«Динамо-МГТУ» Мыекъуапэ — «Барс-РГЭУ» Ростов-на-Дону – 76:71 (16:22, 22:20, 17:22, 21:7).

ШэкIогъум и 9-м АР-м испорт Унэшхоу «Ошъутенэм» щызэIукIагъэх.

«Динамо-МГТУ»: Чичайкин — 19, Александров — 13, Гапошин — 28, Милютин, Кочнев — 16, Рябов, Суслов, Чаленко, Горохов.

«БАРС-РГЭУ-м» къыхэщы­гъэхэр: Гусак — 23, Флис —16, Матвеев — 10. ЗэIукIэгъум пчъагъэр зэрэщылъыкIотэрэ шIыкIэм тигъэгумэкIыщтыгъ: 1:11, 4:13, 13:22. ЯтIонэрэ едзыгъом А. Гапошиным, И. Александровым, Ю. Кочневым, нэмыкIхэм хъагъэм Iэгуаор радзагъ, пчъагъэр 27:30 хъугъэ. Тикомандэ тигъэгугъэщтыгъэми, хьакIэхэм яешIакIохэу В. Гусак, Я. Стрижеус, фэшъхьафхэм очкоуи 3 дзыгъохэр дэгъоу агъэцакIэх, пчъагъэм хагъахъо — 38:51.

ТиухъумакIохэр пхъашэу «БАРС­-РГЭУ-м» пэуцухэрэп. ХьакIэхэм гуфит-шъхьафитэу хъагъэм Iэгуаор радзэ, хъурджанэм ычIэгъ дэгъоу щэбанэх, псынкIэу зэгурэIох. Пчъагъэр тифедэп — 40:56. Адыгэ Республикэм и ЛIы­шъхьэу КъумпIыл Мурат, Уры­сыем IофшIэнымкIэ и ЛIыхъужъэу МэщбэшIэ Исхьакъ ешIапIэм къычIэхьагъэхэу зэнэкъо­къум зэреплъыхэрэр дикторым мэкъэ IэтыгъэкIэ къыIуагъ. Мые­къопэ къэралыгъо технологическэ университетым иректорэу Къуижъ Саидэ, ащ игуадзэхэр, студентхэр бэ хъухэу ешIэгъум лъэплъэх, «Динамо-МГТУ-м» Iэгу фытеох, гъэхъагъэ ышIынэу еджэх, быракъхэр залым ща­гъэбыбатэх.

ТиешIакIохэм зэкIэлъыкIоу хъагъэм Iэгуаор радзэ. А. Гапошиным, В. Чичайкиным, нэмыкI­хэм яIэпэIэсэныгъэкIэ тагъэ­гугъэ, пчъагъэр 55:60 хъугъэ, ау Я. Стрижеус Iэгуаор къызыIэ­кIахьэм, тиухъумакIохэр ыгъэ­плъэхъугъэх — 55:62. Ащ ыуж гумэкIыгъом къыкIичырэп: 56:64, 60:67. А. Гапошиныр аIэкIэкIи, дахэу хъагъэм Iэгуаор ридзагъ — 64:69. Ю. Кочневым тIогъогогъо пчъагъэм хегъахъо — 71:71, къэнагъэр зы такъикъ. СпортымкIэ дунэе класс зиIэ мастерэу Илья Александровыр хъурджанэм пэчыжьэу хъагъэм Iэгуаор ридзагъ — 74:71. ХьакIэхэр гуIэм хэтхэу апэкIэ къилъыгъэх, ау тиухъумакIохэм ашIокIыхэрэп, шапхъэр аукъозэ уахътэр къы­зы­фагъэфедэ. Ю. Кочневым хъур­джанэм пэблагъэу Iэгуаор къызыIэкIахьэм, къин химылъагъоу пчъагъэм зыхегъахъом, текIоныгъэр къыдэзыхыщтыр къэнэфагъ.

Зэнэкъокъум еплъыгъэхэр «Динамо-МГТУ-м» фэгушIуагъэх, Iэгу фытеуагъэх, тиспортсменхэм агоуцохэзэ сурэтхэр атыра­хыгъэх.

Пресс-зэIукIэр

— Ростов-на-Дону икомандэ апэрэ чIыпIэм фэбанэ, ешIэкIо дэгъухэр хэтых. Артем Гапошиныр, Илья Александровыр, Юрий Кочневыр нахь къахэсэгъэщых, нэмыкI ешIакIохэм тафэраз. Тобольскэ икомандэ, фэшъхьафхэм шIэхэу тадешIэщт, текIоныгъэм тыфэбэнэщт, — къытиIуагъ «Динамо-МГТУ-м» итренер шъхьа­Iэу, Адыгэ Республикэм изаслуженнэ тренерэу Андрей Си­нельниковым.

2022 — 2023-рэ илъэс зэнэ­къокъум тикомандэ ешIэгъуи 5 иIагъ, зэкIэми текIоныгъэр къащыдихыгъ.