БлэкIыгъэм уемыуцуалIэмэ, уапэкIэ къэтыр гъэпсыгъуае хъущт
ЦIыфлъэпкъми итарихъ къат-къатэу зэхэлъ, къытыригъэзэжьырэп, лъэпкъ пэпчъи гъогу шъхьаф къыкIурэр.
Лъэпкъхэм, лIэкъо цIэрыIохэм алъапсэ къызыщежьэрэр, ахэм тарихъ гъогоу къакIугъэр гъэунэфыгъэныр анахь Iоф къинхэм, ау гъэшIэгъонхэм ащыщ. Сэ сишIошIыкIэ, блэкIыгъэмрэ къэкIощтымрэ акIэрымычыгъэу щыIэныгъэмрэ цIыфымрэ къыгъэлъэгъоныр тхакIом ипшъэрылъ шъхьаIэхэм зэу ащыщ. БлэкIыгъэ зимыIэ цIыф щыIэп, блэкIыгъэм уемыуцолIапэмэ, уапэкIэ къэтыр гъэпсыгъуае хъущт. БлэкIыгъэмрэ къэкIощтымрэ непэрэ мафэм изы Iахьых. Тарихъыр зыкIытищыкIагъэр блэкIыгъэр зэхэтфын закъом паеп. Ащ тызщыщыр, тыкъызыхэкIыгъэр къытфегъэнафэ, неущырэ мафэм екIурэ гъогур къытфызэIуехы.
Сишъыпкъэу ахэм сягупшысэу зысыублагъэр илъэсыбэкIэ узэкIэIэбэжьмэ советскэ литературэм и Мафэхэу Казахстан щыкIуагъэхэм сахэлажьэ зэ-хъур ары. Творческэ зэIукIабэ задэтэшI нэуж тэ, тхакIохэм, мэфэкIым икIэух Алма-Ата тыщызэрэугъоижьыгъагъ. Пчыхьэ горэм республикэ пшIыкIутфымэ къарыкIыгъэ хьэкIэ лъапIэхэм мэфэкI Iанэм тыпагъэтIысхьагъ, союзнэ къэралыгъоми литературэми чIыпIэу ащытыубытырэм елъытыгъэу тхакIохэр тагъэтIысыгъэх. ХьэкIэ лъапIэхэм сэри сахэтыгъ. IэнакIэр арми къысэнэсыгъэр, ар гухэкI сщыхъугъагъэп. Зэгорэм лъэпкъышхоу щытыгъэ адыгэхэу тарихъ чIыгужъым къинэжьыгъэ тIэкIумэ ялIыкIоу сызэрэщытыр сэ къызгурыIощтыгъ.
Казахстан ипащэу Динмухамед Кунаевым хьакIэ пэпчъ хъохъубжъэ ритыным ыпэкIэ лъэпкъхэм ягушъхьэлэжьыгъэ ащ чIыпIэу щиубытырэр къыIощтыгъ. НэмыкI тхакIохэм хъохъоу къаIорэм сишъыпкъэу седэIущтыгъ. Пчыхьэзэхахьэр ыкIэм факIощтыгъ, Iанэм пэсхэм, зэкI пIоми хъунэу, хъохъухэр къаIогъэхагъ, аужырэ хьакIэми гущыIэр ратыгъ… Сэ сащыгъупшэжьыгъэм фэдагъ, ар сыгу къеоу сэри сегупшысагъ: «Адэ джары умакIэмэ утхьамыкI зыкIаIуагъэр»…
Кунаевым Iанэм пэсхэр зэкIэ нэкIэ къызэпиплъыхьагъ. «Зэрэхабзэу, кIэух гущыIэр ащ къыIожьынщтын», — сегупшысагъ. Ау зэхэсхыгъэм сыгу къыгъэлъэпэрэпагъ.
— Джыри тихьакIэхэм ащыщ горэм гущыIэ есты сшIоигъу, — ащ къыIуи, Iанэм телъ тхыгъэр къыштагъ, IугушIукIызэ Iанэм пэсхэм анэгу кIэплъагъ. — АщкIэ къысэлъэIугъэхэр иныбджэгъу тхакIохэр ары. ГущыIэр зэстырэр тихэгъэгушхо щыпсэурэ лъэпкъ макIэмэ ащыщэу МэщбэшIэ Исхьакъ. Сымыгъуащэмэ, Краснодар краим хэхьэрэ Адыгэ автоном хэкум ар къекIы.
