Адыгеир хэлажьэ
Урысыем иныбжьыкIэхэм атлетикэ онтэгъумкIэ язэнэкъокъу шэкIогъум и 15 — 18-м къалэу Тулэ щызэхащэщт.
Илъэс 20-м нэс зыныбжьхэр щылычым ебэныщтых. Адыгэ Республикэм атлетикэ онтэгъумкIэ ихэшыпыкIыгъэ командэ зэIукIэгъухэм ахэлажьэ.
— ПчыхьэкIэ Амир, ЩашIэ Рустам, Артем Горловыр, Вячеслав Панкратовыр, Артем Казаковыр тихэшыпыкIыгъэ командэ хэтых, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Адыгеим испортсменхэм зэнэкъокъум яшъыпкъэу зыфагъэхьазырыгъ, медальхэм афэбэнэщтых.
Сихъу Рэмэзан Адыгэ Республикэм ибатыр ныбжьыкIэхэм ягъусэу къалэу Тулэ щыI. Хэгъэгум ибатыр ныбжьыкIэхэм яухьазырыныгъэ зэраушэтырэм лъэплъэ. Зэнэкъокъум икIэух тыщигъэгъозэнэу тызэзэгъыгъ.