Красноярскэ щыбэнэщтых
Къыблэ шъолъырым дзюдомкIэ изэнэкъокъу чъэпыогъум и 14 – 15-м Ермэлхьаблэ щыкIуагъ.
Илъэс 21-м нэс зыныбжь кIалэхэр, пшъашъэхэр бэнэпIэ алырэгъум щызэIукIагъэх. Адыгэ Республикэм ихэшыпыкIыгъэ командэ хэтхэу Мэлгощ Адам, кг 55-рэ, Хьакъуй Амир, кг 73-рэ, ящэнэрэ чIыпIэхэр къахьыгъэх, тренерхэу Делэкъо Адамэрэ Гъомлэшк Алыйрэ тиныбжьыкIэхэм япащэх. Тренерэу Джарымэкъо Рустам ыгъэсэрэ СтIашъу ТIахьир, кг 73-рэ, ящэнэрэ чIыпIэр къыдихыгъ.
Пшъашъэхэм язэнэкъокъу хагъэунэфыкIырэ чIыпIэхэр къыщызыхьыгъэхэм шъуащытэгъэгъуазэ.
Едыдж Разет, кг 78-м къехъу, ятIонэрэ чIыпIэр къыдихыгъ, тренерыр Нэныжъ Байзэт. Мыгу Миланэ, кг 70-рэ, тыжьыныр къыхьыгъ. Виктория Пылевам, кг 78-рэ, Анастасия Коржовам, кг 78-рэ, джэрзыр къафагъэшъошагъ. Беданыкъо Байзэтрэ Мерэм Саидэрэ медальхэр къыдэзыхыгъэ пшъашъэхэм ятренерых. Татьяна Шаталовам, кг 52-рэ, Камила Загаловам, кг 48-рэ, ящэнэрэ чIыпIэхэр къахьыгъэх, тренерэу Нэпсэу Бислъан егъасэх.
ХагъэунэфыкIырэ чIыпIэхэр къыдэзыхыгъэхэр Урысыем икIэух зэнэкъокъоу шэкIогъу мазэм Красноярскэ щызэхащэщтым хэлэжьэщтых. ТиныбжьыкIэхэр хэгъэгум имедальхэм афэбэнэщтых.