Мыщ дэжьым Армением щыщ тхакIоу Серо Ханзадян мэкъэ лъэшкIэ къыIуагъ: «Кавказым къикIыгъэхэр, шъукъызэлъытэдж!» Ащ лъыпытэу Грузием, Армением, Азербайджан къарыкIыгъэ тхэкIо цIэрыIохэр къэтэджыгъэх.
— СичIыпIэгъухэр къызфэзгъэтэджыгъэхэр къышъосIон, — къыпидзэжьыгъ Серо Ханзадян. — Джыдэдэм зэхэшъухыщтыр Кавказым илIыхъужъ тарихъ ымакъ. Непэ цIыф лъэпкъ макIэмэ ащыщ зыфаIуагъэу шъуапашъхьэ ит МэщбэшIэ Исхьакъ адыг. Адыгэхэр дунаим ианахь ижъырэ цIыф лъэпкъхэм ащыщых. ТэркIэ анахь цIыф гъэшIуагъэх. Яшъхьафит кIэхъопсыкIэкIэ, яцIыфыгъэ-лIыгъэкIэ, яIэшэ-шъуашэкIэ Кавказым ынапэх, инамысых, иегъэшIэрэ рыцарых. Джары сэ сичIыпIэгъухэм къэтэджынэу зыкIясIуагъэр. АщкIэ зигугъу къэсшIырэ лъэпкъым лъытэныгъэу, шъхьэкIафэу фытиIэр къэдгъэлъэгъонэу сыфэягъ.
Сэри, силъэпкъэгъухэми, сичIыпIэгъухэми, сихэку гупсэу Адыгейми ащ фэдэ лъытэныгъэшхо къызэрэтфашIыгъэр зэрэсигопагъэр сыушъэфырэп. Илъэсыбэ зэрэтешIэжьыгъэм къыхэкIэу хъохъоу къэсIуагъэр къэсшIэжьырэп. ШъыпкъэмкIи, джащыгъум сыгумэкIыщтыгъ. Ау дэгъу дэдэу сыгу къэкIыжьырэр мэфэкI Iанэм сызыпэсми, тадэжь сыкъэкIожь зэхъуми блэкIыгъэ зэман чыжьэхэм, тхьамыкIагъоу силъэпкъ къехъулIагъэм сахэмыгупшысыхьажьын зэрэсымылъэкIыгъэр ары.
Адыгэхэм къахэкIыгъэ горэм мырэущтэу ыIогъагъ: «Адыгэхэр егъэшIэрэ чъыгэу зикъутамэхэмкIэ ошъогум зыфэзыкъудыирэм, зилъапсэхэр чыжьэ дэдэу чIым щекIотэхыгъэм фэдэх. Ташъхьагъ зыщызыушъомбгъурэ ошъогум илъэгагъэрэ икууагъэрэ пшынхэ зэрэмылъэкIыщтым фэдэу адыгэхэм ятарихъ икууагъи пшын плъэкIыщтэп».
Казахстан сыкъикIыжьзэ, Iофыр а дэдэм зэрэтетым сегупшысагъ. Мыщ дэжьым Францием изекIо цIэрыIоу Оммер де Гелль ыIогъагъэр сыгу къэкIыжьыгъ: «Гурыт лIэшIэгъухэм ялъэхъан щыIэгъэ лъэпкъхэм бэрэ агъэшIэгъогъэ цIыфыгъэшхомрэ лIыгъэмрэ къызыхэнэжьыгъэр Кавказым ис черкесыр ары. ЛIыхъужъныгъи, акъыли, дэхагъи, шIуагъэу ахэлъ пстэури чIыопсым ахэм къахилъхьагъэх. ЯшэнкIэ сэ анахьэу згъэшIагъощтыгъэр цIыфыгъэу, шъхьалъытэжьэу ахэлъыр ары. Псэемыблэжьныгъэрэ лъэпкъ шъхьафитныгъэм фыряIэ шIулъэгъу лъэшымрэ ахэм сыдигъуи аголъыгъ, зыкIи щагъэзыягъэп».
