Изэчый къетэжьы
ЗэлъашIэрэ адыгэ сурэтышIэу Къат Теуцожь илъэс пшIы пчъагъэм творческэ Iофышхоу ылэжьыгъэм къыкIэкIуагъ тхылъэу «Теучеж Кат. Графика» зыфиIоу Москва мы илъэсым къыщыдэкIыгъэр. Ащ иавторыр Геннадий Жигаревыр ары.
«Лажьэрэм лыжъ ешхы» (ГущыIэжъ)
Ар тхылъ-альбом, IэпэIасэм икъэлэмыпэ къыпыкIыгъэ сурэтхэу жанрэ зэфэшъхьафхэм арылъхэмкIэ — графикэм, живописым, нэмыкIхэм — зэлъыпкIагъ, сурэтышIым итворчествэ лъапсэ зэридзыгъэр ыкIи зызэриIэтыгъэр къыщыIотагъ. Тхылъыр ины, лъэгъупхъэ, IэпкIэ-лъапкIэу зэгъэзэфагъэ, нэкIубгъо 200-р зэфэдэкIэ мэ- хьанэ хэхыгъэ зиIэ сурэтшIыгъэхэмкIэ, ахэм афэгъэхьыгъэ искусствоведческэ тхыгъэхэмкIэ тегъэпсыхьагъ.
Адыгеим изаслуженнэ, Урысыем инароднэ сурэтышIэу, АР-м и Къэралыгъо премие илауреатэу Къат Теуцожь игушIуагъо дагощэу, Адыгэ Республикэм и Лъэпкъ тхылъеджапIэ альбом-тхылъыкIэмкIэ лъэтегъэуцор чъэпыогъум и 26-м щызэхащэгъагъ. Iофтхьабзэр зыпшъэ ифагъэр ыкIи зезыщагъэр тхылъеджапIэм иIофышIэу Кучмэз Аминэт.
Т. Къатым ищыIэныгъэ ыкIи итворчествэ къизыIотыкIырэ тхылъ зэфэшъхьафхэр, ежь сурэтышIым къыдигъэкIыгъэхэр, нэмыкIхэм итворчествэ къыраIуалIэхэрэр зэрыт гъэзет ыкIи журнал тхыгъэхэр, тхылъхэр щыолъэгъух «Время и художник» цIэу зыфашIыгъэ къэгъэлъэгъон баим.
Къат Теуцожь ыцIэ Адыгеим, Къэбэртаем, нэмыкI къош республикэхэм ямызакъоу, Темыр Кавказым щыпсэухэрэм ыкIи Урысыешхом щызэлъашIэ.
Тхылъ лъэтегъэуцом ягуапэу хэлэжьагъэх лъэпкъ интеллигенцием щыщхэр, еджэпIэ зэфэшъхьафхэм къарыкIыгъэ ныбжьыкIэхэр, искусствэхэмкIэ Адыгэ республикэ колледжэу У. Хь. Тхьабысымым ыцIэ зыхьырэм истудентхэр.
ТхылъыкIэм икъыдэгъэкIын гупшысэ къызыпкъырыкIыгъэр ыкIи зыфызэшIокIыгъэр Москва щыпсэурэ гъэсагъэу, телевизионнэ къэтынэу «Предки наших предков» зезыщэу, зекIолIэу Геннадий Жигаревыр арэу, Нелли Подгорскаяр зэхэгъэуцокIо-редакторэу зэрэщытыр Аминэт къыIуагъ.
Лъэтегъэуцом къекIолIагъэхэмкIи, ежь Къат ТеуцожькIи гуапэ хъугъэ видео-зэпхыныгъэкIэ Геннадий Жигаревымрэ иIофшIэгъоу Нелли Подгорскаямрэ мэфэкI Iофтхьабзэм къызэрэхэлэжьагъэхэр.
Г. Жигаревым шIуфэс сэламкIэ мэфэкIым хэлажьэхэрэм закъыфигъэзагъ, тхылъ-альбомыр къызэрэдэкIыгъэмкIэ зэкIэ адыгэ лъэпкъым ыкIи Къат Теуцожь ыгу къыдеIэу къызэрафэгушIорэр, ащ фэдэ цIыф Iушхэр зиIэ лъэпкъыр ыкIи иныбджэгъу лъапIэу, илъэс 40-кIэ узэкIэIэбэжьмэ Адыгэ хэку комсомолым Г. Жигаревым Iоф зыщишIэгъэ уахътэм нэIуасэ ежьыррэ Къатымрэ зэрэщызэфэхъугъагъэхэр къыIуагъ, зыримыгъэукIыхьэу мыщ фэдэ гущыIэхэр къыпигъэхъожьыгъэх: «Ты удивительный человек, уникальный художник, знаток истории своего адыгского народа, мой друг бесценный, твори, живи! Поздравляю с выходом книги».
Ащ пыдзагъэу къэгущыIагъ Нелли Подгорскаяр. ГущыIэ фаби, нэмыкIи ашъхьасыгъэп бзылъфыгъэр, сурэтышIэу Къат Теуцожь шIоу щыIэр къыфиIуагъ: «Iуш, гущыIэгъу гъэшIэгъон, уедэIу зэпытыгъэкIи уезэщырэп, IофшIэкIошху, IэпэIэсэгъэ иныр сурэтшIынымкIи, бзэ гъэIорышIэкIэ тхакIэмкIи зэфэдэу зыхэгощагъ, зэчый хьарамыгъэнчъэ зыхэлъ».
Лъэтегъэуцом хэлажьэхэрэми, ар зыцIэкIэ зэхащэгъэ Къат Теуцожьи мэфэкIыр шIуагъэ къытэу кIонэу, псауныгъэ ыкIи мамырныгъэкIэ къафэлъэIуагъ.
