«АГУ-Адыиф» Мыекъуапэ — «Динамо-Синара» Волгоград — 26:29 (13:17).

ШэкIогъум и 18-м АР-м испорт Унэшхоу Кобл Якъубэ ыцIэ зыхьырэм щызэдешIагъэх.

Зезыщагъэхэр: А. Мерзлютин, Э. Подставкин.

«АГУ-Адыиф»: къэлэпчъэIутхэр: Якупова, Баскакова — 1, ешIакIохэр: Никулина — 2, Къэбж — 1, Куцевалова — 3, Казиханова — 4, Краснова — 3, Кожубекова — 1, Краснокутская, Кириллова — 3, Морозова — 5, Мещерякова, Вигуржинская — 3, Голунова.

«Динамэм» къыхэщыгъэхэр: Дудкина — 6, Старшова — 4, Безбабных — 4.

ЕшIэгъум иапэрэ едзыгъо «Адыифым» пчъагъэр зэфэдэ ышIыным нахь пэблэгъагъ: 3:4, 4:5, Ю. Кожубековам хъагъэм Iэгуаор редзэ — 5:6. Д. Вигуржинскаяр ухъумакIохэм апхырыкIи, къэлапчъэм Iэгуаор дидзагъ — 6:6. «Динамэр» нахь псынкIэу ешIэзэ, пчъа­гъэм хегъахъо — 6:8, 7:9, 9:10. Д. Вигуржинскаяр ухъумакIохэм ябэнызэ хъагъэм Iэгуаор ридзагъ — 10:12.

Гупчэм щешIэхэрэ Т. Кирилловам, С. Мо­розовам ухъумакIохэм аIэкIэкIынхэм фэшI шIыкIэшIухэр къагъотых, къэлапчъэм псынкIэу даох. Д. Казихановар къогъупэм ще­шIэхэрэм къахэщы, хъагъэм Iэгуаор редзэ. А. Красновар загъорэ хэукъоми, хъагъэм Iэгуаор ридзэзэ щысэ къегъэлъагъо. А. Куцеваловар гупчэм итэу псынкIэу ыпэкIэ илъызэ къэлапчъэм лъэшэу дао, пчъагъэм хегъахъо.

«Адыифыр» шIыкIабэмэ алъыхъущтыгъэми, «Динамэр» нахь зэгъэфагъэу ешIэщтыгъ. А. Старшовар, В. Семинар, О. Горячевар, фэшъхьафхэри яIэпэIэсэныгъэкIэ къахэщыщтыгъэх. Мыекъуапэ щапIугъэ Мария Дувакинар «Динамэм» икъэлэпчъэ­Iутэу ешIагъ.

Аужырэ такъикъхэм Л. Баскаковам, Д. Ка­зихановам, А. Куцеваловам «Динамэм» икъэлапчъэ Iэгуаор дадзагъ. Людмила Баскаковар тикъэлапчъэ Iутэу «Динамэм» икъэлэпчъэIут ешIакIокIэ зэрэзэблахъугъэр зелъэгъум, лъэшэу Iэгуаор ыдзи, хъагъэм ригъэфагъ. Ащ фэдэ ешIакIэм зэнэкъокъур къегъэдахэ, ау текIоныгъэр «Адыифым» къыдихыным фэшI зыдешIэрэр къыдилъытэзэ нэмыкI амалхэри ыгъэфедэнхэ фае.

ШэкIогъум и 20-м «Адыифыр» «Астраханочка» Астрахань Мыекъуапэ щыIукIагъ, пчъагъэр 27:33-рэ.