Адыгэхэмрэ урысхэмрэ, нахь зегъэушъомбгъугъэу къэпIон хъумэ, черкесхэмрэ славянхэмрэ зэлъыIэсхэу, зэхахьэхэу заублагъэр зэман чыжьэхэр ары. Урысыемрэ адыгэхэмрэ язэфыщытыкIэхэр зыщызэIыхьэщтыгъэ лъэхъан горэхэр къыхэкIыгъэми, лIэшIэгъубэкIэ узэкIэIэбэжьмэ ахэм зэпхыныгъэ зэрэзэдыряIэщтыр къэпшIэнэу щытыгъ. Пщышхохэу Рэдэдрэ Мстиславрэ афэгъэхьыгъэ тарихъ романэу «Рэдэдым» Iоф дасшIэзэ, ащ фэдэ зэфэхьысыжьым сыкъыфэкIогъагъ. Романыр стхы зэхъум а лъэхъаным фэгъэхьыгъэ тарихъ тхылъыбэмэ сяджэн фаеу хъугъагъэ.
Я Х-рэ лIэшIэгъур ары къохьэпIэ адыгэхэм (ижъырэ урыс тхыгъэхэм ахэр «къосэгъукIэ» къахэфэх) Урысыем зэпхыныгъэ дыряIэ зыхъугъэр. Ары пакIопышъ, къосэгъухэр Черниговрэ Тум-Тэкъашъэрэ япщэу Мстислав идзэ хэтыгъэх, я ХI-рэ лIэшIэгъум щыIэгъэ заохэм ахэлэжьагъэх. Адыгэхэмрэ русичхэмрэ якультурэ зэпхыныгъэхэм псынкIэу заушъомбгъущтыгъ. Чыристан диным Темыр-КъохьэпIэ Кавказым зызэрэщиушъомбгъущтыгъэми ар епхыгъагъ. Зэман чыжьэхэм урысхэмрэ адыгэхэмрэ язэфыщытыкIэхэм загъорэ къэгъэзэпIэ дэйхэр зэрафэхъущтыгъэр, яIофхэр загъорэ дэгъоу зэрэзэпымыфэщтыгъэр къыбгурыIонэу щытыгъ.
«Повести временных лет» зыфиIорэм къыщеIо Тум-Тэкъашъэ ипщэу Мстислав 1022-рэ илъэсым къосэгъухэм зэратеогъагъэр. Мстиславрэ Рэдэд къосэгъупщымрэ зэрэзэбэныгъэхэр игъэкIотыгъэу ащ къыщытыгъ. Ситарихъ романэу «Рэдэдыр» а хъугъэ-шIагъэм фэгъэхьыгъ. Романым щыщ пычыгъохэр мыщ дэжьым сымыгъэфедэхэми хъущт, тхылъеджэхэр ахэм дэгъоу ащыгъуазэхэшъ. ТхакIоу сызэрэщытым елъытыгъэу илъэс минкIэ узэкIэIэбэжьмэ щыIэгъэ а заом ыуж тилъэпкъэгъухэм къарыкIуагъэр зэзгъэшIэныр сшIогъэшIэгъоныгъ.
Тарихъ документхэм зэрарытымкIэ, дзэ пащэхэм Рэдэд пщышхом иаужырэ лъэIу фагъэцэкIагъ: пщым ичIыгухэр, имылъку, ишъхьэгъусэ гощэшхор, ыкъуитIу Мстислав ратыгъэх. Рэдэдрэ ичIыгу гупсэрэ лъэшэу зэрафэзэщыщтыгъэм къыхэкIэу гощэ дахэм мэзэ заул ныIэп хымэ лъэныкъом къыщигъэшIэжьыгъэр.
Мстислав итхьарыIо фэшъыпкъэзэ, 1022-рэ илъэсым Тхьэгощэ лъапIэм ыцIэкIэ Тум-Тэкъашъэ чылыс щаригъэшIыгъ.
