Апэрэу Мыекъуапэ щызэхащагъ
Академическэ музыкэм и Дунэе фестивалэу «Музыкальнэ Адыгеир» апэрэу тиреспубликэ щыкIуагъ.
Адыгэ Республикэм и Къэралыгъо филармоние щызэхащэгъэ пчыхьэзэхахьэм АР-м культурэмкIэ иминистрэ иапэрэ гуадзэу Ольга Гавшинар ти ЛIышъхьэу КъумпIыл Мурат, Правительствэм ацIэкIэ къыщыгущыIагъ. Дунэе фестивалым лъэпкъхэр зэрэзэфищэхэрэр, музыкальнэ искусствэм хэхъоныгъэ ышIыным фестивалыр зэрэфэIорышIэрэр хигъэунэфыкIыгъэх.
Урысыем икомпозиторхэм я Союз и Правление итхьаматэу Рашид Калимуллиныр фестивалым хэлажьэхэрэм къафэгушIуагъ. Адыгеим икомпозиторхэм я Союз итхьаматэу Нэхэе Аслъан иIофшIагъэ осэ ин къыфишIыгъ, композиторхэм я Союз и Щытхъу тхылъ къыфигъэшъошагъ.
Урысыем инароднэ артистэу, фестивалым изэхэщэкIо куп хэтэу Нэхэе Аслъан пчыхьэзэхахьэм къыщыгущыIагъ.
АР-м и Къэралыгъо филармоние исимфоническэ оркестрэ композиторхэу Нэхэе Аслъан, ХьаIупэ Джэбраил, Тото Аджапуа, Владимир Качесовым, Мехеди Хосейни, Владимир Курьяновым, Къэбэрдэкъо Мурат, Рустам Абдуллаевым япроизведениехэр пчыхьэзэхахьэм къыщыригъэIуагъэх.
Адыгеим, Къэбэртэе-Бэлъкъарым, Абхъазым, Москва, Иран, Белоруссием, Узбекистан якомпозиторхэм аусыгъэ произведениехэр зыгъэжъынчыгъэхэ оркестрэм пэщэныгъэ дызэрахьагъ дирижерхэу Темыркъэнэ Петр, Аркадий Хуснияровым, СтIашъу Къэплъан.
Р. Калимуллиным иконцерт
Урысыем, Татарстан янароднэ артистэу, Адыгэ Республикэм искусствэхэмкIэ изаслуженнэ IофышIэшхоу, композиторэу Рашид Калимуллиным итворчествэ фэгъэхьыгъэ концертыр Адыгэ Республикэм и Къэралыгъо филармоние щыкIуагъ.
Симфоническэ оркестрэм пае Р. Калимуллиным ыусыгъэ поэмэу «Аслъан» зыфиIорэмкIэ концертыр къызэIуахыгъ. Урысыем, Адыгеим янароднэ артистэу, композиторэу Нэхэе Аслъан фэгъэхьыгъэ произведениер оркестрэм ыгъэжъынчыгъ.
Симфоническэ къашъохэу «Баллада», «Адажио», «Танго», «Вальс», «ГумэкIыгъо пчэдыжь», «Казань итарихъхэр» зыфиIохэрэр оркестрэм къыригъэIуагъэх. Скрипкэм оркестрэр игъусэу едзыгъуи 3 хъурэ произведениер концертым щыIугъ. Дунэе фестиваль-зэнэкъокъухэм щытхъуцIэхэр къащыдэзыхыгъэу, Москва къикIыгъэ артистэу Станислав Малышевым скрипкэмкIэ орэдышъор къыригъэIуагъ.
Адыгэ Республикэм культурэмкIэ иминистрэ иапэрэ гуадзэу Ольга Гавшинар, АР-м культурэмкIэ и Министерствэ иотдел ипащэу Шэуджэн Бэлэ, композиторэу Нэхэе Аслъан, Урысыем культурэмкIэ изаслуженнэ IофышIэу Хъот Заур, симфоническэ оркестрэм идирижер шъхьаIэу Аркадий Хуснияровыр, Урысыем изаслуженнэ артисткэу ХъокIо Сусан, Адыгеим иансамблэ цIэрыIоу «Ислъамыер», АР-м и Къэралыгъо филармоние ипащэу Къулэ Мыхьамэт, композиторхэу ХьаIупэ Джэбрэил, Къэбэрдэкъо Мурат, фэшъхьафхэри Рашид Калимуллиным фэгушIуагъэх. Фестивалым изэхэщакIохэм, концертым еплъыгъэхэм Р. Калимуллиным «тхьашъуегъэпсэу» къариIожьыгъ.
Адыгэ Республикэм искусствэхэмкIэ иколледжэу У. Тхьабысымэм ыцIэ зыхьырэм тыгъуасэ фестивалыр щызэфашIыжьыгъ. Адыгеим, Къэбэртэе-Бэлъкъарым якомпозиторхэу Нэхэе Аслъан, Тхьабысымэ Умарэ, КIыкI Хьисэ, Анзэрэкъо Чеслав, КIыргъ Юрэ, Сэмэгу Гощнагъо, ХьаIупэ Джэбраил, ЖэнэлI Светланэ аусыгъэхэр оркестрэм къыригъэIуагъэх.