Адыгэ Республикэм и ЛIышъхьэу КъумпIыл Мурат УФ-м и Пре­зидент и Указэу Къыблэ федеральнэ шъолъырым ирегион­хэм гъэлъэшыгъэ шIы­кIэм ишапхъэхэр ащыгъэцэкIэгъэнхэм тегъэпсыхьагъэу Адыгеим щызэхащэгъэ оперативнэ шта­бым иапэрэ зэхэсыгъо тыгъуасэ зэри­щагъ.

Адыгеим и ЛIышъхьэ ащ фэдэ режимым къыпкъырыкIырэ гу­хэлъхэмрэ пшъэрылъхэмрэ агу къыгъэкIыжьыгъэх, Президентэу Владимир Путиным и Указ дэх имыIэу гъэцэкIэгъэным мэхьанэшхо зэриIэри къыхигъэщыгъ.

«Урысые Федерацием и Президент и Указ диштэу шъолъыр­хэм япащэхэм унэшъо гъэнэфагъэхэр аштэнхэмкIэ фитыныгъэ тедзэхэр яIэ хъугъэх. Ахэр зэпхыгъэхэр цIыфхэмрэ чIыпIэхэмрэ къэухъумэгъэнхэмкIэ, чIыопс ыкIи техногеннэ нэшанэ зиIэ ошIэ-дэмышIагъэ зыхэлъ тхьамыкIагъохэм цIыфхэр ащыухъумэгъэнхэмкIэ, Урысые Фе­дерацием и УIэшыгъэ КIуачIэ­хэм яфэныкъоныгъэхэм атегъэ­псыхьэгъэ Iофтхьабзэхэр зэшIохыгъэнхэмкIэ Iофыгъохэр зэ­­рахьанхэр ары. Джащ фэдэу общественнэ рэхьатныгъэм икъэухъумэн гъэлъэшыгъэнымкIэ, транспортым, коммуникациехэм ыкIи зэпхыныгъэхэм, джащ фэдэу энергетикэм япхыгъэ псэуалъэхэу мэхьанэшхо зиIэхэр къэухъумэгъэнхэр ыкIи нэмыкI Iофтхьабзэхэр зэшIохыгъэнхэр ары а унашъохэр зэпхыгъэхэр», — къыхигъэщыгъ КъумпIыл Мурат.

АР-м и ЛIышъхьэ къызэриIуа­гъэмкIэ, фитыныгъэ тедзэхэм къарыкIырэп ащ лъыпытэу а Iофтхьабзэхэр агъэцэкIэнхэу. Оперативнэ штабыр ахэплъэщт ищыкIэгъэ Iофтхьабзэхэр загъэ­цэкIэщтхэ пIалъэхэм, ахэм хэу­шъхьафыкIыгъэ нэшанэу яIэщтхэм ыкIи ахэм ателъытагъэу республикэм гумэкIыгъоу къитэджэн ылъэкIыщтымрэ джы­рэ лъэхъаным ащ изытетрэ къы­далъытэхэзэ а Iофтхьабзэ­хэр зэшIуахыщтых.

Зэхэсыгъом къызэрэщыхагъэ­щыгъэмкIэ, республикэм джырэкIэ иIофхэм зыпкъитыныгъэ нэшанэ яIэу щыт. Адыгеим игъу­напкъэхэр зэфэшIыгъэнхэм фэгъэхьыгъэ унашъо щыIэп. Хэ­бзэгъэуцугъэу щыIэр укъуагъэ мыхъуным пае полицием иIофышIэхэр гъэлъэшыгъэ шIыкIэм тетэу къулыкъур хьыгъэным тыращагъэх. Терроризмэм пэшIуекIогъэнымкIэ, ащкIэ щынэгъончъагъэ щыIэнымкIэ Iофтхьа­бзэхэу зэрахьэхэрэм игъэкIоты­гъэу къащыуцугъ Адыгэ Рес­публикэм хэгъэгу кIоцI IофхэмкIэ иминистрэ игуадзэу Андрей Остапенкэр. Ащ къызэрэхигъэщыгъэмкIэ, экстремизмэ ыкIи нэмыкI нэшанэ зиIэ хэбзэукъо­ныгъэхэр къэмыхъунхэм пае хэбзэухъумэкIо къулыкъухэм, ха­бзэмрэ гъэIорышIэнымрэ япхыгъэ къулыкъухэм адэлэжьэгъэнымкIэ пшъэдэкIыжь зы­хьыщт цIыфхэр агъэнэфагъэх. Полицием инарядхэр нахьыбэ ашIыгъэх, республикэм щыIэныгъэу илъыр укъуагъэ мыхъуным епхыгъэу транспортым иуплъэ­кIун хэдзэ-хадзэу ауплъэкIу, «Пропускной режимкIэ» заджэ­хэрэм тегъэпсыхьэгъэ Iофтхьабзэхэр агъэлъэшыгъэх, вокзалым ыкIи ащ къыпэIулъ чIыпIэм ухъумэныгъэм епхыгъэ Iофтхьабзэхэр ащызэшIуахых, нэмыкI къалэхэм къарыкIыгъэ автобусхэм арысхэр ауплъэкIух.

