Къэралыгъо гъэпсыкIэ иIэу Адыгеир зыпсэурэр илъэси 100 зэрэхъу­гъэм фэгъэхьыгъэ зэIукIэгъухэр, театральнэ къэгъэлъэгъонхэр чъэпы­огъум и 11–м къыщыублагъэу Мыекъуапэ щэкIох.

Адыгэ Республикэм и ­Лъэпкъ театрэу Цэй Ибрахьимэ ыцIэ зыхьырэм Къэралыгъо академическэ театрэу Евгений Вахтанговым ыцIэ зыхьырэм идиректорэу, Урысыем искусствэ­хэмкIэ изаслуженнэ IофышIэ­шхоу Кирилл Крок щыIукIагъэх. Зэхахьэм хэбзэ къулыкъушIэхэр, Адыгеим итеатрэхэм яIофышIэхэр, искусствэр зыгу ри­хьыхэрэр хэлэжьагъэх.

Iофтхьабзэр пэублэ гущыIэкIэ къызэIуихыгъ Адыгэ Респуб­ликэм культурэмкIэ иминистрэу Аулъэ Юрэ. Ти ЛIышъхьэу КъумпIыл Мурат, Правительствэм ацIэкIэ дунаим щыцIэрыIо теат­рэм фэгъэ­хьыгъэ гущыIэ фабэхэр Ю. Аулъэм къыIуагъэх. Творческэ купым игъэхъагъэхэм ахи­гъэхъонэу фэлъэIуагъ.

Пащэм узылъещэ

— Кирилл Крок 1984-рэ илъэ­сым къыщегъэжьагъэу Москва итеатрэхэм Iоф ащешIэ, — къыщиIуагъ зэхахьэм АР-м и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэ иIэнатIэ зыгъэцакIэу, Адыгеим искусствэхэмкIэ изаслуженнэ Iо­фышIэшхоу, Къалмыкъым изаслуженнэ артистэу Хьакъуй Ас­лъан. — 2010-рэ илъэсым, мэлылъфэгъум и 12-м Е. Вахтан­говым ыцIэ зыхьырэ театрэм идиректорэу агъэнэфагъ.

— Театрэм ихудожественнэ пащэу щытыгъэ Римас Туминас кIэщакIо фэхъуи, директор Iэна­тIэм сыIуагъэхьагъ, — зэдэ­гущыIэгъур лъегъэкIуатэ Кирилл Крок. — IофшIэныр зесэгъажьэм театрэр зычIэт унэм игъэцэкIэ­жьын тыублагъ.

К. Крок зэрэхигъэунэфыкIы­гъэу, творческэ амалхэр ыгъэфедэхэзэ театрэм дэгъоу ипшъэ­рылъхэр ыгъэцэкIэнхэм фэшI IофшIапIэр зэтегъэпсыхьэгъэн, артистхэм яфэIо-фашIэхэр шэпхъэ лъагэхэм адиштэу зэшIохыгъэнхэ фае.

Псауныгъэр агъэпытэным, язы­гъэпсэфыгъо уахътэ гъэшIэгъонэу агъэкIоным фэшI есыпIэхэр, спорт псэуалъэхэр театрэм щагъэпсыгъэх. Сурэтхэр къызыщагъэлъэгъощтхэр, къулыкъур зыщахьырэ унэхэр агъэкIэжьыгъэх. Театрэм ичIэхьапIэхэр агъэдэхагъэх.

Театрэм иобщежитие, репе­тициехэр зыщыкIохэрэ чIыпIэхэр кIэу ашIыгъэх, зэтырагъэ­псыхьа­жьыгъэх. Зэхэщэн Iофыгъохэм Кирилл чанэу ахэлэжьагъ. Сценэ­хэр кIэу къызэрэзэIуахы-рэм мэ­хьэ­нэ ин театрэм щыратыщтыгъ.

Евгений Вахтанговым и Мемориальнэ унэ 2016-рэ илъэсым агъэцэкIэжьыгъ — ар театрэм имузей икъутамэу щыт.

Уегъэгъуазэ

Урысыем культурэмкIэ иза­служеннэ IофышIэу, щытхъуцIэхэр къызыфаусыгъэ Кирилл Крок театрэм еплъыкIэу фыриIэр зэхахьэм къыщиIотагъ, упчIэхэм джэуапхэр къаритыжьыгъ.