А чылысым Рэдэд ыкъохэр щаумэхъыгъэх, чыристан диным щырагъэхьагъэх. Чыристан зэхъухэм ахэм цIэу Юрэрэ Романрэ афаусыгъ. Рэдэд ыкъоу Роман Мстислав ыпхъу къыщи, махълъэ фэхъугъ. Ижъырэ урыс лIэкъуабэ ащ къытекIыгъэу ары зэралъытэрэр. Илъэсхэр зэблэкIыщтыгъэх, Рэдэд ылъи тIэкIу-тIэкIузэ Урысыем ипщыхэм, илIэкъолъэшхэм, иоркъхэм ахахьэщтыгъ.
Рэдэд пщышхом къытекIыгъэхэм къарыкIуагъэм фэгъэхьыгъэу илъэс 400-м къыриубытэрэ тхыгъэхэм зы гущыIэ ахэтэп. Николай Карамзиным итхылъэу «Урысые къэралыгъом итарихъ» зыфиIорэм мырэущтэу щетхы: «Москва щыщ ижъырэ лIэкъуиплIымэ Рэдэд пщышхом къытекIыгъэкIэ залъытэжьы. Ахэр — Добрынскэхэр, Белеутовхэр, Сорокоумов-Глебовхэр, Лопухинхэр. Рэдэд илIакъоу ахэр алъытэх». Ахэм чIыгубэ аIэ илъыгъ, баигъэх, цIэрыIуагъэх. Пщыгъо хэушъхьафыкIыгъэхэр зэхэхьажьхи къэралыгъо зыкI зэхъухэм, Урысые хэгъэгум къэралыгъо IэнэтIэшхохэр щаIыгъыгъэх, яIуи яшIи осэшхо яIагъ, пачъыхьэмэ апэблэгъагъэх, дзэ пэщэ цIэрыIоу щытыгъэх. Рэдэд ыкъоу Роман къытекIыгъэхэм ащыщэу Андрей Одинец Дмитрий Донскоим зэригъусагъэр, Андрей ыкъоу Александр Белеут пачъыхьэу Апэрэ Василий зэрэпэблэгъагъэр гъэунэфыгъэ шъыпкъэу щыт. Рэдэд ыкъоу Роман къытекIыгъэхэм ащыщэу Константин Добрынскэр дзэ пащэу, губернием ипащэу щытыгъ.
Урысыем пачъыхьагъур илъэс шъищрэ щызыIыгъыгъэ Романовхэм ащыщэу апэ дэдэ пачъыхьэ тахътэр Романов Михаил Федор ыкъом ыубытынымкIэ Рэдэд къытекIыгъэхэм яшIогъэшхо къагъэкIуагъ.
Уахътэр кIощтыгъэ. Рэдэд пщышхом ыкъохэм къатекIыжьыгъэ унагъохэр багъощтыгъэх, алъкIэ, янамыскIэ урыс лъэпкъым зыхагуащэщтыгъ, кIуачIи, лъапси фэхъущтыгъэх. Ахэм динлэжь инхэри къахэкIыгъэх. Патриархэу Филарет Урысыем иапэрэ пачъыхьэу Михаил Романовым ятагъ.
КIочIитIу зызэхахьэкIэ, мыжъом мыжъо еуутэкIымэ машIо къызэрахихэу, лъэкIышхо зиIэ ящэнэрэ кIуачIэр къэхъу. Джащ фэдэу мэшIо шIагъо хъугъагъэ Рэдэд пщышхом ыкъохэм къатекIыжьыгъэхэм ащыщэу адмиралэу Федор Ушаковыр. ГъэшIэгъоныр Урысые флотым иапэрэ линейнэ къухьэу я ХIХ-рэ лIэшIэгъум ыкIэм ашIыгъагъэм цIэу «Рэдэд — къосэгъупщ» зэрэфаусыгъагъэр ары. Федор Ушаковым мичманэу ригъажьи, флотым иадмирал IэнатIэ нэсыгъ. Урыс флотэу ащ пэщэныгъэ зыдызэрихьагъэм хы заохэм текIоныгъабэ къащыдихыгъ. Заохэу пэщэныгъэ зыщызэрихьагъэхэм, текIоныгъэхэм, щытхъуцIэхэм, тынэу къыфагъэшъошагъэхэм ащ ыцIэ Урысыем имызакъоу, нэмыкI хэгъэгухэми ащызэлъырагъэшIагъ. Адмиралым ыныбжь хэкIотагъэу пачъыхьэу Апэрэ Павел лъэIу тхылъ фигъэхьыгъагъ. Рэдэд пщышхом къытекIыгъэ шъыпкъэу зэрэщытыр къэралыгъо тхылъкIэ къыфиушыхьатыным ар кIэдэущтыгъ.