«Iофтхьабзэу зетхьэхэрэр зэ­диштэхэу щытынхэ фае, егъэ­лыегъащэ къахэдгъафэ хъущтэп. Сакъыныгъэм дакIоу цIыф­хэми тафэгумэкIын, тынаIэ атедгъэтын фае. Республикэм щыIакIэу илъыр щынэгъончъагъэм епхыгъэ IофыгъохэмкIэ тыукъо, цIыфхэр дгъэгумэкIыщэхэ е дгъащтэ­хэ хъущтэп. Ащ пае джырэкIэ ушъхьагъу гори щыIэп», — къы­хигъэщыгъ Адыгэ Республи­кэм и ЛIы­шъхьэ.

Гъэстыныпхъэ-энергетическэ комплексым къыхиубытэрэ псэуа­лъэхэм терроризмэм пэшIуекIорэ хэбзэгъэуцугъэу щы­Iэр ащыгъэцэкIэгъэным иIофыгъуи зэхэсыгъом щытегущыIагъэх. Адыгэ Республикэм эконо­микэ хэхъоныгъэмкIэ ыкIи сатыумкIэ иминистрэу Шэуджэн Заур къызэриIуагъэмкIэ, ТЭК-м ипредприятиехэм къэплъыхьан Iофтхьабзэхэр ащызэрахьэх, цIыфхэм макъэ зэрарагъэIущт системэм, джащ фэдэу видеошIыкIэм тетэу зэралъыплъэщтхэ пкъыгъохэм язытет, цIыфхэм якъэухъумэнкIэ агъэфедэрэ амал пстэуми яухьазырыныгъэ ауплъэкIущт. СатыушIыпIэхэм афэгъэхьыгъэу угущыIэн хъумэ, ахэми инструктажхэр афашIыщтых, цIыфхэр агъэкощынхэ хъумэ, икIыпIэу яIэхэр зыфэдэ­хэр, гумэкIыгъо горэ къэхъумэ, зытеIункIэщтхэ кнопкэхэм Iоф зэрашIэрэр ауплъэкIугъ.

Адыгэ Республикэм псауны­гъэр къэухъумэгъэнымкIэ иминистрэу Мэрэтыкъо Рустем псау­ныгъэм икъэухъумэнкIэ организа­циехэм терроризмэм пэшIуекIорэ Iоф­тхьабзэхэу ащызэрахьэхэрэм афэгъэхьыгъэу къыIотагъ. Тыдэ­кIи инструктаж тедзэхэр афашIыгъэх, IофышIэхэмрэ сымаджэхэм­рэ зэрагъэкощыщтхэ схемэхэр икIэрыкIэу ауплъэкIужьыгъэх, макъэ зэрарагъэIущт, видеошIыкIэм тетэу алъыплъэнхэмкIэ, машIом щыухъумэгъэнхэмкIэ системэхэм язытет ауплъэкIугъ. Адыгеим и ЛIышъхьэ пшъэрылъ къыгъэуцугъ Iэзэгъу уцхэр аIэ­кIэгъэхьэгъэнхэу, препаратэу ящыкIэгъэщтым телъытэгъэ IэпэчIэгъанэри агъэнэфэнэу.

