Адыгэ культурэм фэгъэхьыгъагъ
АР-м и Къэралыгъо программэу «Лъэпкъ зэфыщытыкIэхэр гъэпытэгъэнхэр, цIыфхэм патриотическэ пIуныгъэ ягъэгъотыгъэныр» зыфиIорэм къыдыхэлъытагъэу мы мафэхэм Iэнэ хъурае зэхащагъ.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитетрэ Адыгэ къэралыгъо университетымрэ ащ кIэщакIо фэхъугъэх.
«КультурэмкIэ лъэпкъ зэгурыIоныгъэм къыфэкIогъэныр» зыфиIорэ Iофтхьабзэр Адыгеим къэралыгъо гъэпсыкIэ зиIэр илъэси 100 зэрэхъугъэм рапхыгъ. Адыгэ культу- рэм нахь игъэкIотыгъэу тегущыIагъэх.
Iофтхьабзэм хэлэжьагъэх ыпшъэкIэ зыцIэ къетIогъэ комитетым, общественнэ организациехэм ялIыкIохэр, АКъУ-м икIэлэегъаджэхэр ыкIи истудентхэр.
Iэнэ хъураем испикер хъугъэх Адыгэ къэралыгъо университетым ишIэныгъэлэжьхэу, филологие шIэныгъэхэмкIэ докторэу, профессорэу Багъырэкъо Хьазрэт, филологие шIэныгъэхэмкIэ кандидатэу, доцентэу Хьамырзэкъо Нуриет, филологие шIэныгъэхэмкIэ кандидатэу, доцентэу Ахъмэт Джульеттэ. Iофтхьабзэр зэрищагъ тарихъ шIэныгъэхэмкIэ кандидатэу, доцентэу Цэй Заремэ.
Лъэпкъ зэфэшъхьафхэм азыфагу зэгурыIоныгъэ илъынымкIэ культурэм мэхьанэ ин зэриIэр Iофтхьабзэм къекIолIагъэхэм къаIуагъ. Культурэмрэ литературэмрэ зэпхыныгъэу яIэм, ижъырэ шэн хабзэхэр къызэтегъэнэжьынымкIэ гумэкIыгъоу къэуцухэрэм атегущыIагъэх.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр ыцIэкIэ ащ игуадзэу Константин Щербаковым къэзэрэугъоигъэхэм шIуфэс къарихыгъ.
— БэмышIэу урыс культурэм фэгъэхьыгъэ Iофтхьабзэ щыIагъ, джы непэ адыгэ культурэм тытегущыIэщт. Тикъэралыгъо лъэпкъ зэгурыIоныгъэ зэрилъыр ащ къеушыхьаты, — къыIуагъ Константин Щербаковым.
Лъэпкъ зэгурыIоныгъэм фэгъэхьыгъэ Iофтхьэбзэ зэфэшъхьафхэр республикэм зэрэщызэхащэхэрэм ишIуагъэкIэ мамырныгъэ тишъолъыр зэрилъыр Iофтхьабзэм къекIолIагъэхэм къаIуагъ. НэмыкI цIыф лъэпкъхэм якультурэ зэгъэшIэгъэным шIогъэ ин зэрэпылъыр спикерхэм хагъэунэфыкIыгъ.
ДЕЛЭКЪО Анет. Сурэтхэр Iэшъынэ Аслъан тырихыгъэх.