Краснодар краим футболым­кIэ изэIухыгъэ зэнэкъокъу хэлэ­жьэрэ командэхэм якIэух зэIукIэгъухэр псэупIэу Кабар­динкэм щыкIуагъэх.

Чъэпыогъум и 5 — 9-м 2007-рэ илъэсым къэхъугъэ кIалэхэр зэдешIагъэх. ПэшIорыгъэшъ зэIукIэгъухэу купхэм ащызэхащагъэхэм апэрэ чIыпIитIур къащыдэзыхыгъэхэр ха­гъэунэфыкIырэ чIыпIэхэм афэбэнагъэх.

Адыгэ Республикэм футболымкIэ испорт еджапIэ зыщызыгъэсэрэ кIалэхэм япащэх тренерхэу Юрий Манченкэмрэ Шыумэфэ Рэмэзанрэ. Ахэр илъэсыбэрэ Мыекъопэ «Зэ­къошныгъэм» щешIагъэх, джырэ уахътэ кIэлэеджакIохэр футболым фагъасэх.

Краснодар краим икIэух зэIукIэгъухэм командэ 14 ащызэнэкъокъугъ. Адыгеим икIэлэеджакIохэр финалныкъом зынэсыхэм Шъачэ ифутбол клуб IукIагъэх. Зэнэкъокъур гъэшIэгъонэу кIуагъэ, Шъачэ къикIыгъэхэм 1:0-у текIоныгъэр къыдахи, финалым хэ­хьагъэх.

Ящэнэрэ чIыпIэм икъыдэхын фэгъэхьыгъэ зэнэкъокъум Тихорецкэрэ Мые­къуапэрэ яныбжьыкIэхэр щызэпэуцугъэх. ЕшIэгъу уахъ­тэр 1:1-у аухыгъ, пенальтикIэ 5:3-у Адыгеим иешIакIохэм текIоныгъэр къыда­хыгъ.

Зэнэкъокъум Славянск-на-Кубани иешIакIо­хэм апэрэ чIыпIэр къыщахьыгъ. Ижъырэ адыгэ къалэу Шъачэ икIэлэеджакIохэр ятIо­нэрэ хъугъэх. Мыекъуапэ иныбжьыкIэхэм ящэнэрэ чIыпIэр къыдахыгъ.

Мыекъуапэ икомандэ щешIэгъэ Егор Куд­рявцевым «КъэлэпчъэIут анахь дэгъу» зыфиIорэ щытхъуцIэр осэшI купым хэтхэм къы­фаусыгъ.

Тренерхэу Юрий Манченкэмрэ Шыумэфэ Рэмэзанрэ къызэраIуагъэу, тикоманэ дэгъоу щешIагъэх ЩашIэ Къантэмыр, Максим Шулик, ЖакIэмыкъо Нарт, КIэсэбэжъ Тимур, нэмыкIхэри.

Адыгэ Республикэм футболымкIэ испорт еджапIэ икъулыкъушIэу Пэнэшъу Мыхьамодэ гущыIэгъу тыфэхъугъ. Краснодар краим футболымкIэ икIэух зэIукIэгъухэр Кабардинкэм зэрэщыкIохэрэм ащ тыщигъэгъозагъ. 2006-рэ илъэсым къэхъугъэ кIалэхэр чъэпыогъум и 10 — 15-м зэдешIэщтых. Адыгеим икомандэ хагъэунэфыкIырэ чIыпIэхэм афэбанэ, тренерхэр Тэтэр Нурбыйрэ Пэунэжь Азэматрэ.

Сурэтым итхэр: Ю. Манченкэмрэ Р. Шыу­­мафэмрэ агъэсэрэ ешIакIохэу ящэнэрэ чIы­пIэр Краснодар краим къыщыдэзыхыгъэхэр.