Спектаклэу «Шыу мафэм» тегущыIагъэх
Мыгъэ Урысыем щыпсэурэ лъэпкъхэм яискусствэрэ якультурнэ кIэнрэ я Илъэсэу зэрэхагъэунэфыкIырэм ыкIи Адыгеим къэралыгъо гъэпсыкIэ зигъотыгъэр илъэси 100 зэрэхъугъэм афэгъэхьыгъэ театральнэ хьакIэщ Адыгэ Республикэм и Лъэпкъ тхылъеджапIэ щыIагъ.
Ащ щытегущыIагъэх адыгэ усакIоу Дэрбэ Тимур ипьесэкIэ АР-м искусствэхэмкIэ изаслуженнэ IофышIэшхоу ЕмкIуж Андзор ыгъэуцугъэ спектаклэу «Шыу маф» зыфиIорэм.
Iофтхьабзэм хэлэжьагъэх АР-м и Лъэпкъ театрэу И. Цэим ыцIэ зыхьырэм иартистхэу спектаклэм хэлэжьагъэхэр. Ахэр — роль шъхьаIэхэр къэзышIыгъэхэ Хъуадэкъо Азэмат, Тхьаркъохъо Марджанэт, Ахъмэт Артур, Бэгъушъэ Анзор, Зыхьэ Зуралбый, Хьакъуй Анзаур. Спектаклэм ирежиссерыр ЕмкIуж Андзор. ЗэIукIэгъум къырагъэблэгъагъэх АКъУ-м итарихъ ыкIи июридическэ факультетхэм ащеджэхэрэр, якIэлэегъаджэхэр, искусствэхэмкIэ республикэ колледжэу У. Тхьабысымым ыцIэ зыхьырэм истудентхэр, тхылъеджэ чанхэр, тхылъеджапIэм иIофышIэхэр.
Театральнэ хьакIэщыр къызэIуихыгъ ыкIи зэрищагъ Кучмэз Аминэт.
УсакIоу, АР-м изаслуженнэ журналистэу, АР-м и Къэралыгъо премие литературэмкIэ илауреатэу, журналистикэм ылъэныкъокIэ АР-м и ЛIышъхьэ ишIухьафтын къызыфагъэшъошэгъэ Дэрбэ Тимур пьесэр зэритхыгъэр, ар агъэуцунэу зэрэхъугъэр, IофшIэнышхор зэрэкIуагъэр, спектаклэм уахътэу текIодагъэр, артистхэм яIофшIэкIагъэр, рольхэр зэрэгъэпсыгъэхэр, зэшIуахын алъэкIыгъэр, къадэмыхъугъэр къыIотагъ ЕмкIужь Андзор.
Ащ пстэуми апэу театрэм мэхьанэшхо зэриIэр кIигъэтхъыгъ, Адыгеим и Лъэпкъ театрэ иартистхэм ыпэкIэ Iоф адишIагъэу зэрэщытым гухэлъ ехьыжьагъэр къыгъэпсынкIагъэу ылъытагъ. Апэдэдэ ишъыпкъэу Дэрбэ Тимур итарихъ пьесэу «Бромбергский процесс» зыфиIорэм зэреджагъэр къыIуагъ. Адыгеир загъэпсыгъэр илъэси 100 зэрэхъурэм ипэгъокIэу 2020-рэ илъэсым лъэпкъ драматургиемкIэ зэнэкъокъоу республикэм щызэхащэгъагъэм Тимур ипьесэ апэрэ чIыпIэр къызэрэщыфагъэшъошагъэр ыкIи ар апэрэ шъуашэр зиIэ дипломым илауреат зэрэхъугъэр хигъэунэфыкIыгъ. Ащ епхыгъэу, республикэм ипащэхэми мы пьесэр театрэми щыгъэуцугъэныр игъоу зэралъэгъугъэр къыхигъэщыгъ. Пьесэм еджэзэ, зэкIэ хъурэ-шIэрэр, артистхэу къэзышIын-къизыIотыкIын амал зиIэхэр гукIэ зэригъэнэфагъэхэр, нахь гупсэфэу произведением зеджэжьыгъэ ужым пьесэм игъэуцун зэрэфежьагъэр, роль шъхьаIэр къэзышIыгъэ Хъуадэкъо Азэмат зэрилъэгъоу ыгу зэриштагъэр, ау кIалэр адыгабзэкIэ мыгущыIэу къычIэкIи, ащи адыгабзэр чэщи мафи ямыIэу зэрэрагъэшIагъэр, къызэрагъэгущыIагъэр къыIотагъ. «Шыу мафэм» рольхэр къыщызышIыгъэхэм зэкIэми егугъухэу Iоф зэрашIагъэр, мэзэ пчъагъэ пьесэм игъэуцун зэрэтырагъэкIодагъэр артистхэм къаIуагъ.
Спектаклэр зыгъэуцугъэу ЕмкIуж Андзор зэкIэ мы мурадым изэшIохынкIэ артистхэм, нэмыкIхэм яIорэ-яшIэрэ зэтехьэу, Iоф зэрэзэдашIагъэр хигъэунэфыкIыгъ, ахэм афэрэзагъ.
«Шыу мафэр» псэ къыпыкIи, сценэм къытехьагъ, адыгэ шэн-хабзэр, адыгэ гупшысэр, адыгэ дунэегурыIуакIэр, гъэпсыкIэ-шIыкIэ дахэр — зэкIэ мы пьесэм къыщиIотыкIыгъэ зэрэхъугъэм ишыхьатыр спектаклэм иапэрэ къэгъэлъэгъонэу гъэтхапэм и 20-м, 2022-рэ илъэсым щыIагъэм цIыфыбэ къызэрекIолIагъэр ары.
Творческэ зэIукIэгъум къыщыгущыIагъ роль шъхьаIэр къэзышIыгъэу Хъуадэкъо Азэмат. Сыдрэ Iофи лъэшэу уегугъун зэрэфаер, бзэ лые зэрэщымыIэр, ухэтми убзэ бгъэлъапIэу зэбгъэшIэн зэрэфаер дэгъоу къызэрэгурыIуагъэр, иадыгабзэ къытIупщынымкIэ мэзэ пчъагъэм хъупхъэу Iоф къыдэзышIагъэ пэпчъ, режиссерэу ЕмкIуж Андзор зэрафэразэр къыIуагъ.
Пьесэм хэт пшъэшъэ ныбжьыкIэу Маргрезэ ироль къэзышIыгъэр Тхьаркъохъо Мэрджанэт. Иобраз ыгу нэсэу, игуапэу къызэришIыгъэр, артист пэпчъ ироль лъыIэсынымкIэ ыкIи дэгъоу ыгъэпсынымкIэ ЕмкIуж Андзор зэрэзышъхьамысыжьыгъэр ащ къыIуагъ.
ХьакIэщым къекIолIагъэхэм ащыщхэм упчIэхэр режиссерым ратыгъэх, джэуап зэхэугуфыкIыгъэхэри агъотыгъэх.
Зигъо Iофтхьабзэм гухэлъэу иIагъэр лъэпкъ искусствэр театрэмкIэ къикIыхэзэ, цIыкIуи ини нахь зэлъырагъэшIэгъэныр, спектаклэхэм яплъыхэрэм япчъагъэ хэгъэхъогъэныр, тикультурэ, тишэн-хабзэхэр нахь агъэфедэу, ахэлъэу, къагъэгъунэу, зыщыщ лъэпкъымкIэ гушхоныгъэ ягъэгъотыгъэныр ары.
Мамырыкъо Нуриет.