Черкес медиаплатформэр
Мысатыу организациеу «Черкесская медиаплатформа» зыфиIорэм Адыгеим Iоф зыщишIэрэр илъэс хъугъэ. Ащ ипащэу ЛIыхъукIэ Айдэмыр нэIуасэ шъуфэтэшIы.
Ар журналистикэм ылъэныкъокIэ Адыгэ Республикэм и ЛIышъхьэ ишIухьафтын къызфагъэшъошагъэхэм ащыщ. Адыгеим и Къэралыгъо Совет — Хасэм и НыбжьыкIэ парламент, Урысые Федерацием и Къэралыгъо Думэ и НыбжьыкIэ парламент и Экспертнэ совет ахэт.
Мысатыу организациеу «Черкес (Адыгэ) медиаплатформэм» ипащэ илъэсым къадэхъугъэм, яIофхэр зэрэлъыкIуатэхэрэм, гухэлъышIоу яIэхэм нэIуасэ тафишIынэу редакцием къедгъэблэгъагъ.
— Айдэмыр, медиаплатформэр зэхэпщэнэу зэрэхъугъэр, ар зыфэгъэхьыгъэр къытфэIуатэх.
— Адыгэ лъэпкъым итарихъ гъогу, культурнэ кIэн баеу иIэр апшъэрэ еджапIэм щызэзгъэшIагъ. Ахэр адыгэ цIыф пстэуми агъэлъэпIэнхэ фае, ау, гукъаоми, адыгабзэр чIэтынэнэу едгъэжьагъ. КIэлэцIыкIу IыгъыпIэхэм янахьыбэм ныдэлъфыбзэр ащагъэфедэрэп. Тыбзэ анахь бзэжъэу дунаим тетхэм ахалъытэ, ау тисабыйхэм икъоу аIулъыжьэп.
Адыгабзэр зиныдэлъфыбзэ пстэури зэфэзыщэнхэ зылъэкIыщт организацие зэрэтищыкIагъэр нафэ къэхъугъ. Къэрэщэе-Щэрджэсым щызэхащэгъэгъэ форумэу «Черкесы будущего» зыфиIорэм хэлажьэхэрэм зэхахэу, зигъо къэсыгъэу, гъэцэкIэгъэн фэе Iофыгъохэм ащыщэу слъыти, «Черкес медиаплатформэм» игъэпсын иIофыгъо къахэслъхьэгъагъ. Апэрэ илъэсныкъом зэхэщэн Iофхэм тапылъыгъ, джы кураторхэр Адыгеимрэ Къэбэртэе-Бэлъкъарымрэ ащытиIэх, IофшIэныр едгъэжьагъ.
— Пшъэрылъ шъхьаIэу шъуиIэр, анахьэу къыжъудэхъунэу шъузыфаер…
— КIэлэцIыкIухэм шIу алъэгъурэ мультфильмэхэр дгъэфедэзэ яцIыкIугъом къыщегъэжьагъэу ахэр адыгабзэкIэ гущыIэхэу дгъэсэнхэр ары. Ащ пае мультфильмэхэр адыгабзэкIэ зэтыдзэкIынхэ фае.
Илъэси 5 — 13 зыныбжь кIэлэцIыкIухэм мыщ фэдэ мультфильмэхэр алъэгъухэмэ, зэхахымэ, ныдэлъфыбзэм рыгущыIэхэу рагъэжьэщт. Сабыир засэрэр къыIожьыщт.
Адыгеими Къэбэртэе-Бэлъкъарыми гъэсэныгъэмкIэ яминистерствэхэм зэзэгъыныгъэхэр адэтшIыгъэх кIэлэцIыкIу IыгъыпIэхэм, еджапIэхэм, кружокхэм мультфильмэхэр къащагъэлъэгъонхэу.
— КIэлэцIыкIухэм мультфильмэхэр сыдэущтэу къафыхэшъухыхэра, ахэм мэхьанэу яIэр къыдэшъолъыта?
— Мы лъэхъаным мультфильми 126-рэ къэтщэфыгъах. Ахэр адыгабзэкIэ зэтыдзэкIынхэу едгъэжьагъ. Iофым хэшIыкI фызиIэ цIыфхэр къедгъэблэгъагъэх. Мультфильмэхэр адыгабзэкIэ ыкIи къэбэртэябзэкIэ зэрадзэкIых.
Ежьхэм агу рихьэу, ашIогъэшIэгъонэу зэплъыхэрэр арых къыхэтхыхэрэр. Ахэм зэу ащыщ мы лъэхъаным зэрэ Урысыеу щызэлъашIэгъэ мультфильмэу «Мимимишки» зыфиIорэр. Фильмишъэу къэтщэфыгъэхэм япчъагъэ джыри хэдгъахъо тшIоигъу.
— Текстыр зэбдзэкIыныр, макъэр тептхэныр, зэтебгъэфэныр къин, адыгабзэри дэгъоу пшIэн фае. Хэта о Iоф къыбдэзышIэхэрэр, IэпыIэгъу къыпфэхъухэрэр?
— Ахэр кIэлэегъаджэх, журналистых, волонтерых, нэмыкIых. Инэу сафэраз IэпыIэгъу къызэрэсфэхъухэрэмкIэ. Спонсорхэр тищыкIагъэх, къытхахьэ зышIоигъохэр зэкIэ къетэгъэблагъэх.
— Техникэм ылъэныкъокIэ шъузфэещтхэр зэжъугъэуIугъэха?
— ТищыкIэгъэ пстэум щыщэу процент 60 фэдизыр ары къэтщэфышъугъэр. Мы илъэсым грантхэм якъыдэхын тыхэлэжьагъ, ау къыддэхъугъэп. КъэкIорэ илъэсыми тыфэбэнэщт, тыгу дгъэкIодырэп. Кураторхэр тиIэх, ахэм инэу тащэгугъы, Iофэу етхьыжьагъэр зэрэдгъэцэкIэщтым тицыхьэ телъ.
Джащ фэдэу тицыхьэ телъ «Черкес медиаплатформэм» къыготэу ишIуагъэ къезгъэкIырэ черкес тарихъ-географическэ обществэм.
— Iофэу ешъухьыжьагъэм къыхэлажьэхэрэр сыд фэдэ субъектхэм ащыпсэухэра?
— Ахэр Адыгэ Республикэм, Къэбэртэе-Бэлъкъарым, Къэрэщэе-Щэрджэсым, Краснодар ыкIи Ставрополь крайхэм арысых. ТапэкIэ IэкIыб хэгъэгухэм ащыпсэурэ тилъэпкъэгъухэми танэсынэу тэгугъэ.
— Шъуигухэлъхэр къыжъудэхъунхэу тышъуфэлъаIо, Айдэмыр.
— Тхьауегъэпсэу.
ДэгущыIагъэр Шъаукъо Аслъангуащ.