Екатеринэ Армением щыбэнэщт
Дунаим иныбжьыкIэхэм самбэмкIэ язэнэкъокъу чъэпыогъум и 15 — 16-м Армением щыкIощт.
Урысыем ихэшыпыкIыгъэ командэ хэтэу Екатерина Соловьевар алырэгъум щыбэнэщтхэм ащыщ.
Лъэустэнхьаблэ щапIугъэ Екатерина Соловьевар Европэм иныбжьыкIэхэм язэнэкъокъоу Сербием щызэхащагъэм джырэблагъэ хэлэжьагъ. Килограмм 88-м нахьыбэ къэзыщэчыхэрэм якуп ятIонэрэ чIыпIэр къыщыдихыгъ.
— Екатерина Соловьевар Адыгэ къэралыгъо университетым физкультурэмрэ дзюдомрэкIэ и Институт щеджэ, тренерэу Нэныжъ Байзэт ипащ. Урысыем самбэмкIэ ихэшыпыкIыгъэ командэ итренерхэм аужырэ уплъэкIунхэр зэхащагъэх. Екатерина Соловьевам дунэе зэнэкъокъум дэгъоу зыфигъэхьазырыгъ, — къытиIуагъ Адыгэ Республикэм самбэмкIэ испорт еджапIэ ипащэу, Урысыем спортымкIэ дунэе класс зиIэ имастерэу Делэкъо Адам.
Екатерина Соловьевар илъэс 16 — 18 зыныбжь пшъашъэхэм язэнэкъокъу чанэу хэлэжьэнэу, игъэхъагъэхэмкIэ тигъэгушIонэу фэтэIо.