Адыгэ пщынэм уедэIумэ…
Адыгэ Республикэм и Лъэпкъ музей «Адыгэ пщынэу Iэпэ пшIыкIутIур» зыфиIорэ къэгъэлъэгъоныр къыщызэIуахыгъ.
Музыкальнэ Iэмэ-псымэхэр, орэдхэр зытыратхэгъэ пластинкэхэр, бгъэфедэн плъэкIыщт искусствэм щыщ пкъыгъохэр, гъэзетхэм, журналхэм, тхылъхэм къащыхаутыгъэ тхыгъэхэр, тарихъым къыхахыгъэ сурэтхэр, артистхэмрэ ансамблэхэмрэ яIофшIагъэхэм ащыщхэр музеим къыщагъэлъагъох.
Лъэпкъ музеим этнографиемкIэ икъутамэ ипащэу Цэй Сусанэ я ХIХ-рэ лIэшIэгъум ия 2-рэ кIэлъэныкъо адыгэ пщынэр тищыIэныгъэ къызэрэхэхьагъэм, пщынэр Iэпэ 12 зэрэхъущтыгъэм, ащ ыуж 16-м, 18-м зэрэнэсыгъэм, лъэпкъ музыкэм хэхъоныгъэхэр зэришIыгъэхэм, фэшъхьаф тарихъ къэбархэм къатегущыIагъ.
Пщынэр псынкIэу, пщынаор щытэу орэдышъор къыригъэIоным, Iэрыфэгъоу гъэпсыгъэным ямэхьани С. Цэим къыхигъэщыгъэх. Пщынаор къэшъуакIом къыдежъыузэ, купым хэтхэу уджыхэрэм гукIэ алъыIэсыщтыгъ.
ЦIэрыIохэр тиIэх
Хьагъэудж Мыхьамэт, Былымыхьэ Паго, Аулъэ Олэгъэй, Темызэкъо Алый, Шагудж Мыхьамод, Лъэцэрыкъо Ким, нэмыкI пщынэо цIэрыIохэм яхьылIэгъэ къэгъэлъэгъонхэр бэ мэхъух. Пщынаохэм яшIушIагъэ кIодырэп. Хьагъэудж Мыхьамэт, Лъэцэрыкъо Кимэ ацIэхэр искусствэхэмкIэ кIэлэцIыкIу еджапIэхэм афаусыгъэх.
ЛIэужхэр зэзыпхыхэрэ пщынаохэм рагъэжьэгъэ Iофыр лъызыгъэкIуатэхэрэм ясурэтхэр, гъэхъагъэхэр къэзыIотэрэ едзыгъохэр гъэшIэгъоных. Лъэхъаным дырагъаштэзэ пщынэ зэфэшъхьафхэмкIэ адыгэ музыкальнэ искусствэм ылъапсэ агъэпытэ, хэхъоныгъэхэр фашIых. Хъодэ Мэдин ышIыгъэ пщынэхэр лъэгъупхъэх.
ЛIыбзыу Аслъан Темыр Кавказым, Къыблэм ащыцIэрыIо пщынау, тилъэпкъэгъухэр зыщыпсэурэ хэгъэгухэм итворчествэкIэ алъыIэсыгъ. Дзыбэ Мыхьамэт орэдыIу, пщынау. Тхьэм сэнаущыгъэу къыхилъхьагъэр цIыфхэм алъегъэIэсы. ГъукIэлI Батыр, Барцо Руслъан, Шэуджэн Рустам, Шэуджэн Адам, нэмыкI пщынаохэри непэрэ искусствэм щашIэх.
Адыгэ Республикэм инароднэ артистэу Мышъэ Анзаур Адыгеим и Къэралыгъо орэдыIо-къэшъокIо ансамблэу «Ислъамыем» ипщынау, орэдышъохэр еусых.
Тинахьыжъ лъапIэхэм рагъэжьэгъэ Iофыр искусствэм щылъагъэкIотэным фэшI типщынаохэм амалышIухэр яIэх.
