«Зэкъошныгъ» Мыекъуапэ — «Ессентуки» Ессентуки – 4:0 (3:0). ШэкIогъум и 4-м АР-м истадион щызэдешIагъэх.

«Зэкъошныгъ»: Ковалев, Кириленко, Гусенгаджиев (Лысенко, 61), Телепов, Къонэ, Байрамян, Макоев (Антоненко, 76), Орзай (Васильев, 61), Пекъу (М. Делэкъу, 85), А. Делэкъу, Iащэ (Датхъужъ, 61).

Къэлапчъэм Iэгуаор дэзыдза­гъэхэр: Iащэ — 6, Макоев — 24, Пекъу — 44, пенальти, А. Делэкъу — 49.

ЕшIэгъум ия 6-рэ такъикъ А. Iащэр метрэ 21-рэ фэдизкIэ «Ессентуки» икъэлапчъэ пэчы­жьэу лъэшэу зыдаом, Iэгуаор чэрэгъузэ хъагъэм ифагъ.

А. Макоевыр тазыр ешIапIэм итэу Iэгуаор къызыIэкIахьэм, псынкIэу къэлапчъэм дидзэн ылъэкIыгъ. «Ессентуки» иухъумакIохэм ащыщ шапхъэр ыукъуи, А. Макоевым кIуапIэ ритыгъэп. Пенальтир И. Пекъум дэгъоу ыгъэцэкIагъ, пчъагъэр 3:0 хъугъэ.

«Зэкъошныгъэр» ыпэкIэ илъы­гъэу метри 6 фэдизкIэ А. Де­лэкъор къэлапчъэу зыпэчыжьэм дауи, пчъагъэр 4:0-м нигъэсыгъ. ХьакIэхэр апэкIэ къылъыкIуатэщтыгъэх, ау тиухъумакIохэр къы­зэранэкIынхэр къяхьылъэкIы­щтыгъ. ЗыщищыкIагъэм къэлэпчъэ­Iутэу Р. Ковалевыр цыхьэшIэ­гъоу ешIэщтыгъ.

ЗэгурыIоныгъэ ахэлъэу тиешIа­кIохэр «Ессентуки» икъэлапчъэ благъэу екIущтыгъэх. А. Iащэм, А. Къонэм, А. Делэкъом, А. Датхъужъым, нэмыкIхэм хъагъэм Iэгуаор радзэнэу амалышIухэр яIагъэх.

Пресс-зэIукIэр

— Апэрэ чIыпIэм «Чайкэр» щыI. «Ессентуки» зэкIэми ауж ит. КомандитIуми зэкIэлъыкIоу тадешIагъ, ащи мэхьанэ иI. ТекIоныгъэм зыфэдгъэхьазырын зэрэтлъэкIыгъэм, зэIукIэгъур едгъэ­жьэгъэ къодыеу Iащэ Анзор къэ­­лапчъэм Iэгуаор зэрэдидза­гъэм яшIуагъэ зэнэкъокъум къыгъэлъэгъуагъ. ТиухъумакIохэм, ыпэкIэ щешIагъэхэм сакъыщытхъу сшIоигъу. Пчъагъэр зэрэбэм тигъэгушIуагъ. «Спартак» Налщык шэкIогъум и 13-м Мыекъуапэ тыщыIукIэщт. Футболыр зыгу рихьыхэрэр ешIэгъум еплъынхэу къетэгъэблагъэх, — къыIуагъ «Зэкъошныгъэм» итренер шъхьа­Iэу ШакIо Ащэмэз.

— ТиешIакIохэр ныбжьыкIаIох, зэнэкъокъум гъэхъагъэ щашIыным фэтэгъасэх. ЧIыпIэ хэхыгъэ къыдэ­тхыным джырэ уахътэ ты­фэба­нэ­рэп. Командэм хэтхэм гуетыныгъэ ахэлъ, янеущрэ мафэ фэкIох, — къытиIуагъ «Ессентуки» итренерхэм ащыщэу Рустам Дудовым.

ЕшIэгъухэр

«Легион» — «Чайка» — 0:2, «Биолог» — «Ротор» — 2:2, «Кубань Холдинг» — «Спартак» — 0:2, «Алания-2» — «Форте» — 1:6, «Динамо» — «Мэщыкъу» — 1:0, «Черноморец» — СКА — 4:0.

Хэт тыдэ щыIа?

1. «Чайка» — 39 2. «Черноморец» — 39 3. «Ротор» — 31 4. «Биолог» — 29 5. «Кубань Х.» — 28 6. «Спартак» — 25 7. «Форте» — 25 8. СКА — 20 9. «Зэкъошныгъ» — 18 10. «Динамо» — 16 11. «Мэщыкъу» — 13 12. «Алания-2» — 10 13. «Легион» — 10 14. «Ессентуки» — 5.

Я 17-рэ зэIукIэ­гъухэр

9.11 «Биолог» — «Мэщыкъу» «Ессентуки» — «Легион» СКА — «Динамо» «Спартак» — «Алания-2» «Форте» — «Зэкъошныгъ» «Чайка» — «Черноморец» «Ротор» — «Кубань Х.»