Къэгъэлъэгъонхэм тигуапэу тяплъы
Къэралыгъо академическэ театрэу Евгений Вахтанговым ыцIэ зыхьырэм икъэгъэлъэгъонхэр Адыгэ Республикэм апэрэу щэкIох.
Адыгэ Республикэм и ЛIышъхьэу КъумпIыл Мурат, культурэм икIэщакIохэм я Президентскэ Фонд IэпыIэгъу къафэхъухи, АР-м и Къэралыгъо филармоние, республикэм и Лъэпкъ театрэу Цэй Ибрахьимэ ыцIэ зыхьырэм къэгъэлъэгъонхэр ащызэхащагъэх.
— Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэу дунаим щыцIэрыIо театрэм икъэгъэлъэгъонхэр республикэм щэкIох. Ти ЛIышъхьэу КъумпIыл Мурат ыцIэкIэ зэхэщакIохэм, пчыхьэзэхахьэм хэлажьэхэрэм сафэгушIо, — къыщиIуагъ зэIукIэгъум АР-м культурэмкIэ иминистрэу Аулъэ Юрэ.
— Апэрэу Адыгеим тыкъэкIуагъ. ТизэфыщытыкIэхэр нахь пытэнхэу, шIу тызэрэлъэгъунэу шъуфэсэIо, — къыщиIуагъ пчыхьэзэхахьэм Къэралыгъо академическэ театрэу Евгений Вахтанговым ыцIэ зыхьырэм идиректорэу, Урысыем искусствэхэмкIэ изаслуженнэ IофышIэшхоу Кирилл Крок.
ЗэлъашIэрэ режиссерэу Римас Туминас ыгъэуцугъэ спектаклэу «Евгений Онегиныр» А.С. Пушкиным ироман техыгъ. Филармонием изал тIысыпIэ нэкI имыIэжьэу ар артистхэм къагъэлъэгъуагъ.
Чъэпыогъум и 13 — 14-м АР-м и Лъэпкъ театрэ «Наш класс» зыфиIорэ спектаклыр Евгений Вахтанговым ыцIэ зыхьырэ театрэм къыщигъэлъэгъощт.
Артист цIэрыIохэр ащ хэлэжьэщтых, театрэр зыгу рихьыхэрэр спектаклым еплъынхэу зэхэщакIохэм рагъэблагъэх.
ЕмтIылъ Нурбый.