ИскусствэхэмкIэ кIэлэцIыкIу еджапIэхэм защызыгъасэхэрэм япчъагъи, яIэпэIэсэныгъи ахэхъо. Адыгэкъалэ искусствэхэмкIэ икIэлэцIыкIу еджапIэ икIэлэегъаджэу Хьэкомэ Симэ ыгъэсэрэ пщынаохэр Адыгэ Республикэм, Урысыем язэнэкъокъухэм чанэу ахэлажьэх, хагъэунэфыкIырэ чIыпIэхэр къыдахых.
ЗэлъашIэхэрэ сурэтышIхэу ПIэтIыощэ Феликс, Къат Теуцожь, фэшъхьафхэм ясурэтхэри Лъэпкъ музеим къыщагъэлъагъох. Хэгъэгум фэгъэхьыгъэ орэдыр къэзыIохэрэ хъулъфыгъэхэм ясурэтэу Т. Къатым ышIыгъэр гум къегущыIыкIы.
Адыгэ ашугэу Теуцожь Цыгъо исурэти уегъэгъуазэ. ШыкIэпщынаоу, орэдыIоу ар щытыгъ.
ПIэтIыощэ Феликс исурэтхэр щыIэныгъэм къыщэгущыIэх. ПхъэкIычаор, пщынаор, къамылапщэр, бжъэмыем къезыгъаIорэр, фэшъхьафхэри олъэгъух.
— ПщынэтIаркъор испунэм къыщагъотыжьыгъ, — къеIуатэ археолог цIэрыIоу, Адыгэ Республикэм культурэмкIэ изаслуженнэ IофышIэу Тэу Аслъан. —ПщынэтIаркъор адыгэхэм зэрагъэфедэщтыгъэм ехьылIэгъэ къэбархэр Гъобэкъуае щыщэу СтIашъу Юсыф къыугъоигъэх. Музыкальнэ Iэмэ-псымэр Санкт-Петербург къыщагъэлъэгъуагъ.
Къэралыгъо гъэпсыкIэ иIэу Адыгеир зыпсэурэр илъэси 100 зэрэхъугъэм фэгъэхьыгъэ концертхэр Москва, Краснодар, Налщык, Мыекъуапэ, Щэрджэскъалэ, фэшъхьафхэм ащыкIуагъэх. Типщынаохэм тарихъым фэгъэхьыгъэ музыкальнэ произведениехэр дахэу агъэжъынчыгъэх.
Урысыем, Адыгеим, Къэбэртэе-Бэлъкъарым, Къэрэщэе— Щэрджэсым янароднэ артистэу, композиторэу Нэхэе Аслъан «Хьагъэуджым изэфакIу» зыфиIоу ыусыгъэ рапсодиер Урысыем, IэкIыб хэгъэгухэм ащызэхахы, осэ ин къыфашIы.
АР-м и Лъэпкъ музей къыщызэIуахыгъэ къэгъэлъэгъоным лъэпкъ искусствэм хэхъоныгъэ ышIынымкIэ мэхьэнэ ин иI, зэхэщакIохэм тафэраз. Апэрэ мафэм къыщыублагъэу къэгъэлъэгъоным Урысыем ишъолъырхэм къарыкIыгъэхэр ашIогъэшIэгъонэу еплъых. Илъэсым икIэух нэс музеим къэгъэлъэгъоныр щыкIощт.
Лъэпкъ искусствэм къызэрэщаIуатэу, пщынаом «къыригъэпшIыкIутIукIызэ» къыригъэIорэ орэдышъом гур зыфещэ. Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм щызэхащэгъэ ансамблэм исурэт музеим къыщагъэлъагъо. Художественнэ пащэу ГъукIэ Замудин ицыхьэ телъ еджапIэм зыщызыгъэсэрэ ныбжьыкIэхэм пщынэо дэгъухэр къызэрахэкIыщтым. Адыгэ пщынэм уедэIумэ, лъэпкъым ыбзи, иорэди зэхэпхыщт.
НэкIубгъор зыгъэхьазырыгъэр ЕмтIылъ Нурбый.