Къэгъэлъэгъонхэр

К. Крок къызэриIуагъэмкIэ, зы илъэсым спектаклээ 11 те­атрэм щагъэуцун алъэкIы. Мазэ къэс, гурытымкIэ зы къэгъэлъэгъон агъэхьазыры. Спектаклэу агъэуцу­щтым итемэ театрэм ипащэхэм къыхахы.

Тарихъыр, щыIэныгъэм изэ­хъокIыыгъэхэр къыдалъытэхэзэ кIэу агъэуцущт къэгъэлъэгъоныр къыхахы.

Режиссерыр

ХэушъхьафыкIыгъэу театрэм зы режиссер иI. Спектаклэр агъэу­цунэу мурад зашIыкIэ, пэшIорыгъэшъэу режиссерым лъэ­хъух, къагъоты, зэзэгъыныгъэхэр лъэныкъуитIуми зэдашIых.

Режиссерым мафэ къэс Iоф ышIэн фаеу театрэм ипащэхэм алъытэ. Уахътэр сыдэу щытми зыгъэкIорэ режиссерым театрэм чIыпIэ щыратырэп.

ЛэжьапкIэр

Зэхахьэм хэлажьэхэрэр ана­хьэу зыгъэгумэкIыхэрэ упчIэхэм лэжьапкIэр ащыщыгъ. Зы мэзэ лэжьапкIэу артистым иIэр сомэ мин 21-м къыщегъэжьагъэу къа­лъытэ.

Народнэ артистым фэгъэкIо­тэнэу фашIырэр зэкIэми анахьыб. «Заслуженный артист» зыфиIорэ щытхъуцIэр зиIэ артистыри къыхагъэщы. ЩытхъуцIэм лэжьапкIэр елъытыгъэми, анахьэу къыдалъы­тэрэмэ ащыщ рольхэр артистхэм къызэрашIырэр. Роль шъхьаIэм фэгъэзэгъэ артистым фэгъэкIотэн хэхыгъэхэр иIэх.

Артистыр зыхэлэжьэгъэ спектаклэхэм япчъагъэ сыдигъуи къыдалъытэ лэжьапкIэр ратыным фэшI. Репетициехэм артистыр зэрахэлажьэрэм ипчъагъи, идэгъугъи пащэхэм хагъэунэфыкIы.

Опыт зиIэ артистхэр ныбжьыкIэхэм IэпыIэгъу зэрафэхъухэрэр, искусствэ лъагэр щыIэны-гъэм щызехьэгъэным артистыр зэрэхэлажьэрэр, фэшъхьафхэри театрэм иIэшъхьэтетхэм къыхагъэщых.

УпчIэхэр

Адыгэ Республикэм культу­рэмкIэ иминистрэ иапэрэ гуа-дзэу Ольга Гавшинам, АР-м культурэмкIэ и Министерствэ иотдел ипащэу Шэуджэн Бэлэ, АР-м и Къэралыгъо камернэ му­зыкальнэ театрэу Хьанэхъу Адам ыцIэ зыхьырэм ихудожественнэ пащэу Сулейманов Юныс, Урысыем изаслуженнэ артистэу Бэгъ Сэид, Адыгэ Республикэм искусствэхэмкIэ изаслуженнэ Iофы­шIэ­шхохэу Ацумыжъ Рустам, Хьа­къуй Аслъан, Урысыем инароднэ артистэу Кукэнэ Мурат, Адыгэ Рес­публикэм изаслуженнэ артистэу Жъудэ Аскэрбый журналистхэм, нэмыкIхэм яупчIэхэм Кирилл Крок джэуапхэр къаритыжьыгъ.

Театрэм пIуныгъэ мэхьанэу иIэм зэрэхэхъуагъэм, ар щыIэныгъэм зэрэщыщым, лIэшIэгъухэм ыкIи лIэужхэм язэпхыныгъэхэм зэрахэлажьэрэм, фэшъхьафхэм атегущыIагъэх.

Пчыхьэм спектаклэу «Евгений Онегиныр» филармонием театрэм къыщигъэлъэгъуагъ, журналистхэр артистхэм гущыIэгъу афэхъугъэх.