ЗэкIэми тызэгъус!
Лъэпкъ культурэм ифестиваль къалэу Шъачэ икъэралыгъо университет щыкIуагъ. Студенти 150-м ехъу ащ хэлэжьагъ.
Апшъэрэ еджапIэм икорпус шъхьаIэ студентхэм ашIыгъэ лъэпкъ шхыныгъо зэфэшъхьафхэм якъэгъэлъэгъон къыщызэIуахыгъ. ХьакIэу къычIахьэхэрэм адыгэ кIалэу, пшъашъэу апэгъокIыгъэхэм ащыщых ЛIыфэ Бислъан, КIошъэ Русетэ, Ныбэ Валерий, Щыкъ Алинэ, Кобл Бэллэ, нэмыкIхэр. Адыгэ къуае, щыпс-пIастэ, щэламэ, лэкъумэ, нэмыкI адыгэ шхыныгъохэр зытелъ Iанэ ахэм агъэхьазырыгъ.
— Лъэпкъ зэфэшъхьафыбэм къахэкIыгъэ студентхэр зэгурыIохэу, зэныбджэгъухэу тиуниверситет щеджэх. МэфэкIым зыфагъэхьазырзэ, ахэм ежь— ежьырэу меню зэхагъэуцуагъ ыкIи къэпщэрыхьагъэх. Ны-тыхэри, ныжъ-тыжъхэри къадеIагъэх. Ежьхэм яшхыныгъохэр къызэраупщэрыхьыгъэхэм имызакъоу, нэмыкI лъэпкъхэм къахэкIыгъэу къадеджэхэрэм, яныбджэгъухэм, япшъэшъэгъухэм ахэр зэрэпшIыщтхэр арагъэлъэгъугъ. ГущыIэм пае, урыс Iанэм тетыщтыр ермэлхэм, грузинхэм, адыгэхэм къахэкIыгъэ пшъашъэхэм, кIалэхэм зэдашIыгъ, ермэлхэм яшхыныгъохэм яшIын татархэм, абхъазхэм, осетинхэм ялIыкIохэр хэлэжьагъэх, — къыIуагъ Шъачэ икъэралыгъо университет лъэпкъ зэкъошныгъэмкIэ иклуб ипащэу Анжела Тамразян.
МэфэкIым изэхэщакIохэм къызэраIуагъэмкIэ, концертэу агъэхьазырыгъэм ипрограммэ мыгъэ нахь зырагъэушъомбгъугъ. СыхьатитIум ехъурэ ар кIуагъэ, ныбжьыкIэу хэлэжьагъэхэм лъэпкъ къашъохэр къашIыгъэх, яныдэлъфыбзэкIэ орэдхэр къаIуагъэх.
Хы ШIуцIэ Iушъо шапсыгъэхэм я «Адыгэ Хасэ» итхьаматэу КIакIыхъу Мэджыдэ лъэпкъ культурэм ифестивалэу Шъачэ иуниверситет щыкIуагъэм уасэ къыфишIызэ, ащ ипрограммэ зэрэгъэшIэгъоныгъэр, шIуагъэ къытынэу зэрэгъэпсыгъагъэр къыхигъэщыгъ. Университетым адыгэхэм ыкIи абхъазхэм ялIыкIо ныбжьыкIэу чIэсхэм тапэкIи зэпхыныгъэ зэдыряIэнэу зэзэгъыныгъэ зэдашIыгъ. Творческэ проектэу ахэм къагъэхьазырыхэрэр, кIэщакIо зыфэхъухэрэр пхырыщыгъэнхэмкIэ IэпыIэгъу афэхъунэу шапсыгъэхэм яобщественнэ парламент хьазыр.
НЫБЭ Анзор.