Малыч
ЛIыр лIэу мэлIэжьы. (ГущыIэжъ)
Тарихъ шIэныгъэхэмкIэ докторэу, профессорэу, общественнэ IофшIэкIошхоу, Адыгэ Республикэм ыкIи Пшызэ шIэныгъэмкIэ язаслуженнэ IофышIэшхоу, (АМАН-м) ШIэныгъэхэмкIэ Дунэе Адыгэ академием иакадемикэу, Хэгъэгу зэошхом иветеранэу Аулъэ Малыч къызыхъугъэр илъэси 105-рэ хъугъэ.
Адыгеим игъэсэныгъэ системэ ыпэкIэ лъызыгъэкIотагъэу, хэгъэгу ыкIи лъэпкъ шIэныгъэм зиIахь ин хэзылъхьагъэу, Родинэр Хэгъэгу зэошхом илъэхъан фашизмэм щызыухъумагъэу, щыIэныгъэ лъэныкъуабэмкIэ Iофышхо зылэжьыгъэ Аулъэ Малыч илъэгъо зэныбжь зэ рыплъэжьыгъэныр игъоу тлъытагъэ.
Еджэныр, IофшIэныр
Аулъэ Малыч Шэуджэн районым ит абдзэхэ къоджэ закъоу Хьакурынэхьаблэ шэкIогъум и 8-м, 1917-рэ илъэсым къыщыхъугъ. Ятэу Хьайсэ сабыир илъэс мыхъугъэу тифым илIыкIыгъ. Янэу Гощэунае ытыщ къэкIожьи, кIэлэцIыкIур янэрэ янэшэу Мосэрэ зэдапIугъ. Сабый дышъэу, ишIэ шIэгъошIоу къэтэджыгъ. Янэу Гощэунае бзылъфыгъэ Iушыгъ, нэхъой ин хэлъыгъ, IофшIэкIошхуагъ, КъурIаным еджэщтыгъ, нэмаз ышIыщтыгъ. Исабыйи тхьэшIошъхъуныгъэ хилъхьэмэ шIоигъуагъ, ары къоджэ медрысэм илъэси 5 – 6 нахь ымыныбжьэу Малыч зыкIычIагъэхьагъэри. Шъэожъые сэнаущыр пIэлъэ кIэкIым КъурIаным дэгъоу къеджэ хъугъэ, ар щэгъогогъо зыджыгъэм медрысэр къыухыгъэкIэ алъытэщтыгъ. Арапыбзэр зэрэзэригъэшIагъэр нэужым Малыч къыфэфедэжьыгъ.
Янэшэу Мосэ ихьакIэщ цIыфкIопIагъ. Пчыхьэрэ ащ къэбархэм, тхыдэхэм, таурыхъхэм, нарт хъишъэхэм, орэдыжъхэм ащядэIуныр кIэлэцIыкIум икIэсагъ, ежьыри бэ езбырэу къыIонэу ышIэ хъугъэр. Къоджэ ублэпIэ еджапIэм Малыч щеджагъ, адыгабзэр, урысыбзэр, хьисапыр щарагъашIэщтыгъ. Ау янэш Мосэм къыгурыIощтыгъ урысыбзэр дэгъоу бгъэфедэн плъэкIынэу пIэ къихьаным имэхьанэ. Малыч янэшхэу Мосэрэ Гъазэлыерэ яныбджэгъу благъэу, къэзэкъэу Лукьян Осипович Ларионовыр станицэу Щэгъумэ (Темиргоевскэм) иунагъокIэ дэсыгъ. Бын-унэгъо Iужъу дэхагъ, Iэдэбхэу, зэрэлъытэхэу. Ахэм адэжь кIалэр Мосэ ыщагъ, ублэпIэ еджапIэм Малыч ащ щычIагъэхьагъ. Апэрэ илъэс еджэгъур кIэлэцIыкIум къыфэкъиныгъэми, ятIонэрэ илъэсым иеджэнкIи, изекIокIэ-шIыкIэкIи Малыч илэгъухэм къахэщы хъугъэ. Класси 5-р ащ къыщиухыгъ. Мы станицэм зыщыIэгъэ уахътэр ыужыкIэ бэрэ игукъэкIыжьхэм къахэфэ Аулъэм, апэрэ гъэсэныгъэ лъэбэкъур ащ щидзыгъ. Малыч Адыгэ кIэлэегъэджэ техникумэу Краснодар дэтыгъэм щеджагъ. Еджэныр лъэшэу ащ икIэсагъ, урыс классикэм фэщэгъагъ, общественнэ Iофхэми чанэу сыдигъокIи ахэлажьэщтыгъ. Апшъэрэ еджэпIэшхом — Краснодар кIэлэегъэджэ институтым ифизикэ-хьисап факультет щеджэзэ, Яблоновскэм дэт консервышI заводым ипчыхьэ школэ рабочхэри щыригъэджагъэх. Институтыр дэгъу дэдэу къызеухым, хэкуоном пIэлъэ кIэкIым, етIанэ Пэнэжьыкъое гурыт еджапIэм, станицэу Джаджэм физикэмрэ хьисапымрэкIэ кIэлэегъаджэу Iоф ащишIагъ. 1939-рэ илъэсым Фэдз гурыт еджапIэм идиректорэу агъэнэфагъ.
