Аслъан ипщынэ егъэжъынчы
ЗэлъашIэрэ пщынаоу, композиторэу ЛIыбзыу Аслъан ипчыхьэзэхахьэхэр тыгъэгъазэм и 6 — 7-м Адыгэ Республикэм и Къэралыгъо филармоние щыкIощтых.
— Концертым артистэу хэлэжьэщтыр макIэп, искусствэр зыгу рихьыхэрэр дгъэгушIохэ тшIоигъу, — къытиIуагъ Адыгэ Республикэм, Къэрэщэе-Щэрджэсым язаслуженнэ артистэу ЛIыбзыу Аслъан.
— АцIэхэр къемыIощтми купхэм тащыгъэгъуазэба?
— Адыгэ Республикэм и Къэралыгъо филармоние иоркестрэ имузыкантхэр, лъэпкъ зэфэшъхьафхэм ащыщ музыкантхэр, республикэм искусствэхэмкIэ иколледжэу Тхьабысымэ Умарэ ыцIэ зыхьырэм щеджэхэрэр, нэмыкIхэри хэлэжьэщтых. Адыгэ Республикэм инароднэ артисткэу Нэхэе Тэмарэ ыгъэсэрэ орэдыIо ныбжьыкIэхэр сигуапэу зэхахьэм къезгъэблэгъагъэх.
— НыбжьыкIэ сэнаущхэм заушэтынымкIэ ащ фэдэ зэхахьэхэр зыгъэсапIэ афэхъух.
— ЗэкIэ концертым хэлэжьэщтхэр артист мыхъунхэкIи пшIэхэщтэп. Концертым зыфагъэхьазырзэ гуетыныгъэу къызыхагъафэрэр щыIэныгъэм шIукIэ къыщятэжьыщтэу сэлъытэ.
— Адыгэмэ зэраIоу, шIэныгъэ лыерэ сэнэхьат лыерэ щыIэп.
— Музыкантхэр, ныбжьыкIэхэр зэIукIэщтых. Адыгэ мэкъамэхэр, лъэпкъхэм яискусствэ ащызэлъашIэрэ орэдхэр, кIэу аусыгъэхэр пчыхьэзэхахьэхэм ащызэхахыщтых. Концертхэр шIукIэ цIыфхэм агу къинэжьыщтых. НыбжьыкIэхэр сэнэхьатэу къыхахыщтым нахь куоу егупшысэщтых.
Тарихъым инэкIубгъохэр
— Пчыхьэзэхахьэм ипроект сыда лъапсэ фэхъугъэр?
— Лъэпкъ искусствэм хэпшIыкIэу зеушъомбгъу. Адыгеим икомпозиторхэу КIубэ Щэбан, Натхъо Джанхъот, нэмыкIхэм аусыгъэхэм ядгъэдэIущтых. МэщбэшIэ Исхьакъ, КъумпIыл Къадырбэч, ЯхъулIэ Сэфэр, Жэнэ Къырымызэ, фэшъхьафхэм ягущыIэхэм атехыгъэ орэдхэр дунаим щэIух. «Ислъамыем» ихудожественнэ пащэу, композиторэу Нэхэе Аслъан ансамблэм пае зэригъэфэгъэ произведениехэр IэкIыб къэралхэм ащашIэх. Тиконцерт дгъэхьазырзэ, адыгэ музыкальнэ искусствэм ихэхъоныгъэхэр къыдэтлъытагъэх.
— Щысэ къэпхьы тшIоигъу.
— Адыгэ мэкъамэхэр пщынэмкIэ, нэмыкI Iэмэ-псымэхэмкIэ къедгъаIохэ зыхъукIэ, хабзэу иIэхэр тэгъэфедэх. Академическэ музыкэм хэушъхьафыкIыгъэ екIолIакIэ фэтэшIы. Ащ нэмыкIэу лъэпкъ музыкальнэ искусствэр дунаим зэрэщашIэрэр къыдэтлъытэзэ, екIолIэкIэ хэхыгъэу фэтшIырэр концертым къыщыдгъэлъэгъощт. Ижъырэ орэдхэр нахь гъэкIэжьыгъэхэу, непэрэ мафэм диштэхэу лъэпкъ зэфэшъхьафхэм зэхядгъэхы тшIоигъу.
— Аслъан, Урысыем ишъолъырхэм, Тыркуем, США-м, Германием, Израиль, Иорданием, Зэхэт Араб Эмиратхэм, нэмыкIхэм уащыIагъ, уипщынэ ымакъэ зэхябгъэхыгъ. Уигухэлъ благъэхэр къытаIоба?
— Тыдэ сыкIуагъэми, адыгэ музыкальнэ искусствэр згъэжъынчы сшIоигъу. Культурэм лъэпкъхэр зэрэзэфищэхэрэр, цIыфыр зэрипIурэр, мамыр щыIакIэр нахь дахэ зэришIырэр сисэнэхьат къыщызгъэлъагъо сшIоигъу. ШэкIогъум и 23-м Адыгэ Республикэм исурэт къэгъэлъэгъуапIэ ситворчествэ ехьылIэгъэ пчыхьэзэхахьэр щыкIощт. Искусствэр зышIогъэшIэгъонхэр къесэгъэблагъэх, згъэгушIохэ сшIоигъу.
— Уимурадхэр Тхьэм къыбдегъэхъух.
— Тхьауегъэпсэу.