Художественнэ пащэр Ацумыжъ Рустам
Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэу Ацумыжъ Рустам агъэнэфагъ.
Ацумыжъ Рустам Мыекъуапэ къыщыхъугъ. Адыгэ Республикэм искусствэхэмкIэ иколледжэу Тхьабысымэ Умарэ ыцIэ зыхьырэм ыуж культурэмкIэ ыкIи искусствэхэмкIэ университетыр Краснодар къыщиухыгъ. Режиссер сэнэхьатым зыфигъэсагъ.
Адыгэ Республикэм и Урыс къэралыгъо театрэу А. С. Пушкиным ыцIэ зыхьырэм иактер-режиссерэу Iоф ышIагъ. Тэхъутэмыкъое районым иадминистрацие культурэмкIэ и ГъэIорышIапIэ ипащэу аужырэ илъэсхэм щытыгъ.
Театрэм цIыфыр епIу, щыIэныгъэм фегъасэ. Адыгэ Республикэм и Лъэпкъ театрэ зызэхащагъэр илъэс 85-рэ мыгъэ хъугъэ. Лъэпкъ театрэр пытэу ылъэ теуцуагъ. Адыгеим идраматургхэм атхыгъэ пьесэхэр щыIэныгъэм къыхахыгъэх. Москва, Ленинград ащырагъэджагъэхэ артистхэр цIэрыIо искусствэм щыхъугъэх. ЛIэужхэр зэзыпхырэ театрэр лъэхъаным щылъэкIуатэ.
АР-м и Лъэпкъ театрэ зычIэт унэр дунэе шапхъэхэм адиштэу зэтырагъэпсыхьажьыгъ. Ащ фэшI Лъэпкъ театрэм ипащэхэр, артистхэр ти ЛIышъхьэу КъумпIыл Мурат, Правительствэм, Парламентым афэразэх.
Лъэпкъ театрэр ыпэкIэ лъыкIотэнымкIэ амалышIухэр иIэх. «Псэлъыхъохэр», «Дэхэбаринэ ихьакIэщ», нэмыкIхэри илъэсыбэ хъугъэу театрэм къегъэлъагъох. «ТекIоныгъэм и Маф», «IэнатIэм игъэрхэр» зыфиIохэрэр, фэшъхьафхэри щыIэныгъэм дештэх. Мыгъэ агъэуцугъэмэ ащыщэу «Шыу мафэр» лъэпкъ шIэжьым къыпкъырэкIы.
Адыгабзэм изэгъэшIэн, лъэпкъ шэн-хабзэхэм язехьан театрэр адэлажьэ. КIэу агъэуцущт спектаклэхэм тяжэ. IэкIыб къэралхэм, къош республикэхэм, крайхэм театрэр тапэкIи зэралъыIэсыщтым тицыхьэ телъ.
Художественнэ пащэу Ацумыжъ Рустам иIэнатIэ зэрэIухьагъэм фэшI тигъэзетеджэхэм ацIэкIэ тыфэгушIо. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ мэфэкI зэхахьэхэм Лъэпкъ театрэр чанэу ахэлэжьагъ. Театрэм спектаклэхэр кIэу щагъэуцущтых, рольхэр къэзышIыщт артистхэр рагъэджэщтых. Адыгэ лъэпкъыр орэпсэу! Лъэпкъ театрэр орэпсэу!
ЕмтIылъ Нурбый.