СпортымкIэ мастерэу Бибэ Мурат фэгъэхьыгъэу атлетикэ онтэгъумкIэ зэнэкъокъур чъэпыогъум и 22-м Мыекъуапэ щызэхащэщт.

IофшIапIэу «Руфа-Турым» ипащэу илъэсыбэрэ щытыгъэ Бибэ Мурат хэкум къэзыгъэзэжьыгъэ тилъэпкъэгъухэм IэпыIэгъу афэ­хъу­щтыгъ, шIушIэ Iофыгъохэр ыгъэцакIэщтыгъэх. Атлетикэ онтэгъумкIэ хэгъэгу ыкIи дунэе зэ­Iу­кIэ­гъухэм ахэлажьэзэ хагъэунэфыкIырэ чIыпIэхэр бэрэ къыдихыгъэх.

Республикэ общественнэ движениеу «Адыгэ Хасэр» якIэщакIоу, Бибэ Мурат фэгъэхьыгъэ зэнэкъокъур Мыекъуапэ щызэхащэ. ЗэIукIэгъухэр урамэу Кубанскэм тет зыгъэсапIэм сыхьатыр 11-м щырагъэжьэщтых. Адыгеим атлетикэ онтэгъумкIэ ибатырхэм яIэпэIэсэныгъэ къагъэлъэгъощт, щытхъуцIэхэм якъыдэхын фэбэнэщтых.