ЕшIэкIо дэгъухэм тагъэгугъэ
Адыгэ Республикэм футболымкIэ икIэлэцIыкIу-ныбжьыкIэ еджапIэ икомандэ Краснодар краим изэIухыгъэ кIэух зэнэкъокъу хэлэжьагъ.
2006-рэ илъэсым къэхъугъэ кIалэхэр зыхэт командэм ипащэх Адыгэ Республикэм изаслуженнэ тренерэу Тэтэр Нурбыйрэ тренерэу Пэунэжь Азэматрэ. Командэ 14 зэнэкъокъугъ.
ПэшIорыгъэшъ зэIукIэгъухэм ауж финалныкъом щызэдешIагъэх «Академия-Кубань» Краснодар ыкIи СШОР Мыекъуапэ. Зэнэкъокъур гъэшIэгъонэу кIуагъэ, пчъагъэр зэфэдэу ешIэгъу уахътэр аухыгъ, пенальтикIэ Краснодар иныбжьыкIэхэм текIоныгъэр къыдахыгъ.
Ящэнэрэ чIыпIэм фэбэнагъэх Афыпс районым ыкIи Адыгеим яешIакIохэр. СШОР-м хэтэу Александр Соломаниным къэлапчъэм Iэгуаор дидзи, 1:0-у Мыекъуапэ иешIакIохэм текIоныгъэр къахьыгъ.
— ТикIэлэеджакIохэу АкIэгъу Амир, ЛIышъэкъо Ренат, Едыдж Тамерлан, Хьапыщтэ Алан яIэпэIэсэныгъэкIэ къахэщыгъэх, — къыIуагъ тренерэу Тэтэр Нурбый.
— Апэрэ чIыпIэр «Академия- Кубань» Краснодар къыдихыгъ. «Черноморец» Новороссийск ятIонэрэ хъугъэ. Джэрзыр тиешIакIохэм къыфагъэшъошагъ, — къытиIуагъ АР-м футболымкIэ икIэлэцIыкIу-ныбжьыкIэ спорт еджапIэ икъулыкъушIэу Пэнэшъу Мыхьамодэ. — КIэлэеджэкIо сэнаущхэр тиешIакIохэм къахэтэгъэщых, хэушъхьафыкIыгъэу Iоф адэтэшIэ.
— Адыгеим щапIугъэхэу анахь IэпэIасэхэр тинэплъэгъу итых, республикэм икомандэ шъхьаIэ къетэгъэблагъэх, — игупшысэхэм тащигъэгъозагъ Мыекъопэ «Зэкъошныгъэм» итренер шъхьаIэу ШакIо Ащэмэз. —ЕшIэкIо дэгъу хъущтхэр къахэкIыщтхэу тэгугъэ.