«Илажьэп»
ЗэлъашIэрэ режиссерэу ЕмкIуж Андзор художественнэ фильмэу «Невиновен 2» зыфиIорэр джырэ уахътэм тырехы. Урысыем ичIыпIэ зэфэшъхьафхэм техынхэр ащэкIох.
Театрэм ыкIи кином яактерэу Игорь Жижикиныр Урысыем имызакъоу, Америкэми щызэлъашIэ. Голливуд щытырахыгъэ кинофильмэ пчъагъэхэм ар ахэт. ИтеплъэкIэ, изэхэлъыкIэкIэ зэо-бэнэ сценэхэм нахь афытегъэпсыхьагъэу щыт, ащ фэдэхэр зыхэт фильмхэр ары нахьыбэрэмкIи ар зыхэлажьэрэр. ДжырэкIэ режиссерэу ЕмкIуж Андзор ар ригъэблэгъагъэу «Невиновен 2» зыфиIорэм хегъэлажьэ.
— IофшIэныр дэгъу дэдэу кIэкIы ыкIи тылъыкIуатэ къэс съемкэхэр нахь гъэшIэгъон зэрэхъухэрэм сыгукIэ сегъатхъэ, — еIо Игорь Жижикиным. — Сэ сызщыгъуазэ горэхэм сиIофшIэгъухэр нэIуасэ афэсэшIых, сымышIэхэрэр ежьхэм къысфаIуатэ, джарэущтэу тызэдэлажьэ.
Игорь Жижикиныр фильмым зэрэхэтыр героим пэуцужьэу ары, тхьамыкIэгъошхо къызпыкIыщт щэрыоныри ары зышIынэу щытыр. Джащ пае съемочнэ купыр Налщык дэт унэ зэтет лъагэхэм ащыщ горэм ышъхьэ тетхэу мызыгъэгурэ сценэр тырахы. ЗэкIэ къэзыугупшысырэр, аужырэ гущыIэр зиер режиссерыр ары. ЦIыфхэр кинофильмым еплъыхэ зыхъукIэ анахьэу анаIэ зытырадзэщтхэр пэшIорыгъэшъэу елъэгъух, ащ елъытыгъэу, зы пкъыгъо химыгъэзэу ар зэрэтырихыщтым пылъ. ГущыIэм пае, актерыр шхончэу къыштэщтым зэрекIуалIэрэр, оным зызэрэфытыригъэпсыхьэрэр, ащ гумэкIыгъоу пылъыр, а зэкIэри зэрэтепхыщт шIыкIэхэр режиссерым къеугупшысых. Актерхэмрэ режиссерымрэ зэгурымыIохэ зыхъукIэ, IофшIэныр лъыбгъэкIотэшъущтэп, ау ар Андзори, артистхэми афэгъэхьыгъэу къэпIон плъэкIыщтэп.
— Андзоррэ сэррэ ащ лъыпытэу зы бзэкIэ тызэрэгущыIэрэр къызгурыIуагъ, — еIо Урысыем щызэлъашIэрэ актрисэу Анна Чуринам. — Мыщ сыкъакIо зэхъум, зытетыр къэсIон, сыгумэкIыщтыгъ. Нэужым ежь Андзори къысиIожьыгъ Iофыр зэрэхъущтым зэригъапэщтыгъэр. Апэрэ дублыр зытэшIым ыуж къызгурыIуагъ Iофым хэшIыкI фызиIэмэ сазэрадэлажьэрэр ыкIи джащ къыщегъэжьагъэу творческэ гуфэбагъэ зэфэтшIын тлъэкIыгъэ.
ЕмкIуж Андзор апэрэ художественнэ фильмэу тырихыгъэр кинотеатрэхэм къащагъэлъагъо зэхъум, залхэм цIыфхэр зэрачIафэу ачIэсыщтыгъ. Фильмым уеплъыныр IэшIэхыгъэп, ар арэущтэу къэзышIыщтыгъэр тхьамыкIэгъошхоу къызтегущыIэрэм ихьылъагъ, ау къэзыгъэшIэгъоныщтыгъэр ошIэ-дэмышIэу къызэрэзэкIоцIыкIырэр, узэмыжэгъэ пычыгъохэмкIэ зэрэзэкIэлъыкIорэр ары. Каналэу Ютубым кинофильмыр къызихьагъэм къыщегъэжьагъэу нэбгырэ миллион 23-рэ еплъыгъах. Ащ къегъэлъагъо IофшIагъэм осэ ин зэриIэр, цIыфхэм агу зэрэрихьыгъэр. Кинофильмым лъыпыдзэгъэ ятIонэрэ картинэу непэ тырахырэри апэрэм къыщимыгъэкIэнэу мэгугъэх.
— Апэрэ кинофильмыр тесхы зэхъум нахь къиныгъ, ау джыри псынкIэу сIон слъэкIыщтэп, — къеIуатэ ЕмкIуж Андзор. — ПшъэдэкIыжьышхоу сиIэм Iофыр къегъэхьылъэ. ЦIыфхэр мыщ къежэх, ар ашIогъэшIэгъоныным щэгугъых. Сэ сипшъэрылъыр ахэр сымыгъэпцIэнхэр, зажэхэрэ кино дэгъур язгъэгъотыныр ары. Джащ пае зэрэкомандэу тызэгурыIозэ тэлажьэ.
Мы илъэсым техынхэр Темыр Кавказым ичIыпIэ зэфэшъхьафхэм, Урысыем икъэлэ шъхьаIэу Москва ащыкIуагъэх. Режиссерэу ЕмкIуж Андзор зэрэхигъэунэфыкIыгъэу, сценэ заулэу къафэнагъэр зытырахыжьырэ ужым лентэр зэрагъэкIужьыным иIофыгъохэм афежьэщтых. Джыри зы илъэсрэ а Iофым пылъыщтхэу ары зэралъытэрэр, етIанэ «Невиновен» зыфиIорэ фильмым лъыпыдзагъэу «Кровник» зыфаусыгъэ художественнэ фильмым теплъын тлъэкIыщт.
Мысыр Осмэн.