Тарихъыр сурэтхэмкIэ зэогъашIэ
Фольклорым искусствэм чIыпIэу щыриIэм фэгъэхьыгъэ къэгъэлъэгъон Мыекъуапэ къыщызэIуахыгъ.
Адыгэ Республикэм культурэмкIэ и Министерствэ исурэт къэгъэлъэгъуапIэ щыкIогъэ зэхахьэм нэбгырабэ хэлэжьагъ. АР-м исурэтышIхэм я Союз итхьаматэу Елена Абакумовам зэIукIэгъур пэублэ гущыIэкIэ къызэIуихыгъ.
ЗэлъашIэрэ сурэтышIэу, архитекторэу Бырсыр Абдулахь фольклорымрэ искусствэмрэ язэпхыныгъэхэр дэхагъэм къызэрэпкъырыкIыхэрэр зэфихьысыжьыгъэх. «Лъэпкъ шIэжьым, тарихъым яхьылIэгъэ сурэтхэр жъы хъухэрэп, уагъэгъуазэ», — къыIуагъ А. Бырсырым.
Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт анахьэу ынаIэ зытыридзагъэр сурэтышIхэм щыIэныгъэм илъэныкъуабэ къызэлъаубытызэ искусствэм ыбзэкIэ фольклорыр къызэрагъэлъагъорэр ары.
ГъукIэм кIыщым Iоф зэрэщишIэрэм ехьылIэгъэ сурэтым А. ШъэуапцIэкъор къытегущыIэзэ нартхэм яIэпэIэсэныгъэ, ягуетыныгъэ къыхигъэщыгъэх. Зэхахьэм щызэIукIэгъэ студентхэм, ныбжьыкIэхэм яшIэныгъэ хагъэхъонымкIэ ащ фэдэ къэгъэлъэгъонхэр ящыкIагъэх.
Композиторэу, пщынаоу, лъэпкъ IэпэIасэу Лъэцэрыкъо Кимэ ышIыгъэ шыкIэпщынэр къэгъэлъэгъуапIэм ичIэхьапIэ щыолъэгъу, бзэпсхэр кIэракIэх. ШыкIэпщынэр зэкIужьэу гъэпсыгъэшъ, къапштэ пшIоигъоу уеплъы — лъэпкъ орэдышъор бгъэжъынчыным фэшI.
Лъэпкъ IэпэIасэу, сурэтышIэу, АР-м искусствэхэмкIэ икIэлэцIыкIу еджапIэу К. Лъэцэрыкъом ыцIэ зыхьырэм икIэлэегъаджэу ГъукIэ Замудин пIуаблэу ышIыгъэр лъэгъупхъ. Адыгэхэм ятарихъ куоу зэрэщытыр IофшIагъэм къеушыхьаты. ПIуаблэр зэрашIырэ шIыкIэм студентхэм ащыщхэр къыкIэупчIагъэх.
Адыгэ Республикэм инароднэ сурэтышIэу Хъуажъ Рэмэзан пхъэм хишIыкIыгъэм «МэфэкI» фиусыгъ. Лъэпкъыр мэуджы, шыгъачъэхэм гур зыфащэ.
СурэтышI цIэрыIоу Гъогунэкъо Мухьарбый хэдыкIын Iофхэм афэIэпэIас. Пшъашъэм пщынэр егъэбзэрабзэ, пхъэкIычаор къыдежъыу. Шъонтрыпым теорэм лъэпкъ орэдышъом тамэ реты.Шъо зэфэшъхьафхэмкIэ гъэкIэрэкIагъэшъ, уеплъызэ, сурэтым итхэм уадэгущыIэ пшIоигъоу уахътэ къыхэкIы.
Абрэдж Гощэфыжь, Елена Абакумовам, нэмыкIхэм ашIыгъэ сурэтхэри искусствэм, фольклорым япхыгъэх. ЩыIэныгъэм щыщ пычыгъохэр нэгум къыкIагъэуцох. Тыгъужъ Мыхьамодэ шыкIэпщынаом игупшысэхэм уахищэ шIоигъоу сурэтыр зэкIужьэу ышIыгъ. Лъэхъанэу зыхэтым шыкIэпщынэр «къытегущыIэу» сурэтышIым елъытэ.
Урысыем инароднэ сурэтышIэу, УФ-м итхакIохэм я Союз хэтэу Къат Теуцожь «Сикъуадж», «ЗэдэгущыIэгъухэр», «Орэдышъохэу гум щыщ хъугъэхэр» зыфиIохэрэр, нэмыкIхэри гъэшIэгъонэу ыгъэпсыгъэх. Сурэтхэм уяплъызэ Гъобэкъуае гум «щэчэрэгъу», цIыфэу дэсхэм уарегъэгупшысэ, уахахьэ пшIоигъо уешIы. Сурэтхэм арытхэм ащыщхэр къэпшIэжьырэм фэдэхэу уяплъы…
Тыгъужъ Мыхьамодэ «Нысащ» зыфиIоу ышIыгъэ сурэтыри зэгъэпшэнхэм къахэбгъэщызэ, хъугъэ-шIагъэр чIыпIэу зыщыкIорэм урегъэгупшысэ.
Пшъашъэмрэ хъулъфыгъэмрэ шым зэдытесых, купым хэтых. Хъулъфыгъэхэм адыгэ шъуашэр ащыгъ, шыухэр бэ мэхъух. Джэгум зеушъомбгъу, хъярым лъагэу зеIэты…
Непэ ащ фэдэ нысащэ тымылъэгъурэми, тарихъым гукIэ зыфэбгъэзэжьмэ, адыгэхэм яискусствэ баеу зэрэщытыр къыхэогъэщы, фольклорым къыхахыгъэ орэдхэр гум къылъэIэсых.
«ЛIыжъищмэ язэнэкъокъу» зыфиIорэ сурэтэу Бырсыр Абдулахь ышIыгъэри щыIэныгъэм щыщ. ЛIэшIэгъухэм яхьылIэгъэ сурэтхэр тарихъым иIотакIох. ЗэлъашIэрэ археологэу, сурэтышIэу ЛэупэкIэ Нурбый исурэтхэр псынкIэу къэошIэжьых. Плъыжьышъор, уцышъор къыхигъэщыхэзэ лъэпкъ шэн-хабзэхэм афэгъэхьыгъэ IофшIагъэхэр къегъэлъагъох.
Адыгеим ипрофессиональнэ сурэтышIхэм яIофшIэгъэ 60 фэдиз къагъэлъагъо. Бгъэфедэн плъэкIыщт искусствэм, шэн-хабзэхэм, Урысыем щыпсэурэ лъэпкъхэм ящыIэкIэ-псэукIэ яхьылIэгъэ сурэтхэр дахэх, лъэгъупхъэх. Гъогунэкъо Мухьарбыйрэ Бырсыр Абдулахьрэ язэдэгущыIэгъу къыщыхагъэщыгъ сурэтхэм лъэпкъхэр, лIэужхэр зэрэзэфащэхэрэр, тарихъыр къызэраIуатэрэр.
ЗэхэщакIохэм искусствэр зышIогъэшIэгъонхэр къэгъэлъэгъоным еплъынхэу рагъэблагъэх. Ар шэкIогъум и 6-м зэфашIыжьыщт.
ЕмтIылъ Нурбый.