Плъэгъурэр гум къенэжьы
Къэралыгъо тарихъ-архитектурнэ ыкIи художественнэ музей-заповедникэу «Казань икремль» зыфиIорэм Адыгэ Республикэм и Лъэпкъ музей икъэгъэлъэгъон къыщызэIуахыгъ.
Пэсэрэ лъэхъаным къыщегъэжьагъэу щыIэкIакIэм нэс адыгэхэм Iашэу агъэфедэщтыгъэм ехьылIэгъэ къэгъэлъэгъоныр Лъэпкъ проектэу «Культурэм» илъэныкъоу «Творческэ цIыфхэм» щыщ. — Пкъыгъо 200-м нахьыбэ къэтэгъэлъагъо, — къыIуагъ Адыгэ Республикэм и Лъэпкъ музей ипащэу Джыгунэ Фатимэ. — Тиэрэ ыпэкIэ я VIII-рэ лIэшIэгъум къыщыублагъэу я ХХI-рэ лIэшIэгъум нэс адыгэ дзэкIолIым, шыу шъуашэу яIагъэм, Iашэу агъэфедэщтыгъэм тикъэгъэлъэгъон афэгъэхьыгъ.
Кавказ и Темыр-КъохьапIэ щыпсэурэ адыгэхэм ядзэ-политикэ къэгъэлъэгъоным ущегъэгъуазэ. Лъэпкъым зыкъиухъумэным, шъхьафитэу щыIэным афэшI Iофыгъо хэхыгъэхэр зэрихьэщтыгъэх. Шыухэм шэн-хабзэу яIагъэхэм яшIуагъэкIэ дзэ къулыкъум ялъэпкъэгъухэр фагъасэщтыгъэх, пIуныгъэ амалхэр нахьышIоу щыIэныгъэм щыпхыращыщтыгъэх.
Археологием итарихъ пкъыгъохэм ащыщых маисэ зэолIмэ яощ, пчыпыджынышъхьэхэр, щэбзащэхэр, чатэхэр, къамэхэр. Шыум ишъуашэ, ижъырэ сэшхоу дышъэпскIэ гъэкIэрэкIагъэр, ижъырэ къэлатхэр, адыгэ ашъоджанэхэр, фэшъхьафхэри ятеплъэкIэ гъэшIэгъоных.
— ДзэкIолIым иашъоджанэ гъэпсыкIэ шъхьаф иIагъ, — къытиIуагъ АР-м и Лъэпкъ музей шIэныгъэмкIэ иIофышIэ шъхьаIэу, археолог цIэрыIоу Тэу Аслъан. – ГъукIэм ашъоджанэр ышIы зыхъукIэ ипшъашъэ IэпыIэгъу къыфэхъущтыгъ, пшъашъэм ыIапэхэр фэIэпэIасэу ыгъэIорышIэщтыгъэх.
Зэфэхьысыжьхэр
— Адыгеим фэгъэхьыгъэ къэгъэлъэгъоныр апэрэу Казань щызэхащагъ, — къеIуатэ Адыгэ Республикэм и Лъэпкъ музей ипащэ игуадзэу Шэуджэн Налмэс. —Музеим иIофышIэхэу Сихьаджэкъо Иринэ, Псэунэ Саидэ, Бжьэц Замирэ сигъусэхэу Татарстан икъэлэ шъхьаIэ тыщыIагъ. Къэгъэлъэгъоныр тэ тызэрэфаеу зэдгъэфагъ. Интернетыр агъэфеди, Казань культурэмкIэ икъулыкъушIэхэм Адыгеим и Лъэпкъ музей макъэ къырагъэIуи тырагъэблэгъагъ.
Адыгеим ращыгъэ тарихъ пкъыгъохэр Казань нагъэсынхэм фэшI транспортым, мылъкум япхыгъэ Iофыгъохэр Татарстан икъулыкъушIэхэм зэшIуахыгъэх.
— Бысымхэр Казань дэгъоу къыщытпэгъокIыгъэх. ШIэжьым, щытхъум япхыгъэ чIыпIэхэр тагъэлъэгъугъэх. Спорт псэолъэ гъэшIэгъонэу яIэхэр тыгу рихьыгъэх. Казань идэхагъэ гущыIэкIэ къэIотэгъуае, урамхэм уарыкIон, къалэр плъэгъун фае. Адыгеим итщыгъэ пкъыгъохэр къэгъэлъэгъоным фэдгъэхьазырынхэу тызыфежьэм, культурэм иIофышIэхэр IэпыIэгъу къызэрэтфэхъугъэхэр хэушъхьафыкIыгъэу къыхэзгъэщыхэ, гъэзетымкIи «тхьашъуегъэпсэу» ясIожьы сшIоигъу, — къытиIуагъ АР-м и Лъэпкъ музей икъулыкъушIэ шъхьаIэу Сихьаджэкъо Иринэ.
Нэм ылъэгъурэр гум ешъхьапэ. Адыгэхэм яIашэхэм яхьылIэгъэ къэгъэлъэгъоным еплъыхэрэм тарихъыр нахьышIоу зэрагъашIэ. Татарстанрэ Адыгеимрэ язэпхыныгъэ гъэпытэгъэнымкIэ къэгъэлъэгъоным изэхэщэн хэлэжьагъэхэм Iофышхо агъэцэкIагъ.
Мыгъэ Урысыем щыпсэурэ лъэпкъхэм яискусствэрэ якультурнэ кIэнрэ я Илъэс. Татарстан культурэмкIэ иIофышIэхэр кIэщакIо зыфэхъугъэхэ къэгъэлъэгъоным зиушъомбгъущт. Урысыем инэмыкI шъолъырхэм Адыгеим ехьылIэгъэ тарихъ, культурнэ пкъыгъохэр къащагъэлъэгъощтых.
— Адыгэ Республикэм культурэмкIэ и Министерствэ зэхэщэн IофыгъохэмкIэ ишIогъэшхо къытегъэкIы, — тизэдэгущыIэгъу лъегъэкIуатэ Шэуджэн Налмэс. — Унэшъо хэхыгъэу итхъухьагъэхэр щыIэныгъэм тапэкIи щыпхырытщыщтых.
2023-рэ илъэсым мэлылъфэгъум и 16-м нэс къэгъэлъэгъоныр Казань щыкIощт.