Владимир Овчинниковым итхылъэу «Ушаков Федор Федор ыкъор» зыфиIорэм зэрэщитхырэмкIэ, пачъыхьэм адмиралым къыфитхыжьыгъэм мырэущтэу къыщиIощтыгъ: «Владимир ыкъоу Мстислав пщышхом Рэдэд пщышхор ыукIыгъ, Рэдэд ыкъохэр чыристан ышIыгъэх, диныр зарегъаштэм апэрэм цIэу Юрий, адрэм — Роман афиусыгъ. Пщышхом ыпхъу Роман ритыгъ шъхьэгъусэу. Роман ыкъор Василий, ащ ятэжъыр Рэдэд. Василий ыкъор Юрий… Григорий икIалэхэр: Ушак, Лапоть, Крапотка, Илья, Алексей, Иванышхор, Лев, Иван цIыкIур…»
А къэбархэр архивхэм къахахыгъэх ыкIи адмиралэу Ушаковым илIакъо Рэдэд пщышхомкIэ къызэрежьэрэр къаушыхьатыщтыгъ.
1804-рэ илъэсым игъатхэ адмиралэу Ушаковыр пачъыхьэм фэтхэ, Урысыем илIэкъо фэшIыгъэхэм ятамыгъэхэр зыдагъэуцорэ тхылъым Ушаковхэм ялIэкъо тамыгъэ дагъэхьанэу елъэIу: «… ТилIакъо къосэгъупщэу Рэдэд къызэрэтекIыгъэр зэхэфыгъэу, Ушаковхэр лIэкъо тамыгъэхэр зыдагъэуцорэ тхылъым дябгъэгъэхьанэу сыолъэIу…»
Хэтрэ цIыфи, адмиралэуи ар орэхъу, ышъхьэ упчIабэ къитаджэу къыхэкIы, лъэпкъэу, лIакъоу къызыхэкIыгъэр, Iахьылэу иIэхэр зэригъашIэ шIоигъоу чIыпIэ еуцо. Арэущтэу зыкIэхъурэр ежь зыщыщыр, къызытекIыгъэхэр, дунаим къызкIытехъуагъэр ышIэным, иблэкIыгъэ рыплъэжьыным, инеущырэ мафэ къылъэгъуным, ыуж къырыкIощт лIэужхэр игущыIэ зафэкIэ ыгъэгъозэнхэм апай. Рэдэд илIакъо къыхэкIыгъэхэм зэу ащыщ юрист цIэрыIоу, профессорэу, Къэралыгъо Думэм идепутатыгъэу Кокошкин Федор Федор ыкъор. Учредительнэ зэIукIэм хэхьащтхэр зэрэхадзыхэрэм ехьылIэгъэ законыр ащ къыгъэхьазырыгъагъ.
Рэдэд ыкъоу Роман къытекIыгъэхэм ащыщэу Михаил Сорокоум бояринэу щытыгъ, Москва ипщышхоу Иван Калита епхыгъагъ. Сорокоумхэм ялIакъу ары Лопухинхэр къызыхэкIыгъэхэр.
Лопухин Федор ыпхъоу Евдокие къосэгъупщэу Рэдэд илIакъу къызыхэкIыгъэр. 1689-рэ илъэсым ар Апэрэ Петр шъхьэгъусэ фэхъуи, Урысыем ипачъыхьэ игощэшхуагъ.
