Шэсэу шъузаубытыкIэ шъузэрэзекIощтыр
ГухэкI нахь мышIэми, террористхэм хэти шэсэу аубытын зэралъэкIыщтым тыщыухъумагъэп. Арэу щыт нахь мышIэми, хэукъоныгъэхэр тымышIынхэм ыкIи тищыIэныгъэ къызэтедгъэнэным афэшI шэпхъэ гъэнэфагъэхэр щыIэх.
Шэсэу шъуаубытыным ищынагъо инэшанэхэм гу алъышъутагъэмэ, а чIыпIэм псынкIэу шъукъызэрэIукIыщтым шъунаIэ тешъудз. Зыжъугъэбылъыгъэмэ, террористхэр IукIыжьыфэхэ шъукъыхэмыкI, амал щыIэ зэрэхъугъэм тетэу а чIыпIэр къэшъубгын.
УIэшыгъэ бзэджашIэхэм шъуапэкIэфэнэу гу лъышъутагъэмэ, нахь псынкIэу шъузэрэчъэщтым шъупылъ. Зыжъугъэбылъынэу мыхъоу шэсэу шъуаубытыгъэмэ, зыжъугъэрэхьат, шъугу шъумыгъэкIод, мэкъэ самбыркIэ шъуадэгущыI. Шъузэрэщтагъэр къызхэшъумыгъэщ ыкIи агу жъугъэшъэбэнэу лъэIухэр афэшъумыгъаз. КъышъуаIорэр жъугъэцакIэ, адрэ аубытыгъэхэм алъэныкъокIэ зэрахьэрэ зекIуакIэхэм шъуапымылъ. Шъуигупсэхэм е хэбзэ ухъумакIохэм шъуафытеонэу шъуфемыжь. ШъуизекIуакIэкIэ террористхэм анаIэ къызтыряшъумыгъэгъадз. ШъуиIоф нахь дэй хъун ылъэкIыщтышъ, ахэм шъуапэмыуцужь.
Шэсэу шъуаубытыгъахэ зыхъукIэ къыкIэшъуIэжьынэу шъуфемыжь, ар нахь пасэу шIушIэнэу щытыгъ. Арэущтэу мыхъугъэмэ, ушэтыпIэ къин шъуапэ къикIын зэрилъэкIыщтым психологическэу зыфэжъугъэхьазыр. Зэу шъхьафит шъузэрамышIыщтыр, ащ охътэ гъэнэфагъэ зэрэтешIэщтыр зыщышъумыгъэгъупш.
ШъукъарагъэтIупщыжьыным епхыгъэ Iофтхьабзэр зырагъажьэкIэ, шъхьаныгъупчъэхэм, пчъэхэм, террористхэм нахь шъузэрапэчыжьэщтым шъупылъ. Унэр аштэ зыхъукIэ, шъуIэхэр шъушъхьэпхэтыку щызэрэжъугъэубытыхи, шъунэгу егъэзыхыгъэу джэхашъом шъутегъуалъхь. Амал зэриIэкIэ, машIор псынкIэу зэлъызыкIурэ щыгъынэу шъущыгъхэр зыщышъух, бгырыпххэр, Iалъмэкъхэм арылъ къопсхэр шъуиджыбэмэ арышъулъхьэх — ахэр лъыр ежъугъэубытынымкIэ къышъушъхьапэжьыщтых.
Iашэр шъумыубыт, ежь террористхэм шъуахагъэкIон алъэкIыщт. ЗыгорэкIэ къэорэ пкъыгъор къышъухалъхьагъэу щытмэ, макъэкIэ е зекIокIэ горэмкIэ хэушъхьафыкIыгъэ къулыкъушIэхэм гу лъяжъугъэтэн фае. ШъукъарагъэтIупщыжьыным епхыгъэ хъугъэ-шIагъэхэр нахьыбэу шъуишIэжь къыхэнэным шъупылъ. Ащ епхыгъэ къэбарыр хэбзэухъумэкIо къулыкъухэм къашъхьапэщт.