Гъэсэныгъэ зыщарагъэгъотырэ чIыпIэхэми уплъэкIун тедзэ­хэр ащызэхащагъэх, щынэгъончъагъэмкIэ Iофтхьабзэхэр агъэ­лъэшыгъэх. КъэбарлъыгъэIэс IофшIэнымкIи Интернетыр къызфагъэфедэ. Ащ фэгъэхьыгъэу къыIотагъ Адыгэ Республикэм гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцакIэу Евгений Лебедевым. Муниципалитетхэм уплъэкIун тедзэхэр ащызэхащэнхэу, гъэсэ­ныгъэ зыщарагъэгъотырэ ор­ганизацие пэпчъ терроризмэм пэшIуекIорэ Iофтхьабзэхэр ащагъэцакIэхэзэ ашIынэу Респуб­ликэм и ЛIышъхьэ пшъэрылъ къафишIыгъ.

Инфраструктурэм ипсэуалъэ­хэр щынэгъончъэу щытынхэмкIэ Iофтхьабзэу зэрахьэхэрэм афэгъэхьыгъэу къыIотагъ Адыгэ Рес­публикэм псэолъэшIынымкIэ и Министерствэ ипащэу Валерий Картамышевым. Ащ къызэрэхигъэщыгъэмкIэ, транспортыр щынэгъончъэу щытынымкIэ инфраструктурэр паспортхэм зэрадиштэрэр республикэм щау­плъэкIугъ. Лъэмыджхэм якъэу­хъумэнкIи Iофтхьэбзэ гъэнэфагъэхэр зэрахьэх. ПсыIыгъыпIэ­хэмрэ псырыкIуапIэхэмрэ якъэу­хъумэн агъэлъэшыгъ. МУП-у «Водоканалыр» гъэлъэшыгъэ режимым техьагъ, псыIэпэчIэгъанэ щыI, зыпкъигъэуцожьын IофшIэнхэр псынкIэу зэшIохыгъэнхэм иамал щыIэным тегъэ­псыхьэгъэ Iофтхьабзэхэр зэра­хьэх.

Адыгэ Республикэм и ЛIы­шъхьэ мэшIокугъогу вокзалыр щы­нэгъончъэу щытынымкIэ, джащ фэдэу къалэм имызакъоу, къоджэ псэупIэхэми щыIэны­гъэм епхыгъэ псэуалъэхэу адэтхэр къэухъумэгъэнхэмкIэ язэдэлэ­жьэныгъэ агъэлъэшынэу пшъэ­рылъ афишIыгъ. Муниципалитетхэм япащэхэм джащ фэдэу пшъэрылъ афишIыгъ цIыфхэм зызщагъэбылъын алъэкIыщт чIы­пIэхэм яспискэхэр зэхагъэу­цонхэу, зыкъэухъумэжьыным иамалхэр аIэкIэгъэхьэгъэнхэмкIэ Iофхэм язытет ауплъэкIунэу.

ОшIэ-дэмышIагъэ зыхэлъ тхьамыкIагъо къэхъумэ цIыфхэр къызэраухъумэщтхэмкIэ Iофтхьа­бзэхэу агъэнафэхэрэм игъэкIотыгъэу къатегущыIагъ Адыгэ Республикэм цIыфхэм якъэу­хъумэнкIэ ыкIи ошIэ-дэмышIагъэ зыхэлъ тхьамыкIагъохэм ахэр ащыухъумэгъэнхэмкIэ и Комитет итхьаматэу Станислав Илющенкэр.

ИкIэухым Адыгеим и ЛIышъхьэ анаIэ тыраригъэдзагъ Урысые Федерацием и Президент и Указ мэхьанэу иIэм, ащ дакIоу оперативнэ штабым хэт пстэуми пшъэрылъ афишIыгъ зигугъу къашIыгъэ Iофыгъохэм ягъэцэ­кIэн фежьэнхэу, «Единэ Россием» шIушIэ Iофтхьабзэу зэри­хьэхэрэм, волонтер Iофыгъохэм ападзэжьынэу. Мыщ хэхьэ Iоф­тхьабзэу «#МЫВМЕСТЕ» зыфиIорэр.

АР-м и ЛIышъхьэ ипресс-къулыкъу