Пачъыхьэм иблагъэ зэхъухэм, Лопухинхэр яIэнатIэкIэ Урысыем нахь щылъыкIотагъэх. Ау къэIогъэн фае армырми ахэр зэрэцIэрыIуагъэхэр, а лъэхъаным ехъулIэу лIакъом щыщ нэбгырэ 30 фэдизмэ пачъыхьэм епхыгъэу Iоф зэрашIэщтыгъэр. БгъэшIэгъонэу щытэп Рэдэд илIакъо къыхэкIыгъэ лIэкъолъэшхэу, пщыхэу Урысыем исыгъэхэм, Лопухинхэм яунагъуи ахэм зэрахэтэу, дзэ къулыкъур дэгъоу зэрахьыщтыгъэр, IэнэтIэшхохэр ащ зэрэщаIыгъыгъэхэр. Лопухинхэм апшъэрэ мэхьанэ зэратыщтыгъэр дзэ къулыкъушIэхэм лIыхъужъныгъэ къызэрэзыхагъафэрэмрэ ахэм уасэу афашIырэмрэ ары. КъэIогъэн фае Георгий Шыихъым иорденэу 1769-рэ илъэсым пачъыхьэу Екатеринэ ыгъэнэфагъэр къызэратыгъэ апэрэ урыс офицерхэм Лопухин Авраам Степан ыкъор зэращыщыр. Ащ фэдэ орденыр зыфагъэшъуашэщтыгъэр нэбгырэ зырызэу заом лIыхъужъныгъэшхо щызезыхьагъэр ары.
Лопухинхэр щынэ зымышIэрэ зэолIэу щытыгъэх, лIыгъэ ахэлъыгъ, лIыхъужъныгъэ къызхагъафэзэ заом щыфэхыщтыгъэх. Имперскэ дзэм иофицерыгъэу Лопухин Александр Иван ыкъор полярнэ флотым иштурманэу щытыгъ. Хэгъэгу зэошхом илъэхъан лIыхъужъныгъэшхо къызэрэзхигъэфагъэм фэшI Щытхъум иорденитIу ащ къыфагъэшъошагъ.
Зэман чыжьэхэм къафэдгъэзэжьзэ къэIогъэн фае Лопухинхэр Михаил Лермонтовым иныбджэгъухэм зэращыщыгъэхэр. «Пушкиным ныбджэгъубэ иIагъ, Лермонтовым иIэгъахэп пIоми хъущт, — ытхыщтыгъ Петр Вяземскэм, — Iахьыл зытIущэу иIагъэмрэ ицIыкIугъо къыщегъэжьагъэу инэIосэгъэ Лопухинхэмрэ ары ащ ыгъэныбджэгъущтыгъэхэр». Бэмэ ашIэрэпщтын Михаил Лермонтовым янэжъэу Арсеньева Елизаветэ Алексей ыпхъумрэ Лопухинхэмрэ зэпэчыжьэ Iахьылэу зэрэщытыгъэхэр. Лопухин зэшыпхъухэм ащыщэу ащ ныбджэгъуныгъэ нахь зыдыриIагъэр Мария ары. Урыс усэкIо цIэрыIом анахьыкIэу Варварэ шIу ылъэгъущтыгъ. УсакIом итворчествэ изэгъэшIэн пылъхэм зэралъытэрэмкIэ, Михаил Лермонтовым урыс классическэ поэзием хэхьэгъэ усабэ ащ фитхыгъ. Ипоэмэхэм къахэфэрэ героибэмэ якъэтынкIэ Михаил Лермонтовым Варенькэ иобраз къызфигъэфедагъ. УсакIом ащ исурэтхэри ышIыгъагъэх. Пшъэшъэ дахэм исурэтищрэ Лермонтовым итхыгъэхэу Лопухинхэу Варварэрэ Мариерэ афигъэхьыгъагъэхэр тэри къыднэсыжьыгъэх.
Рэдэд пщышхом къытекIыгъэхэм афэгъэхьыгъэу къэсIуагъэр зэкIэ тарихъым хэхьэгъэ пычыгъо кIэкIых. Илъэс минкIэ узэкIэIэбэжьмэ, Мстиславрэ Рэдэдрэ зыщызэбэныгъэхэ чIыпIэм — Пепау къушъхьэ лъапсэм кIэрылъ гъэхъунэм къыщежьэгъэ лъагъох. Къосэгъупщэу Рэдэд илIэкъо къутамэ хы ШIуцIэмрэ хы Фыжьымрэ азыфагу илъ шъолъырым щыбэгъогъэ къутэмэ кIочIэшху.
