ПсэупIэу Красногвардейскэм искусствэхэмкIэ икIэлэцIыкIу еджапIэ «На русском гулянье» зыфиIорэ концертыр щыкIуагъ.

Адыгэ Республикэм и Къэралыгъо филармоние урыс лъэпкъ Iэмэ-псымэхэмкIэ и Къэ­ралыгъо оркестрэу А. Шипитьком ыцIэ зыхьырэ «Русская удалым» хэгъэгум икомпозиторхэу В. Коновым, А. Прибыловым, А. Широковым аусыгъэ произведениехэр къыригъэIуагъэх.

Анастасия Истамуловам, Николай Никишиным урыс ­лъэпкъ орэдхэр къаIуагъэх. Урыс лъэпкъ сэмэркъэу орэдхэри артистхэм агъэжъынчы­гъэх. Цэй Любовь домрэмкIэ, Анатолий Быковым балалай­кэмкIэ, Александр Титаренкэм пщынэмкIэ, нэмыкIхэм орэды­шъохэр къырагъэIуагъэх.

— Лъэпкъ проектэу «Культурэм» хэхьэрэ Iофыгъохэр агъэцакIэхэзэ, 2021-рэ илъэсым къыщегъэжьагъэу искусст­вэхэмкIэ кIэлэцIыкIу еджапIэр зэтырагъэпсыхьажьыгъ, — къы­Iуагъ Красногвардейскэ еджапIэм ипащэу Ольга Серовам. — IэпыIэгъу къытфэхъугъэхэм лъэшэу тафэраз. Концертхэр, пчыхьэзэхахьэхэр зэхэтщэнхэм тиеджапIэ афытегъэпсыхьагъэ хъугъэ.

Оркестрэу «Русская удалым» ихудожественнэ пащэу, Адыгэ Республикэм инароднэ артистэу Андрей Ефименкэм къызэри­Iуагъэу, ащ фэдэ концертхэр тапэкIи зэхащэщтых, искусствэм пIуныгъэ мэхьанэу иIэр къэIэтыгъэным пылъыщтых. Культу­рэр, искусствэр зышIогъэшIэ­гъонхэм алъыкIощтых.

Сахьидэкъо Нурбый.