СурэтышI IэпэIасэу Къатым фэгъэхьыгъэ псэлъэ фабэ къышIыгъ ащ итворчествэ дэгъоу щыгъуазэу, адыгэ культурэр изышIыкIыпэу, КъокIыпIэм щыпсэурэ цIыф лъэпкъхэм искусствэмкIэ я Къэралыгъо музей икъутамэу Мыекъуапэ дэтым ипащэу, УФ-м, АР-м ыкIи Ингуш Республикэм культурэмкIэ язаслуженнэ IофышIэу ШъэуапцIэкъо Аминэт. Тхылъ-альбом ин лъэгъупхъэу къыдэкIыгъэмкIэ ыгу къыдеIэу авторым фэгушIуагъ. Теуцожь илъэс пшIы пчъагъэу творчествэм зыдэлажьэрэм емызэщыжь IофшIэкIошхо-гупшысакIоу зэрэщытыр къызэригъэнэфагъэр, Къатыр Адыгеим исурэтышIхэмкIэ «Урысыем инароднэ сурэтышI» щытхъуцIэ лъапIэр къызфагъэшъошэгъэ нэбгырэ закъоу зэрэщытыр, ар къызэригъэшъыпкъэжьырэр Аминэт кIигъэтхъыгъ, тапэкIи гъэхъагъэхэр ышIыхэзэ игугъэ ехьыжьагъэхэм акIэхьанэу, ышъхьэкIэ тынчыныгъэ-псауныгъэ иIэнэу къыфэлъэIуагъ.
АР-м и Лъэпкъ тхылъеджапIэ ипащэ игуадзэу Пэнэшъу Фатимэ мы тхылъыр къызэрэдэкIыгъэмкIэ пстэуми апэу Къатым фэгушIуагъ. Ащ пыдзагъэу, тхылъ-альбомыр ыIэгу илъэу Лъэпкъ тхылъеджапIэм къакIуи, тхылъ 14-р Теуцожь шIухьафтын къызэрафишIыгъэр акъылыгъэ-Iушыгъэу филъэгъугъ, Т. Къатым итхылъ-альбом фэсакъэу зэраухъумэщтыр ыкIи цIыфхэр ащ фагъэнэIосэнхэм зэрэпылъыщтхэр къыIуагъ.
МэфэкIым хэлэжьагъ ыкIи къыщыгущыIагъ АР-м исурэтышIхэм я Союз итхьаматэу, Урысыем исурэтышIхэм я Союз хэтэу Елена Абакумовар. Къат Теуцожь ыIэхэм ямызакъоу, ыгуи ышъуи сыд фэдэрэ IофымкIи дышъэр къапызэу ылъытагъ. Зызигъэпсэфырэри Iоф зыщишIэрэри къэпшIэнэу щымытэу, зыфэдэр къэмыхъугъэ IофшIакIоу зыкъызэрэзэIуихыгъэр, лъэныкъуабэкIэ, искусствэм гъогу ин зэрэщыпхырищырэр, ыIэхэм, ыгу гъэпсэфыгъо аримытэу, зэрэлажьэрэр, ышIэрэм гухахъо зэрэхигъуатэрэр къыIуагъ, тхылъ-альбомыр творческэ IофшIэгъэшхоу, нэбгырищымэ — Къат Теуцожь, Геннадий Жигаревым ыкIи редактор-зэхэгъэуцуакIоу Нелли Подгорскаям — зэдалэжьыгъэу ылъытагъ, яшIу зэфэдэу афэбэгъонэу къафиIуагъ.
МэфэкIым хэлэжьагъэх зэшъхьэгъусэхэу, гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм иотдел зэфэшъхьафхэм яIофышIэхэу, филологие шIэныгъэхэмкIэ докторэу Къуекъо Асфаррэ искусствоведениемкIэ кандидатэу Къуекъо Маринэрэ. Ныбджэгъуныгъэу илъэсыбэм зэфыряIэр яIэубытыпIэу ахэр къэгущыIагъэх, тхылъыкIэм купкIышхуи ащ диштэрэ шъуаши зэриIэр кIагъэтхъыгъ. СурэтшIыным имызакъоу, Къатым тхэн-гупшысэн зэчый ин зэрэхэлъыр, сыдрэ Iофи шъо зэрэфишIырэр, зиIоф зыгъэшIурэр цIыфхэм зэрагъашIорэм мы тхылъ-лъэтегъэуцор зэрищысэр Асфар кIигъэтхъыгъ.
Тхылъ-альбомыр ащ иавторэу Г. Жигаревым игущыIэ къызэIуехы. Ащ къыкIэлъыкIоу шъхьэхэр къыщытыгъэх: адыгэ литературэм ипроизведениехэм атешIыкIыгъэхэр, лъэпкъ мэкъамэхэр, гукъэкIыжьхэр, зекIохэр, адыгэ пшысэхэм атехыгъэхэр, грузин литературэмкIэ сурэтшIыгъэхэр, адыгэ фольклорымрэ цIыф лъэпкъ зэфэшъхьафхэм япшысэхэмрэкIэ авторым итхьапэхэр, Тыркуем зэрэщыIагъэр. 2019 — 2020-рэ илъэсхэм графикэр ыкIи Т. Къатым ищыIэныгъэ, итворчествэ къизыIотыкIыхэрэр.
МэфэкI лъэтегъэуцор дахэу, фэбагъэ хэлъэу кIуагъэ, хэлэжьэгъэ пстэуми «тхьауегъэпсэур» къалэжьыгъ, тхылъыкIэм лъэпэ мафэ ыдзынэу фэтэIо.
Мамырыкъо Нуриет.