Мыекъопэ къэралыгъо технологическэ университетым щеджэрэ Заур Магомедовыр Урысыем ушу-саньдамкIэ изэIукIэгъоу «Кавказ и Кубок» зыфиIоу Лабинскэ щыкIуагъэм апэрэ чIыпIэр къыщихьыгъ.

— Урысыем ишъолъыр 20-м нахьыбэ зэнэкъокъум хэлэ­жьагъ, — къытиIуагъ Адыгэ Рес­публикэм изаслуженнэ тренерэу НэмытIэкъо Аскэрбый. — Дагъыс­тан, Воронеж ыкIи Белгород хэкухэм, Краснодар краим, Адыгеим, нэмыкIхэм ябэна­кIохэр апэрэ чIыпIэхэм афэбэнагъэх. Адыгэ Республикэм испорт еджапIэу N 2-м зыщызыгъэсэрэ Заур Магомедовыр килограмм 65-м нэс къэзыщэчыхэрэм янэкъокъугъ. Сэна­ущыгъэу хэлъымкIи, иIэпэIэсэныгъэ зэригъэфедэрэмкIи Заур зэхэщакIохэм къыхагъэщыгъ. Техникэ анахь дэгъу къызэригъэлъэгъуагъэм фэшI хэушъхьа­фыкIыгъэ шIухьафтын къыфагъэшъошагъ.

Финалныкъом З. Магомедовыр щыбанэзэ шъобж къытыращагъэми, гуетыныгъэ хэлъэу бэнагъ. Апэрэ чIыпIэм фэгъэхьыгъэ зэIу­кIэгъум текIоныгъэр къыщыдихи, Урысыем спортымкIэ имастер хъугъэ.

— Илъэси 10 ыныбжьэу Заур Магомедовым КъокIыпIэм къы­щежьэгъэ бэнакIэхэм зафигъа­сэу ригъэжьэгъагъ. А лъэхъаным Дагъыстан щыпсэущтыгъ, тренерэу Мурат Канакбиевыр ипэщагъ. Мыекъуапэ щеджэзэ иухьазырыныгъэ хигъэ­хъуагъ. Щысэ къыгъэлъагъозэ Iоф зыдешIэжьы, — къытиIуагъ Адыгэ Рес­публикэм испорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс. — Бэ­нэкIо ныбжьыкIэм гъэхъа­гъэхэр зэришIыгъэхэм фэшI тыфэгушIо, имедальхэм зэрахигъэхъощтым тицыхьэ телъ.

Р. Магомедовым Къыблэм ушу-саньдамкIэ изэнэкъокъу­хэм гъогогъуитIо апэрэ чIыпIэр къащихьыгъ, Урысыем изэIукIэгъухэм джэрзыр къащыдихыгъ.

Мыекъопэ къэралыгъо технологическэ университетым З. Магомедовым къыщыфэгушIуагъэх, шIоу щыIэр къыдэхъунэу фаIуагъ.

Сурэтым итыр: Заур Магомедовыр.