Урысыем ипартийнэ проектэу «Zа Самбо» зыфиIорэр спорт еджапIэхэм гъэшIэгъонэу зэхащагъ.

Адыгэ Республикэм самбэмкIэ испорт еджапIэ кIэщакIо зыфэхъугъэ зэхахьэр спорт Унэшхоу «Ошъутенэм» игъэкIотыгъэу щыкIуагъ.

СамбэмкIэ бэнэкIуи 100-м нахьыбэ хъурэ ныбжьыкIэхэм яIэпэIэсэныгъэ алырэгъум къыщагъэлъэгъуагъ. Урысыем и Президентэу Владимир Путиным ыныбжь илъэс 70-рэ зэрэхъугъэм фэгъэхьыгъэ зэIукIэгъухэм тренер, спортсмен цIэрыIохэр ахэлэжьагъэх. «IэпэIасэм иегъэджэн» зыфиIорэ зэхахьэр хэгъэгум щыкIуагъ.

— Президентэу Владимир Путиныр икIэлэгъум спортым ишъыпкъэу пылъыгъ. СамбэмкIэ, дзюдомкIэ банэщтыгъ. СССР-м спортымкIэ имастер, хэгъэгум изаслуженнэ тренер хъугъэ. Владимир Путиным спортыр непи ыгу рехьы. ИIэнатIэ ыгъэцакIэзэ спорт псэуалъэхэр хэгъэгум щыгъэпсыгъэнхэм, зэнэкъокъухэр зэхэщэгъэнхэм кIэщакIо афэхъу. Спортым пIуныгъэ мэхьэнэ ин реты, — къытиIуагъ Адыгэ Республикэм самбэмкIэ испорт еджапIэ ипащэу, Урысыем спортымкIэ дунэе класс зиIэ имастерэу Делэкъо Адам. — «IэпэIасэм иегъэджэнэу» зэхэтщагъэм спортышхом щыцIэрыIохэр къедгъэблэгъагъэх.

Мэрэтыкъо Сахьид дунаим самбэмкIэ изэ­нэкъокъу дышъэ медалыр къыщыдихыгъ, дунаим и Кубок къыфагъэшъошагъ, иапэрэ тренерыр Бэгъэдыр Къэралбый. С. Мэрэтыкъор Адыгэ Республикэм изаслуженнэ тренер, джырэ уахътэ ныбжьыкIэхэр самбэм фегъасэх.

Алхъо Сыхьатбый Европэм гъогогъуи 3 дышъэ медалыр къыщыдихыгъ, дунаим гъогогъуитIо апэрэ чIыпIэр къыщихьыгъ, дунаим и Кубок къыдихыгъ, медалэу «Адыгеим и Щытхъузехьэр» къыфагъэшъошагъ.

Мэрэтыкъо Сахьидэрэ Алхъо Сыхьатбыйрэ «IэпэIасэм иегъэджэн» къыщыгущыIагъэх, самбэр спорт лъэпкъ гъэшIэгъонэу зэрэщытыр, Адыгеим щыщ нэбгырабэ хэгъэгум, Европэм, дунаим ячемпион зэрэхъугъэхэр, тренерэу Iоф зэрашIэрэр ныбжьыкIэхэм къафаIотагъ.

Урысыем щыкIогъэ спорт зэхахьэу «Zа самбо» зыфиIорэм ныбжьыкIэ мин пчъагъэ хэлэжьагъ. Самбэм нахь зиушъомбгъуным, пIуныгъэ мэхьанэу иIэр къэIэтыгъэным фэшI тапэкIи Iофтхьабзэхэр зэхащэщтых.

— КIэлэцIыкIухэм непэ алъэгъурэр, зэха­хырэр агу къенэжьы, — къытиIуагъ Мэрэтыкъо Сахьидэ. — Спортыр ящыIэныгъэ щыщ зэрэхъущтым тыпылъ.

Алхъо Сыхьатбый иапэрэ тренерэу Анд­риан Выростковым, СССР-м изаслуженнэ тренерэу Хьэпэе Арамбый, Урысыем, Адыге­им язаслуженнэ тренерэу Хъот Юныс афэраз. Ахэр ипащэхэу самбэм зыфигъэсагъ, дунаим цIэрыIо щыхъугъ.

СамбэмкIэ тибэнэкIо ныбжьыкIэхэм яIэпэIэсэныгъэ хагъэхъонымкIэ непэ амалышIу­хэр яIэх. Джырэблагъэ Нащ Расул ыкIи Кобл Рэмэзан Европэм иныбжьыкIэхэм самбэмкIэ язэнэкъокъу дышъэ медальхэр къыщахьыгъэх, щысэшIу къагъэлъэгъуагъ.