Тилъэхъан — яминитIурэ илъэсхэм — къэIугъэр джэрпэджэжьэп, блэкIыгъэ лIэшIэгъу пчъагъэхэм амакъ. Телевидением икъэтынхэм ащыщ горэм ошIэ-дэмышIэу щызэхэсхыгъэм стхьакIумэ зыкъыригъэпхъотагъ: «Пщы гуащэу Лопухина Наталье Владимир ыпхъум гущыIэр етэты». Бзылъфыгъэм ипсалъэ мырэущтэу къыригъэжьагъ: «Сэ къосэгъу пщышхоу Рэдэд илIакъо сыщыщ». Уахътэр къызэтеуцуагъэу къысщыхъугъ. ЛIэшIэгъу пчъагъэ зэрэтешIэжьыгъэзи, Рэдэд пщышхом къытекIыгъэхэм алъапсэ къызыщежьэрэр къашIэжьы, ялIакъо рэгушхох.
Ащ лъыпытэу редакцием сытеуи, Лопухина Наталье Владимир ыпхъум ителефон номер къаIысхыгъ. Арырэ сэрырэ тызызэдэгущыIэм, тхылъэу «Лопухины в истории Отечества» зыфиIорэр бэмышIэу къызэрэдагъэкIыгъэр, Борис Краевскэм ащ Iоф дишIэ зэхъум, Лопухин Вадим Олег ыкъом къыIэкIигъэхьэгъэ материалхэр зэригъэфедагъэхэр къысиIуагъ.
2001-рэ илъэсым имэлылъфэгъу а тхылъэу Москва къысфырагъэхыгъэм Москва илIэкъолъэш обществэ ипащэ игуадзэу Вадим Лопухиным ыIэкIэ мыхэр къысфытыритхагъэх: «Лъытэныгъэшхо зыфэсшIырэ МэщбэшIэ Исхьакъ Шумаф ыкъом шъыпкъэныгъэр ылъапсэу зэрэтхэрэм фэшI сыфэразэу есэты, псауныгъэ пытэ, щыIэкIэ-псэукIэ дэгъу иIэнэу, игъашIэ кIыхьэ хъунэу сыфэлъаIо».
Тхылъэу «Лопухины в истории Отечества» зыфиIорэр сызыщытхэрэ Iэнашъхьэм джы телъ…
Романэу «Рэдэдым» Iоф дасшIэ зэхъум, къосэгъупщэу Рэдэд илIакъо къыхэкIыгъэхэм саIукIэщтмэ сыдым фысигъэшIэныя?..
Илъэсхэр, лIэшIэгъухэр къызэкIэлъыкIуагъэх. Пщышхохэу Мстиславрэ Рэдэдрэ зызэбэныгъэхэ уж илъэс мин тешIэжьыгъ. Ау Рэдэдыпщым илIакъо къыхэкIыгъэхэр джыри псаоу щыIэх, Кавказым исхэм яшIэжь джыри адыгэ пщышхор хэлъ. Пщышхоу Рэдэд къытекIыжьыгъэхэу зиакъылкIэ, зилIыгъэкIэ, зикъарыукIэ, зинамыскIэ, зимылъкукIэ Урысые къэралыгъом кIэгъэкIон фэхъугъэхэр урыс тарихъым щыщ хъужьхи хэткIухьажьыгъэх.
Урысые къэралыгъор зыгъэпсыгъэхэм адыгэхэр зэрахэтыгъэхэм тырыгушхон тлъэкIыщт. Иван Грознэм адыгэхэр къызэрэкъотхэм зэрэрыгушхорэр пчъагъэрэ ипыйхэм ариIоу хъугъэ. Иапэрэ шъхьэгъусэу Анастасие идунай зехъожьым Темрыкъо ыпхъоу Гощэунае къызэрищагъэр ошIэ-дэмышIэ Iофэу щытыгъэп. Адэ адыгэхэм мэхьанэшхо зиIэ Iоф тхьапша Урысыем фызэшIуахыгъэр? Ахэм анахьэу зиIахьышIу ахэзышIыхьагъэр Черкасскэ Алексей Михаил ыкъор ары. Агъэпсырэ Санкт-Петербург иканцелярие ипащэу ар Апэрэ Петр ыгъэнэфэгъагъ. Алексей Черкасскэр ары Петропавловскэ пытапIэр, гардемаринхэм яучилищэ, къухьэуцупIэхэр, заводхэр зыгъэпсыгъагъэхэр. Сыбыр игубернаторэу, пачъыхьэу Апэрэ Екатеринэ иупчIэжьэгъоу ар щытыгъ, Иоанн ыпхъоу Аннэ дэжь щызэхэщэгъэ Советым хэтыгъ.
