Нарт Лъэпшъ ищэбзащ
Гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм фольклорымкIэ иотдел игъоу ылъыти, ящэнэрэу къытырадзэжьыгъэ тхылъым джары зэреджагъэхэр. Мы илъэсым пчъагъэмкIэ 50 хъоу ар къыдэкIыгъ.
Фольклорым иотдел ипащэу Цуекъо Нафсэт къызэриIуагъэмкIэ, тхылъыр урысыбзэкIэ тхыгъэ ыкIи ар шIэныгъэлэжь-нартоведэу, филологие шIэныгъэхэмкIэ докторэу, АМАН-м иакадемикэу А. ХьэдэгъалIэр къызыхъугъэр илъэси 100 зэрэхъугъэм фагъэшъошагъ.
Тхылъыр адыгэ эпосэу «Нартхэм» къыдэхыгъэ тхыдэхэмкIэ, хъишъэхэмкIэ бай, урысыбзэкIэ тхыгъэ, тхылъеджэ пстэуми зыфагъэнэIосэн амал яIэщт.
«Самоуправляемая стрела нарта Тлепша» зыфиIорэр ежь ХьэдэгъэлIэ Аскэр зыгъэхьазырыгъагъэр, Людмила Ветровар игъусэу урысыбзэм рагъэкIугъ. Теплъэу иIэри къыдэхьэгъэ нарт къэбар пшIы пчъагъэри сурэтхэмкIэ ыгъэкIэрэкIагъ Пшызэ искусствэхэмкIэ изаслуженнэ IофышIэшхоу, сурэтышIэу А. Хьапыщтым.
— Адыгэ эпосым хэшIыкI фыряIэу еджакIохэр, студентхэр, литературэр зикIасэхэр пIугъэнхэмкIэ мы тхылъыкIэм ишIуагъэ къэкIонэу тэгугъэ», — къыIуагъ Нэфсэт.
Дунэе культурэм ихъарзынэщ зыгъэбаигъэ лъэпкъ эпос зэфэшъхьафхэу «Манас», «Джангар», «Калевала» ыкIи мыхэм анэмыкIхэм ясатыр хэт адыгэ лъэпкъ эпосэу «Нартхэр» цIыфхэм зэлъягъэшIэгъэным мэфэкI къыдэкIыгъор фэIорышIэ.
Лъэпкъ эпосыр еджапIэхэм ащызэрагъэшIэнымкIэ тхылъыр IэпыIэгъу афэхъун ылъэкIыщт. «Самоуправляемая стрела нарта Тлепша» зыфиIорэми тхыдэ 35-рэ къыдэхьагъ, ахэр къаIуатэрэмкIи, бзэу зэрэтхыгъэмкIи, гупшысэу ахэлъымкIи зэфэдэу гъэшIэгъоных, кIэкIых, IупкIэх. «Нартхэм ядышъэ мыIэрыс» («Золотое яблоко нартов») зыфиIорэм ар къызэIуехы, нартхэм ядышъэ мыIэрысэ зыфэдэр зышIэмэ зышIоигъохэр ерэджэх. Джащыгъум ижъырэ нартхэм ядунэететыкIагъэр, зэман блэкIыгъэ чыжьэр зыфэдагъэр нахь къагурыIощтых. Сэтэнэе гуащэр нарт Орзэмэдж шъхьэгъусэ зэрэфэхъугъэр, Шэбатныкъо Орзэмэдж зэрикъор, Лъэпшъ игъупчъэ зыфэдэр, Чэчаныкъо Чэчан ехьылIагъэр, Лъэпшъ фэгъэхьыгъэ къэбархэр, Саусэрыкъо икъэхъукI, нэмыкI тхыдэхэри тхылъым бэу къыщытыгъэх.
Тхыгъэр къэзыIотагъэр, мафэр, мазэр, илъэсыр ыкIи зытхыжьыгъэр АРИГИ-м ишIэныгъэлэжьэу, тхакIоу, нартхэмкIэ угъоекIо-зэгъэфакIоу ХьэдэгъэлIэ Аскэрэу зэрэщытыр нахьыбэм апытхагъ. Ахэм зэу ащыщ «Сатанай-цветок» зыфиIорэ хъишъэу 1946-рэ илъэсым ежь ХьэдэгъэлIэ Аскэр икъоджэгъу нахьыжъэу, зэлъашIэрэ орэдыIо-IорIотакIоу, арапыбзэр зышIэу, ефэндэу Шыблэкъо Исхьакъ къыIозэ ытхыжьыгъэр.
«Самоуправляемая стрела нарта Тлепша» зыфиIорэм адыгэ орэдыIохэм ыкIи тхыдэIуатэхэм яхьылIэгъэ гущыIэ кIэкIхэр ыкIи сурэттехыгъэхэр бэу дэтых. Я ХIХ — ХХ-рэ лIэшIэгъухэм щыIагъэхэу ЛIыпый Билъэустэн (къу. Хьатикъуай), Шъхьэлэхъо Алый (къу. Афыпсып), къуаджэу ХьакурынэхьаблэкIэ — КIуай Зэфэс ыкIи Афыпсыпэ щыщэу АкIэгъу Ибрахьим ясурэтхэр дэтых.
Илъэс зэфэшъхьафхэм адыгэ тхакIохэм, шIэныгъэлэжьхэм атырахыгъэ зэхэт сурэтхэу ХьэдэгъэлIэ Аскэр зыхэтхэри тхылъым къыдэхьагъэх. Ахэр мэхьанэ зиIэ мэфэкI Iофтхьабзэхэм — конференциехэм, Дунэе зэIукIэшхохэм, Iэнэ хъураехэм, мэфэкI фестивальхэм ащытырахыгъэх. ТхылъыкIэр, щэч хэлъэп, уасэ зыфэпшIын фаехэм ащыщ.