым Юрэ гъогупкIэу ежь фэстыгъэр симыгъэштэжьэу уцугъэп. Ары апэу гущыIэгъу сызэрэфэхъугъэр. Пенсиеу къыратырэр зэрэфикъу­рэри, щыIэкIэ-псэукIэу къытфэкIуагъэми тары­гущыIэзэ Пэнэжьыкъуае тынэсыгъ. Автобусым икIы­жьынэу зигъэхьазыры зэхъум къыIуагъ имашинэ Нэшъукъуае зэрэщыIэр; Адыгэкъалэ къэкIонышъ, Мыекъуапэ сыкъыздищэ­жьынэу зэрэхьазырыр. Шъыпкъэр пIощтмэ, сэри адыгагъэр зесхьэ сшIоигъу амалэу сиIэмкIэ. Илъэс пчъагъэкIэ сэщ нахьы­жъыр згъэулэунэу сштэгъахэп, нэшIошIыгъэ хэмылъэу къызэриIуагъэри къэлъагъощтыгъ. «Тхьауе­гъэпсэу» есIуи, тызэбгъо­дэкIыжьыгъ.

Сыгу къеуагъ идунай зэрихъожьыгъэр. Къарыу иIэу, нэщх-гущхэу, цIыф хьалэмэтэу, щыIэныгъэм тегушхукIэу сигукъэкIыжьмэ къахэнагъ.

Зы купмэ алъытэнкIи хъун уадыгэмэ арэущтэу узекIон фаеу, ащ щытхъу Iоф хэмылъэу, шапхъэу. Ащ ехьылIагъэу а мэфэ дэдэм къысэхъулIагъэу щысэ къэсхьын. Адыгэ­къалэ исымэджэщ хьэ­нэ-гъунэ сыкъикIыжьи Мые­къуапэ кIорэ гъогум се­кIу­жьынэу сежьагъ. Ащ фэдизым автомобиль тегъэпсыхьэгъэ пчъагъэ къызблэкIыгъ, къэуцугъэр (Iэ фэсымышIыгъ нахь мышIэми) автомобиль къызэрыкIом исыгъэ кIа­лэу Аскъэлае щыщыр ары. ГущыIэгъу тызызэ­фэхъум, кIалэм къы­Iуагъ гъогум цIыф къызэрэтыримынэрэр.

Шыкур, щыIэх ащ фэдэ цIыфхэр, лъэхъаным емылъытыгъэу адыгагъэр зэрахьэу.

ЕхъулIэ Нурбый. Щынджые щыщ, Мые­къуапэ щэпсэу.