Дзэ къулыкъур
Аулъэ Малыч шэкIогъум и 19-м, 1939-рэ илъэсым Дзэ Плъыжьым ащагъ. Ащ къыщыкIэдзагъэу илъэс 13-м къулыкъур ыхьыгъ. Хэгъэгу зэошхом гугъэ нэфхэр къызэпыригъэзагъэх.
Малыч ащ Iоныгъо мазэм, 1941-рэ илъэсым къыщегъэжьагъэу хэтыгъ, минометнэ ротэм иполитрукыгъ. Москва дэжь щыкIогъэ зэо зэпэуцужьым зыхэлажьэм псэемыблэжьныгъэу, лIыгъэу зэрихьагъэм афэшI Быракъ Плъыжьым иорден къыфагъэшъошэнэу къагъэлъэгъогъагъ, ау къыратыгъэр медалэу «За Отвагу» зыфиIорэр ары. Апэрэ гвардейскэ мотострелковэ Московскэ дивизием ия 6-рэ гвардейскэ мотострелковэ полк ипартбюро исекретарэу хадзыгъагъ. Зэо лъэхъаным батальоным ивоенкомэу, апэрэ гвардейскэ мотострелковэ полкым идзэ комиссарэу щытыгъ. Аулъэ Малыч Украинэм, КъохьэпIэ ыкIи КъыблэКъохьэпIэ фронтхэм ащыкIогъэ заохэм ахэтыгъ. Хэгъэгу зэошхор Малыч подполковникэу ыухыгъ.
1942-рэ ыкIи 1947-рэ илъэсхэм Дзэ-политическэ академиеу В. И. Лениным ыцIэ зыхьырэм ислушателыгъ, 1947-м ыкIэм къыщыублагъэу Iоныгъом, 1949-рэ илъэсым нэс дзэ еджэпIэ зэфэшъхьафхэм якIэлэегъэджагъ, 1949-м къыщегъэжьагъэу жъоныгъуакIэм, 1954-рэ илъэсым нэс дзэ-политическэ академием икIэлэегъэджагъ. Хэгъэгу зэошхом ТекIоныгъэр къыщыдэхыгъэным иIахьышIу зэрэхилъхьагъэм пае Хэгъэгу зэошхом иорденэу я II-рэ шъуашэ зиIэр, медалэу «За Отвагу» къыфагъэшъошагъэх. Зэо ужым зэлъашIэрэ шIэныгъэлэжь хъугъэ, ащ икъэлэмыпэ уасэ зиIэ шIэныгъэ IофшIэгъабэ къычIэкIыгъ. Тарихъыр зэраригъашIэрэр, зэритхырэ закъор арымырэу, ышъхьэкIэ а хъугъэ-шIагъэхэм ахэлэжьагъ. Дзэ академием диссертациер къыщигъэшъыпкъэжьыгъ, тарихъ шIэныгъэхэмкIэ кандидат хъугъэ.
Адыгэ хэкум къызегъэзэжьым, Адыгэ шIэныгъэ-ушэтэкIо институтым (АНИИ-м) пащэ фашIыгъ, 1954 — 1967-хэм ащ идиректорыгъ. Лъэпкъ кадрэхэм ягъэхьазырынкIэ, шIэныгъэ тхыгъэхэр къыхэутыгъэнхэмкIэ Iофышхо зэшIуихыгъ. 1967-рэ илъэсым къыщегъэжьагъэу Краснодар политехинститутым тарихъымкIэ икафедрэ икIэлэегъэджагъ, илъэс 30 Iоф щишIагъ, студентхэм якIэсагъ, иIофшIэгъухэм агъэлъапIэщтыгъ. 1987-рэ илъэсым тарихъымкIэ докторскэ диссертациер Аулъэ Малыч къыушыхьатыгъ. Бэрэ ар Мыекъуапэ къакIощтыгъ, адыгэ лъэпкъым къэралыгъо гъэпсыкIэ егъэгъотыгъэным иакъыл-гупшысэ Iахь ин хилъхьагъ, итарихъ шIэныгъэ IофшIагъэхэм адыгэм игъогу уращэ, ар къыпфызэхафы. ШIэныгъэшхорэ цIыфыгъэ дахэрэ хэлъыгъ, интеллигент шъыпкъагъ.
Бэдзэогъум и 14-м, 2001-рэ илъэсым М. Хь. Аулъэм идунай ыхъожьыгъ, щыIэныгъэм лъэуж дахэ къыщигъэнагъ.
Мамырыкъо Нуриет.