Абрам Агамирян фэгъэхьыгъ
Урысыем спортымкIэ изаслуженнэ мастерэу Абрам Агамирян ыцIэкIэ агъэнэфэгъэ шIухьафтынхэм якъыдэхын фэгъэхьыгъэ зэнэкъокъур Курганинскэ щыкIуагъ.
Дунаим, Европэм язэнэкъокъухэм апэрэ чIыпIэхэр къащызыхьыгъэ Абрам Агамирян Мыекъопэ бэнэпIэ еджапIэм щапIугъ, иапэрэ тренерыр Николай Нефедов. Къызыщыхъугъэ Курганинскэ щызэхащэгъэ зэIукIэгъухэм Урысыем ишъолъырхэм къарыкIыгъэ бэнакIохэр ахэлэжьагъэх. Апэрэ чIыпIэхэр къыдэзыхыгъэхэм Урысыем спортымкIэ имастер хъунхэмкIэ шапхъэхэр рагъэкъугъэх.
Адыгэ Республикэм самбэмкIэ испорт-еджапIэ ипащэу, спортымкIэ дунэе класс зиIэ мастерэу Делэкъо Адам къытиIуагъ тибэнакIохэм ухьазырыныгъэ дэгъу къызэрагъэлъэгъуагъэр.
Мэлгощ Адам, кг 58-рэ, апэрэ чIыпIэр къыхьыгъ, Урысыем спортымкIэ имастер хъунымкIэ шапхъэхэр ригъэкъугъэх. Нарт шъаор тренерхэу Делэкъо Адам, Гъомлэшк Алый агъасэ, Адыгэ къэралыгъо университетым и Мыекъопэ къэралыгъо гуманитарнэ-техническэ колледж щеджэ.
Нащэ Расул, кг 71-рэ, ЛIыIужъу Азмэт, кг 98-рэ, апэрэ чIыпIэхэр къыдахыгъэх. Тренерхэу Джарымэкъо Рустамрэ Джарымэкъо Азмэтрэ дышъэр къэзыхьыгъэхэм япащэх.
НакI Айдэмыр, кг 71-рэ, ятIонэрэ чIыпIэр къыфагъэшъошагъ. Ащ итренерых Делэкъо Адамрэ Джарымэкъо Рустамрэ.
Кобл Рэмэзан, кг 58-рэ, Гъомлэшк Анзор, кг 64-рэ, Бэгъ Тимур, кг 71-рэ, Хьакъуй Амир, кг 79-рэ, Ингъуш Владимир, кг 98-рэ, ящэнэрэ чIыпIэхэр къыдахыгъэх. БэнакIохэр тренерхэу Джарымэкъо Рустам, Джарымэкъо Азмэт, Делэкъо Адам, Гъомлэшк Алый, Бастэ Сэлым, Нэпсэу Бислъан агъасэх.
ХагъэунэфыкIырэ чIыпIэхэр къыдэзыхыгъэхэм, спортымкIэ мастер хъугъэ Мэлгощ Адам, тренерхэм тафэгушIо.