СССР-м спортымкIэ имастерэу Мырзэ Джанхъот фэгъэхьыгъэ я 25-рэ шIэжь зэнэкъокъур самбэмкIэ Тэхъутэмыкъуае щыкIуагъ.

Урысыем изаслуженнэ тренерэу, Адыгэ Республикэм изаслуженнэ тренерэу, Урысыем физическэ культурэмкIэ изаслуженнэ IофышIэу, Тэхъутэмыкъуае испорт еджапIэу N 1-м ипащэу Джарымэкъо Нурбый ыгъэсагъэ­хэм ащыщ Мырзэ Джанхъот.

ЕджапIэм щапIугъэ ныбжьыкIабэ спортышхом цIэрыIо щы­хъугъ. СССР-м спортымкIэ имастер самбэмкIэ апэу хъугъэр Мырзэ Джанхъот.

— Щынджые къыщы­хъугъ, спортыр шIу зыщалъэгъурэ унэгъо Iу­жъум Мырзэ Джанхъот щапIугъ. Икъоджэ гупсэ бэнэпIэ еджапIэ зэрэдэмытым фэшI Тэхъутэмыкъуае кIозэ иIэпэIэсэныгъэ хигъахъощтыгъ. Тренерэу Джарымэкъо Нурбый къыщытхъущтыгъ, — къытиIуагъ Урысыем, Адыгеим язаслуженнэ тренерэу, зэнэкъокъум исудья шъхьа­Iэу Хъот Юныс. – Джанхъотрэ сэрырэ тызэныбджэгъугъ. Зы купым тыхэтэу самбэмкIи, дзюдомкIи зэнэкъокъухэм тахэлажьэщтыгъ.

Адыгэ къэралыгъо университетым физкультурэмкIэ ыкIи дзюдомкIэ и Институт Дж. Мырзэм къыухыгъ. Тренерэу Жьыубгъу (Джубгэ) Iоф щишIэщтыгъ, шIушIэ IэпыIэгъухэм ахэлэжьэныр шэнышIу фэхъугъагъ. Пчыхьэм иунэ къэкIожьызэ IашэкIэ къыпэуцугъэ хъункIакIом екIодылIагъ.

— Нарт шъаом ыгу къытемыожьырэми, тщы­гъуп­шэрэп, ишIушIагъэкIэ къытхэт, — къыIуагъ тренер цIэрыIоу Джарымэкъо Нурбый. — НыбжьыкIэхэм щысэшIу афэхъу.

ЗэхэщакIохэр

Мырзэ Джанхъот фэгъэхьыгъэ я 25-рэ шIэжь зэнэкъокъум изэхэщэн кIэщакIо фэхъугъэх Джан­хъот ышнахьыкIэу, самбэмкIэ спортым имастерэу, Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мыр­зэ Джанбэч, Тэхъутэмыкъое районым иадминистрацие физкультурэмкIэ ыкIи спортымкIэ и Комитет итхьаматэу Джарымэкъо Азмэт, Тэхъутэмыкъуае испорт еджапIэу N 1-м ипащэу Джарымэкъо Нурбый.

Зэнэкъокъум изэхэщэн яIа­хьышIу халъхьагъ Джанхъот дэгъоу зышIэщтыгъэхэм, ныбджэгъу­хэм. Къушъэкъо Амир, Бек-Оглы Байзэт, Пратэкъо Алый, Абрэдж Аслъан, Пратэкъо Муслим, Едыдж Руслъан анахьэу къахэдгъэщыхэ тшIоигъу.

Зэнэкъокъум хэлэжьагъэх

Ростов хэкум, Краснодар краим, Адыгэ Республикэм якомандэ 30-м нахьыбэ зэнэкъокъум хэлэжьагъ. Апэрэ чIыпIэхэм 2007 — 2009-рэ илъэсхэм къэхъугъэ бэнэкIо 250-рэ фэдиз афэбэнагъ.

Тэхъутэмыкъое районым иныбжьыкIэхэм хагъэунэфыкIырэ чIыпIэ 11 къыдахыгъ. Цэй Алый, кг 46-рэ, ШъэуапцIэкъо Ибрахьим, кг 54-рэ, Едыдж Сэлым, кг 79-рэ, апэрэ чIыпIэхэр къахьыгъэх. Адыгэ Республикэм изаслуженнэ тренерэу Джарымэкъо Рустам егъасэх.

ЯтIонэрэ чIыпIэхэр къахьыгъэх Карабашев Заурбый, кг 38-рэ, тренерыр Евгений Демченко, ХъорэлI Ислъам, кг 42-рэ, тренерыр Нэгъой Ибрахьим, ЛIэхъу­сэжъ Ислъам, кг 50, тренерыр Мырзэ Ахьмэд.

Бальченко Руслан, кг 38-рэ, Батмэн Амин, кг 46-рэ, НакI Тимур, кг 50, ЕмтIылъ Батырбый, кг 58-рэ, ящэнэрэ чIыпIэхэр къы­дахыгъэх, Тэхъутэмыкъуае зыщагъасэ. Спорт еджапIэу «Шапсыгъэм» къикIыгъэ Шъэумэн Якъубэ, кг 71-рэ, ящэнэрэ чIыпIэр къыдихыгъ, тренерыр Нэгъуцу Азэмат.

Апэрэ чIыпIэр Тэхъутэмыкъое районым икомандэ къыдихыгъ. Теуцожь районым ятIонэрэ, къа­лэу Мыекъуапэ ящэнэрэ чIыпIэхэр афагъэшъошагъэх.

Тренерхэу Мэрэтыкъо Сахьид, Хъот Юныс, Дзыбэ Хьамзэт, Псэунэ Мурат, Джарымэкъо Нурбый, Нэгъой Ибрахьим, Гъомлэшк Алый, Чэтыжъ Алый, Шъэумэн Байзэт, Хьабэхъу Адам, Къуекъо Руслъан, Хъыщт СултIан, нэмыкI­хэу зэхэщэн Iофыгъохэм ахэлэжьагъэхэм бэнакIохэр, Мыр­зэхэм яIахьылхэр афэразэх.

Гъомлэшк Алый ыгъэсэрэ Хьакъуй Эльдар бэнапIэм техникэ анахь дэгъу къыщигъэлъэгъуагъ. ТекIоныгъэм икъыдэхын фэбанэзэ гуетыныгъэ ин къызыхэзыгъэ­фагъэу къыхахыгъэр Цэй Алый, тренерыр Джарымэкъо Рустам.

ХагъэунэфыкIырэ чIыпIэхэр къыдэзыхыгъэхэм кубокхэр, щытхъу тхылъхэр, ахъщэ шIухьафтынхэр аратыжьыгъэх. Мырзэ Джанбэч хэушъхьафыкIыгъэу бэнакIо­хэм, тренерхэм афэгушIуагъ.