Хэгъэгум футболымкIэ иапшъэрэ куп хэт клубхэм чъэпыогъум и 14 – 16-м я 13-рэ ешIэгъухэр яIагъэх.

Зэтэгъапшэх

«Ростов» — «Урал» — 1:2, еплъыгъэр 4480, «Химки» — «Факел» — 0:0, 2446, «Торпедо» — «Локомотив» — 0:1, 5405, «Краснодар» — «Ахмат» — 2:3, 20139, «Динамо» — «Оренбург» — 3:2, 11565, «Крылья Советов» — «Шъачэ» — 2:0, 16286, ЦСКА — «Спартак» — 2:2, 17102.

«Краснодар» иешIэгъу стадионым щеплъыгъэр зэкIэми ана­хьыб. Тренер шъхьаIэу А. Сто­рожук къызэриIуагъэу, «Краснодар» дэгъоу ешIагъ, текIоныгъэр къы­хьын ылъэкIыщтыгъ, ау ухъу­мэн Iофыгъохэр зэIукIэгъум икIэух дэеу щигъэцэкIагъэх. Ащ фэшI къэлэпчъэIутэу Сафоновыр, ухъумакIохэр тэгъэмысэх.

«Краснодар» иешIакIоу Ахметовыр иIэпэIэсэныгъэкIэ командэхэм къахэщыгъ, нэпэеплъ шIухьафтын фашIыгъ.

Ижъырэ адыгэ къалэу Шъачэ икомандэ тигъэгушIуагъэп. Зичэзыу ешIэгъоу иIэщтыр нахь къин къыфэхъущт — Санкт-Петербург щешIэщт.

«Урал» зэкIэлъыкIоу ешIэгъуищмэ текIоныгъэр къащыдихыгъ. «Ростов» къызэрэшIуихьыгъэри спортым хэшIыкI фызиIэхэм агъэ­шIагъо. «Урал» итренер шъхьаIэу В. Ганчаренкэр иIэнатIэ зыIухьагъэм къыщегъэжьагъэу командэр ыпэкIэ лъэкIуатэ.

ЕшIэгъу шъхьаI

Я 13-рэ ешIэгъухэм къахэтэгъэ­щы «Спартак» ЦСКА-м зэрэIукIагъэр. Пчъагъэр 2:1-у «Спартак» къыхьызэ Чаловым ятIонэрэу хъагъэм Iэгуаор ридзагъ — 2:2. Ащ ыпэкIэ «Спартак» иешIакIоу Соболевым ухъумакIохэр ыгъэплъэхъухи, ЦСКА-м икъэлапчъэ Iэгуаор дахэу дидзагъ.

УзыIэпищэу ешIэгъур кIуагъэ. Командэхэр хагъэунэфыкIырэ чIыпIэхэм афэбанэх, нахь лъэшыр зэнэкъокъум къыщылъэгъощт.

ЧIыпIэу зыдэщытхэр

1. «Зенит» — 33 2. «Спартак» — 26 3. ЦСКА – 25 4. «Ростов» — 25 5. «Краснодар» — 21 6. «Шъачэ» — 20 7. «Ахмат» — 20 8. «Динамо» — 20 9. «Оренбург» — 18 10. «Кр. Советов» — 14 11. «Пари НН» — 13 12. «Урал» — 13 13. «Локомотив» — 12 14. «Факел» — 11 15. «Химки» — 9 16. «Торпедо» — 6.

Я 14-рэ зэIукIэ­гъухэр

22.10. 14:00 «Пари НН» — «Краснодар» 22.10. 16:30 «Факел» — «Ростов» 22.10. 19:00 «Локомотив» — «Динамо» 23.10. 14:00 «Оренбург» — ЦСКА 23.10. 16:30 «Спартак» — «Химки» 23.10. 19:00 «Ахмат» — «Торпедо» 24.10. 17:30 «Урал» — «Кр. Советов» 24.10. 20:00 «Зенит» — «Шъачэ».

«Зенит» иешIакIоу Клаудиньо «Пари НН-м» икъэлапчъэ Iэгуаор зыдедзэм, дунэе шапхъэхэм ади­штэ­рэ IэпэIэсэныгъэ ин къызэригъэлъэгъуагъэм тынаIэ тетыдзагъ. Ащ фэдэ футболым уемызэщэу уеплъыщт. Футбол ешIэрэ ныбжьыкIэхэм щысэшIу аригъэлъэгъугъэу тэлъытэ.