«Динамо-МГТУ» Мыекъуапэ — «Нефтехимик» Тобольск — 76:66 (20:7, 21:15, 17:22, 18:22). ШэкIогъум и 13-м спорт Унэшхоу «Ошъутенэм» щызэдешIагъэх.

«Динамо-МГТУ»: Кочнев — 12, Милютин — 21, Гапошин — 19, Александров — 8, Чичайкин — 9, Рябов — 7, Суслов, Чаленко.

«Нефтехимикым» къыхэщы­гъэ­хэр: Лаптев — 10, Бондаренко — 14, Мишалов — 10.

«БАРС-РГЭУ-м» ятIонэрэ ешIэгъур «Динамо-МГТУ-м» шIуи­хьыгъ. ТиешIакIохэм зичэзыу зэIукIэгъум дэгъоу зыфагъэхьазырыгъ, текIоныгъэр къыдахыгъ.

«БАРС-РГЭУ-р» апэрэ чIыпIэм фэбанэ. Ащ фэдэ командэ лъэ­шым «Динамо-МГТУ-р» зэ зэрэтекIуагъэр гъэхъагъэкIэ фэтэ­лъэгъу.

ЯтIонэрэ зэIукIэгъур

«Динамо-МГТУ» — «Нефтехимик» — 85:66 (18:25, 33:I1, 15:11, 19:20). ШэкIогъум и 14-м «Ошъутенэм» щызэдешIагъэх. «Динамо-МГТУ»: Кочнев — 21, Милютин — 11, Гапошин — 20, Александров — 15, Чичайкин — 9, Горохов, НатIэкъу, Чаленко, Рябов — 8, Суслов — 1. «Нефтехимикым» къыхэщыгъэхэр: Лаптев — 21, Муха — 13.

Апэрэ едзыгъом «Нефтехимик» иешIакIохэр бэрэ апэкIэ илъы­гъэх. Хъагъэм Iэгуаор анахьыбэрэ изыдзэщтыгъэмэ Лаптевыр къахэ­щыщтыгъ. ЯтIонэрэ едзыгъом «Динамо-МГТУ-м» ухъумэн Iофыгъохэр нахь дэгъоу ыгъэцакIэхэзэ хъурджанэм Iэгуаор ридзэу ригъэжьагъ. «Нефтехимик» ащ фэдэ ешIакIэм фэмыхьазырэу къэлъагъощтыгъ.

«Динамо-МГТУ-р» нахь шъуамбгъоу зэрешIэрэм ишIуагъэкIэ хьакIэхэм якомандэ ыпэ ишъыгъ. ТекIоныгъэр къызэрэдихыщтым щэч хэлъыгъэп. Тренер шъхьаIэу Андрей Синельниковым нахь ныбжьыкIэхэу Гороховыр, НатIэ­къор, Чаленкэр ешIапIэм къыригъэхьагъэх. Хъагъэм Iэгуаор ра­дзэн амылъэкIыгъэми, зэIукIэгъур шIукIэ къятэжьынэу тагъэгугъэ.

Пресс-зэIукIэр

— «Нефтехимикым» тIогъогогъо къызэрэшIотхьыгъэм мэхьанэ хэхыгъэ иI. Апэ ишъы зышIоигъо командэхэм ар ащыщ. Артем Гапошиныр, Илья Александровыр, Владимир Чичайкиныр, Юрий Кочневыр, Александр Милютиныр зэхэщэн IофыгъохэмкIи, хъагъэм Iэгуаор радзэнымкIи щысэ атепхы­нэу ешIагъэх, къытиIуагъ «Динамо-МГТУ-м» итренер шъхьа­Iэу, Адыгэ Республикэм изаслуженнэ тренерэу Андрей Синельниковым.

ЧIыпIэу зыдэщытхэр

Апшъэрэ купым хэт баскетбол командэ пэпчъ зэIукIэгъуи 8 мыгъэ иIагъ. ЧIыпIэу зыдэщытхэм, очко пчъагъэу яIэм шъуащытэ­гъэгъуазэ.

1. «Динамо-МГТУ» — 15 2. «ЧелБаскет» — 14 3. «БАРС-РГЭУ» — 14 4. «Южный слон» — 12 5. «Нефтехимик» — 12 6. «Металлург» — 11 7. «Чеб. Ястребы» — 9 8. «РПФ-Университет» — 9. ШэкIогъум и 25 — 26-м «Динамо-МГТУ-р» «Металлург» Магнитогорск Мыекъуапэ щыIукIэщт.