ЩыIэныгъэм цIыф гъэшIэгъоныбэмэ уащырехьылIэ. Лъэпкъхэм языкIыныгъэ и Мафэ фэгъэхьыгъэ Iофтхьабзэр Кремлэм щызэхащэзэ, Черкасскэ Алексей ыкъом ыкъом ыкъожьэу Михаил Черкасскэм, Францием къикIыгъэ музыкантым зы Iанэ сыдыпэсынэу хъугъагъэ. «Плъапсэ къызыщежьэрэр, Рэдэд лIакъом укъызэрэхэкIыгъэр ошIа?» сIуи ащ сызеупчIым, ылъапсэ къызыщежьэрэр зэришIэрэр, ащ зэрэрыгушхорэр къысиIожьыгъагъ.
Останкинэр Шереметьевхэм яхапIэу зэрэщытыгъэр бэмэ ашIэрэпщтын. Черкасскэ Алексей ыпхъоу Варварэ генералэу Петр Шереметьевым зыдэкIом, Черкасскэхэм ямылъку зэрэщытэу Шереметьевхэм яхапIэу паркхэр, унэ дахэхэр, опернэ театрэр, дворецыр къызыдэтэджагъэм изэтегъэпсыхьан пэIуагъэхьагъ. Урысыер зэрыгушхорэ Останкинэр урысхэмрэ адыгэхэмрэ язэблэгъэныгъэ исаугъэтэу щыт. Урысыем къэралыгъо гъэпсыкIэу иIэм игъэпытэн, ар пыим щыухъумэгъэным адыгэхэм яIахьышхо зэрахашIыхьагъэмкIэ джыри щысабэ къэпхьын плъэкIыщт.
Силъэпкъ тарихъ гъогоу къыкIугъэр ситхыгъэхэм къащисэIотыкIы. СитворчествэкIэ сызыфэбанэрэр тарихъ шIэжьыр къызэтегъэнэжьыгъэныр ары. Ситхыгъэхэр зыфэгъэхьыгъэхэр заохэмрэ лъышIэжьымрэ арэп. Ахэр Урысыем пытэу зэрепхыгъэр къэзыушыхьатрэ тарихъ байрэ гъэхъэгъэшхорэ зиIэ силъэпкъ дахэ къытегущыIэх. Адыгэхэмрэ Урысыемрэ зызэгъусэхэр бэшIагъэ. Адыгеир Урысыем зыгохьагъэр илъэс 465-рэ хъугъэ. Ау ащ ыпэкIэ, Мстиславрэ Рэдэдрэ зыщызэбэныгъэгъэхэ лъэхъаныр ары ар къызыщежьэрэр.
Адыгэхэр 1557-рэ илъэсым Урысыем зэрэгохьэгъагъэхэр тэрэзэу зэрэщытыгъэр щыIэныгъэм къыгъэшъыпкъэжьыгъ. Геополитикэ лъэныкъомкIи, зэблэгъэныгъэ зэфыщытыкIэ- хэм зягъэушъомбгъугъэнымкIи, лъэпкъхэм якультурэхэр зэрэгъэбаижьынхэмкIи ар лъэбэкъу тэрэзэу щытыгъ. Лъэпкъыбэ зэрыс Урысые Федерацием сызэрэщыпсэурэм, щыIакIэу иIэр Урысыешхом зэрэдэзгощрэм сарэгушхо.
Урысыер тэркIэ зынахь лъапIэ щымыIэ хэгъэгу.
МэщбэшIэ Исхьакъ.
Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIу, Урысые Федерацием IофшIэнымкIэ и ЛIыхъужъ.