Лъэпкъ искусствэм ия VII-рэ Дунэе фестивалэу «Друзья в гостях у «Казаков России» зыфиIорэр къалэхэу Липецк, Елец, Грязи ащыкIуагъ.

Адыгэ Республикэм и Къэралыгъо академическэ къэшъо­кIо ансамблэу «Налмэсыр», Белоруссием къикIыгъэ «Хорошки», Донецкэ Народнэ Респуб­ликэм иансамблэу «Донбасс» зыфиIохэрэр зэкъошныгъэм игъэпытэн фэгъэхьыгъэ фестивалым хэлэжьагъэх.

Джырэ уахътэ ДНР-м щырэхьатэп, политикэм къыпкъырыкIырэ Iофыгъохэм гумэкIыгъохэр ахэлъых. Арэу щытми, «Донбассым» фестивалым дэгъоу зыфигъэхьазырын ылъэ­кIыгъ. Лъэпкъ мэкъамэхэр гум рихьэу ансамблэм ыгъэжъынчыгъэх, артистхэм яIэпэIэсэныгъэ игъэкIотыгъэу къагъэлъэ­гъуагъ. ОрэдыIо-къэшъокIо ансамблэм художественнэ амалхэр искусствэ лъагэм диштэу ыгъэ­федагъэх.

КъашъохэмкIэ Липецкэ и Къэ­ралыгъо театрэу «Урысыем икъэзэкъхэм» ипрограммэ гъэ­шIэгъонэу гъэпсыгъэ. Артистхэм яшъуашэхэр дахэх, орэдхэм ыкIи къашъохэм гур аIэты. Театрализованнэ едзыгъохэм лъэпкъ шэн-хабзэхэр, фольклор баир ахэгъэщагъэх. Урысыем икъэзэкъхэр зыщыпсэухэрэ шъолъырхэу Дон, Пшызэ, Сыбыр, КъокIыпIэ Чыжьэм яшэн-хабзэхэр театрэм ирепертуар къыхэщых.

Минскэ къикIыгъэ ансамблэу «Хорошки» зыфиIорэм къашъо­хэм псэ къапегъакIэ. Пэсэрэ лъэхъаным къыхахыгъэ лъэпкъ къашъохэр непэрэ щыIакIэм епхыгъэхэу артистхэм къашIых.

«Налмэсым» икъашъохэм искусствэм ибаиныгъэ къыраIотыкIы. ЛIэужхэм язэпхыныгъэ­хэр художественнэ амалхэмкIэ къызэIуахых. «Налмэсым» осэ ин къызэрэфашIыгъэм тегъэгушхо.

Фестивалым икIэух концерт хэхыгъэу Липецкэ щыкIуагъэм ансамблэхэр къыщышъуагъэх, орэдыбэ къыщаIуагъ. «Налмэсым» иартистхэм анахьэу хагъэунэфыкIыгъэр бысымхэм зэхэщэн Iофхэр дэгъоу зэрагъэ­цэкIагъэхэр ары. Ащ ишIуагъэкIэ ансамблэхэм яартистхэм гуетыныгъэ ин ахэлъэу яIэпэIэсэныгъэ къагъэлъэгъуагъ.